کھڑی ڈیندیاں سنیہڑا انہاں لوکاں کوں۔۔۔ محمود مہے

وج او دولی وج۔۔۔
کھڑی ڈیندیاں سنیہڑا انہاں لوکاں کوں
اللہ آن وساوئے ساڈی جھوکاں کوں۔
اے او جیونڑ جوگ ہے جینکوں ہر دھرتی جایا من اپنڑے دی ریت وچ خالی پیر پا کراہیں ہزراں سالاں توں پیا ہے کوکدا۔ اے کوک کڈاہیں اپنڑی نگری آپ وسا توں دی صورت ایں وسوں دے قومی شاعر خواجہ غلام فرید دی بھاشا اچ کنیں پوندی ہے اتے کڈاہیں پچھلے چونتری سالاں تو سامراج دی طرفوں مسلط کیتی گئی ہر کالی رات اچ اپنڑے تن کوں بھاہ لا کے سنجانڑ دی راہ ڈکھیندے عاشق خان بزدار دی صورت، جیندے ہوونڑ ساکوں ” کی جانا میں کون؟ دی رمز اساں قیدی تخت لہور دے’ کھول ڈسائی ہے۔ دمان دی اے چنڈ وی کوئی عجب جہان ہے جیندے بارے شمیم عارف قریشی آکھا ہا ایہا او جاہ ہے جیندا دھرتی واس سوجھل ہے اتے ایہا او جاہ ہے جتھاں کھیڈی گئی جھمر اچ رلنڑ آلے پیر اچ ہی نو منڑ بھاگ تھی سگدے۔

اپنڑی نگری آپ وساونڑ دے خاب اچ ٹورن آلا قیدی تخت لہور دا قافلہ 21 مارچ کوں شہر وفا فاضل پور اچ لاہسی ۔ انہاں ضمیر دے قیدیاں دا قافلہ جنہاں کوں ول وسنڑ دا خاب ڈیکھنڑ دے جرم اچ غدار آکھا گئے ، او پنڑی پوتھیاں کھول کے اپنڑی دھرتی نال ہزاراں سال دی جڑت دی گواہی ڈیسی ، انہاں دھرتی جایاں دا قافلہ جنہاں دا ماضی ساڑ کے مستقبل سوا کیتا گئے پر انہاں دی اجتماعی یاداشت کتھائیں قصے اچ کتھائیں شاعری اچ رہ گئی ہے اوں اجتماعی یاداشت کوں کھولنڑ دا منتر اوں جوگی کول ہے جیندے کول آواز تاں رس گئی ہے پر لفظ اپنڑے اظہار دی خیرات منگدن او صوفی اپنڑے ہوونڑ دے تاج سمیت کھولیسی ، انہاں رل مویاں دا قافلہ جنہاں دا وجود دھرتی سمیت پرایا کر ڈتا گئے سوجھل دھرتی واساں دے سڈ تے ساری گواہیاں سمیت موجود ہوسی اتے ایہا او جاہ ہے جتھاں دے ہر قدم اچ نو منڑ بھاگ ہن۔ اے او دھرتی واس ہن جنہاں دا سڈ معتبر ہے جنہاں دا شہر وفا دی علامت ہے جتھاں سڈ کے کوفہ نا بنڑایا ویسی بھل لٹے قافلے دی مہاریاں کوں آدر ڈتا ویسی۔ سنجانڑ دی ایں ساری کربلا اچ اپنڑے ہر جوان خاب توں گھن کے ہر معصوم خاہش تک کو قربان کرنے آلے عاشق خان بزدار کوں اتے ایں سفر دے راہ اچ جیندے ساہ رس گئے عمر علی خان بلوچ کوں سرخرو تھیونڑ تے سوجھل ایوارڈ ڈتا ویسی۔ ایں تحریک وچ جڈاں ایں قافلے دے لوکاں کوں غدار آکھ کے پتھر مارے گئے تاں بہوں سارے لوک ہن جنہاں او پتھر اپنڑے سراں تے جھلے انہاں دی ہمت کوں سوبھ ڈیونڑ سانگے ایں واری اجمل میسن کوں ایوارڈ ڈتا ویسی۔ دنیا اج وی شاعر دا اتبار کریندی ہے۔ او شاعر جیہڑے ایں قافلے اچ نا صرف خود شامل رہے بھل اپنڑی ساری کتھا شاعری اچ لکھدے رہے اے کتھا ایں قافلے دی تاریخ ہے انہاں شاعری اچ تاریخ لکھنڑ آلے روہیلے جہانگیر مخلص ، لوظ کو معتبر کرن آلے مظہر نیازی, چنتے کوں چیٹ کرن آلے منصور شانی کوں ایوارڈ ڈتے ویسن۔
اے ایوارڈ کڈاہیں وی انہاں دی خدمات دا بدل نہیں تھی سگدے لیکن ماضی کوں گھر سڈوا کے مارن دی بجائے آدر ڈے کے بدلنڑ دا آہر ضرور ہے ۔ شاہنواز خان مشوری ، عثمان کریم بھٹہ آتے ساری سوجھل دھرتی واس ایں ماضی کوں بدلنڑ دا شکریہ شہر کوں شہر وفا بنڑاونڑ دا شکریہ ایں قافلے کیتے سبیل لاونڑ دا شکریہ یقیناً ایہا او جاہ ہے جتھاں قیام توں بعد اپنڑی نگری آپ وساونڑ آلا قافلہ اپنڑے دگ دو ہک نوئے جذبے نال روانہ تھیسی 21 مارچ اوں قیام دی رات ہے جتھاں رل باونڑ بھاگ وند ہے جتھاں خاب ڈیکھسوں او خاب جیہڑا سدھ پار دی ڈیسی۔ اوں پار دی، جیندا سارا پینڈا ہک بلانگ تھیسی۔۔
اللہ او اللہ

About The Author

ویب ڈیسک

See author's posts