خاب ۔۔۔ مظہر حُسین

ہیک فیکٹری اچ کم گزران کریندے ہویں، کشے سمجھ نئیں پئی آندی ہوندی جو کیا تھیندا پئے، جیہرا نظام چلدا پئے کیویں چلدا پئے، کوئی کہیں دی ڳالھ نئیں پیا منیندا، بس ہر کوئی آپو آپ لگا پئے،

ہیک کوٹھے اچ پیہنداں جیتھاں کڄھ مزدور کھݙا پئے مریندے ہوندن، اتے ٻہوں تھک چکے ہوندن، انہاں دا ٹھیکدار آہدے، جلدی کرو نتاں پیسے کینا ملسن، میں ونڄ کے انہاں دی مدد سانگے کھݙ مارݨ پوو وینداں، کھݙ مریندیں پتہ لگدے جو ہیٹھو بارود لاتھے اساں ٻاہر نکلدے ہیں تاں پتہ لگدے دہشتگرداں حملہ کر ݙتے،

سارے گودام دکاناں دفتراں دے دروازے بند تھی ویندن، میں ایݙے اوݙیں بھڄدا ودا ہونداں تاں ہیک دہشتگرد آہدے، توں آرام نال ودا رہ اساں تیکوں کڄھ نئیں آہدے، ایویں ماحول بݨیا پیا ہوندے جیویں دہشتگرد پکنک مناوݨ آئے ودے ہوون،

میں کنوں کڄھ سوال وی کریندن، جیہرے میکوں بھل گئین، ہوندے بعد ہیک دہشتگرد ٻیٹھا ہوندے، او میکوں اشارہ ݙیندے جو جلدی لنڳھ ونڄ، میں لنگھ وینداں اڳو ونڄ کے ݙیہداں تاں ہیک دہشتگرد کوں کال آندی اے جو، اوور!

او بندوخ چھوڑ لگا ویندے، ݙو چار ٻلانڳیں تیں رینجر آلے ٻیٹھے ہوندن، انہیں اچو ہیک مولی ہوندے، میکوں ݙیکھ کے بندوخ تڑیندے چا، میں سوچینداں جو دہشتگرداں تاں چھوڑ ݙتے اے کینا چھوڑیسن، ہیک دم، رینجر آلا مولی، کشے پڑھݨ پوو ویندے، اتے میں ہیک دربار ڄہیں مسیت اچ ہونداں ول ݙیہداں جو جُتی کینمی لہائی ودا،

وت ݙر پوندے جو انہاں ݙیکھ ڳھدا تاں کوہ گھتسن، اتھو نکلداں، تاں ہݨ اپݨا گھر لبھیندا ودا ہونداں، کئی ڳلیاں پِھرداں، سڑکاں کچھینداں،گھر لٻھݨ اچ نہ آوے، اڳو ہیک بندہ ڳاݙی کھنائی کھڑا ہوندے، میکوں آہدے بݨا ݙے میں بݨاوݨ پوو وینداں، تاں اتھاں موجود ترے چار ٻئے بندے وی ݙیکھݨ پوو ویندن، او ڳاݙی آلا بندہ ساریں کوں ہیک ہیک سگرٹ ݙیندے، میکوں ݙیندے تاں میں اونکوں آہداں میں کینی پیندا ہوندا، او کھلݨ لگ ویندے آہدے ایݙا وی توں فلاسفر کیہنوے جو سگرٹ نہ پی سڳیں،

اتھو اڳ تیں وینداں تاں ہیک مسیت اچ نماز تھیندی پئی ہوندی اے، نمازی رتو رت ہوندن، مسیت اچ پولیس وی ٻیٹھی ہوندی اے او وی رتو رت ہوندن، جیویں کئی وݙی جنگ دے بعد ہیک ماحول تھی سڳدے، ٻاہر ہیلتھ اتے ٻئے سرکاری محکمیں دے لوک وی زخمی تھئے ٻیٹھے ہوندن،
اڳو تیں وینداں تاں منظر ایویں بݨ ویندے جیویں جام پور ودا ہوواں، ہیک بندہ سیاسی جماعت دا پرچم چئی ودا ہوندے جیہرا رت اچ ٻُݙا ودا ہوندے،

ٻیا بندہ کہیں تریمت دی چُنی چئی ودا ہوندے لوکاں کوں ݙکھیندے ودے ہوندن، ݙو چار چھوکر رت دی ٻالٹی بھری ودےہوندن، او رت میݙے سر اتے منہ تیں ملݨ پوو ویندن، ہیک ٻݙھڑا آہدے وے شرم کرو ہولے دل دا بندہ اے مویا ویسی،
وت میں ڳلیاں اچ وڑ وینداں، او ٻہوں پراݨیاں ڳلیاں اتے ٻہوں پراݨے دور اچ وڑ وینداں، اتے ہݨ آپ کوں محفوظ سمجھ کے بالکل مطمئن تھیا ودا ہونداں

About The Author

ویب ڈیسک

See author's posts