وادی سندھ دا قدیمی ڈی۔این۔اے۔۔۔ مشتاق گاڈی

[ وادی سندھ دا قدیمی ڈی۔این۔اے۔ ہک ننویں جنیٹک پرکھ پرچول]

ستمبر 2019 وچ قدیم وادی سندھ دی ہڑپائی تہذیب دے پیلھے قدیمی ڈی۔ این۔اے دا رزلٹ تے اوندا تجزیہ سامہݨے آئے۔ اے چار ہزار سال پیلھوں ہڑپائی تہذیب دے ہریانہ وچ وسدے شہر راکھی گڑھی وچ دفن ہک تریمت دا ڈی۔ این۔ اے ہے۔ ڄاݨ ہووے جو ساؤتھ ایشیا، خاص کر قدیم وادی سندھ دے ریجن وچ گرمی ٻہوں ہووݨ پاروں کہیں قدیمی ڈی۔ این۔ اے دا حصول وݙا اوکھا ریہہ ڳئے۔ اے پیلھا قدیمی ڈی۔این۔اے ہے جیڑھا صحیح سلامت سائنس دانیں کوں ملے تے جیندی پرکھ پرچول تھئی ہے۔
ایندے کُجھ ابتدائی رزلٹ ٻہوں دلچسپ ہن:
١۔ چار کنیں پنج ہزارسال پیلھون ہڑپہ، موھنجو دڑو تے قدیم وادی سندھ دے وسݨیکیں دا اوں ویلھے تائیں سنٹرل ایشیا نال جنیٹک ۔ نسلی وراثت دا کئی سانگا نہی بݨیا۔

جے سنڑل ایشیا دے سٹیپیں کنیں آریا سݙویڄݨ آلے گروہ آئے وی ہئین تاں او ہڑپہ، موھنجو دڑو تے قدیم وادی سندھ دے مُکݨ پچھوں آئے ہئین۔

٢۔ ہڑپائی تہزیب دے اے لوک ساؤتھ ایشیا دی انجو انج قومیں، ذاتیں تے گروہیں دے سانجھے (نسلی) وارث ہن۔ ایندے وچ انڈو آریائی، انڈو ایرانی، دراوڑ سبھے شامل ہن۔

٣۔ ایں ہڑپائی تہذیب دے قدیمی ڈی این اے نال اے وی ڄاݨ تھیندی ہے جو اُنہیں دی جنیٹکس وچ ٻہوں قدیم ایرانی تے انڈوچینی عنصر دی رَلت ہئی۔ انہیں دا قدیم ایرانیں نال وکھرپ تقریبا ٻارہاں (12) ہزار سال پیلھوں تھیا ہئی۔

٤۔ ایں ریسرچ نال اے وی تصدیق تھی ڳئی ہے جو مہر گڑھ تے اوندے پچھوں ہڑپائی تہذیب وچ رڑھ واہی دی ٹکنیک اتھوں دے لوکیں انطولیا یا مشرق قریب دے علاقیں کنیں نہی سکھی۔ اے ٹیکنیک اتھوں دی آدی واسی تہذیب دے اپݨی تخلیق ہئی۔

٥۔ ایندے نال اے وی ڄاݨ کاری تھئی ہے جو انڈو آریائی زبانیں دا ساؤتھ ایشیا وچ کھنڈرپ انطولیہ، ایرانی پوٹھوہار تے وت ساؤتھ ایشیا دے رستے نئیں تھیا جیویں جو اے نظریہ ہئی جو انہیں علاقیں کنیں پراݨے رڑھ واہ ( فارمرز) ساؤتھ ایشیا آئے ہوسن تے انہیں نال انڈوآریائی ٻولیاں وی کھنڈریا ہوسن۔ وݙا امکان ایہو ای بچ ویندے جو اے مشرقی یورپ تے سنٹرل ایشیا دے رستے ساؤتھ ایشیا وچ 1500 قبل مسیح دے نیڑے تیڑے کھنڈیاں ہوسن۔ اے ٹیکنیک اتھوں دی آدی واسی تہذیب دے اپݨی تخلیق ہئی۔

About The Author

ویب ڈیسک

See author's posts