اے پی پی دیاں سرائیکی خبراں

وزیر اعظم عمران خان دی زیر صدارت وفاقی کابینہ دا اجلاس

اسلام آباد ۔ 28 جنوری (اے پی پی) وفاقی کابینہ دا اجلاس شروع تھی گے ۔ وزیر اعظم آفس دے میڈیا ونگ دی طرفوں جاری بیان دے مطابق وزیراعظم عمران خان وفاقی کابینہ دے اجلاس دی صدارت کریندے پن ۔

وفاقی وزیر بین الصوبائی رابطہ ڈاکٹر فہمیدہ مرزا نال پاکستانی نژاد کینیڈین پارلیمنٹیرین سلمہ عطاءاللہ جان دی ملاقات

اسلام آباد ۔ 28 جنوری (اے پی پی) وفاقی وزیر بین الصوبائی رابطہ ڈاکٹر فہمیدہ مرزا آکھیے جو وزارت بین الصوبائی رابطہ دی طرفوں تریمتاں دی کھیڈاں اچ شرکت کیتے اقدامات کیتے گن تے تریمتاں دے کھیڈاں اچ شرکت نہ صرف ملکی بلکہ عالمی سطح تے وی بہوں اہمیت دی حامل اے ۔اے گال انہاں منگل کوں پاکستانی نژاد کینیڈا دی پارلیمنٹیرین سلمہ عطاءاللہ جان نال ملاقات اچ آکھی اے ، انہاں سینیٹر سلمہ دی تریمتاں کوں بااختیار بنڑاونڑ دیاں کوششاں دی تعریف کریندے ہوئیں آکھیے جو تساڈی پاکستان آمد تے اساکوں دلوں خوش تھئی اے تے تریمتاں دی سیاسی میدان اچ کردار اچ مدد ڈیونڑ کیتے انہاں دیاں کوششاں کوں منیندوں ۔ وفاقی وزیر تریمتان کوں بااختیار بنڑاونڑ تے انہاں دے حقوق کوں ترجیح ڈیونڑ کیتے وزارت ولوں چاتے ونجنڑ آلے سارے اقدامات بارے سینیٹر کوں ڈسایا ۔انہاں آکھیا جو وزارت بین الصوبائی رابطہ دی طرفوں تریمتاں دی ساریاں کھیڈاں اچ شرکت کیتے ہمیشہ توں اقدامات کیتے گن تے تریمتاں دی کھیڈاں اچ شرکت نہ صرف ملکی سطح تے بلکہ عالمی سطح تے وی بہوں اہمیت رکھیندی اے ۔وفاقی وزیر پاکستان اچ معاشی ترقی کیتے تریمتاں دے کردار دی اہمیت تے روشنی پاتی تے آکھیا جو نہ صرف معاشی ترقی کیتے تریمتاں دا کردار بہوں اہمیت رکھیندے بلکہ سیاسی تے سماجی سطح تے وی بہوں اہمیت اے ۔ڈاکٹر فہمیدہ مرزا سینیٹر کوں ڈسایا جو موجودہ حکومت تریمتاں دے حقوق تے انہاں کوں بااختیار بنڑاونڑ دے حوالے نال بہوں سارے اہم قوانین بنڑائن ۔

نیول چیف ظفر محمود عباسی دا سری لنکا دا دورہ

اسلام آباد ۔ 28 جنوری (اے پی پی)نیول چیف ایڈمرل ظفر محمود عباسی سری لنکا دے سرکاری دورے تے سری لنکا دے وزیراعظم ، مسلح فوج دے سربراہیں تے وزارت دفاع دے حکام نال انجھ انجھ ملاقاتاں کیتیاں جیں اچ سانجھے دلچسپی دے امور تے ڈو پاسے بحری تعاون دے ودھارے تے گال مہاڑ کیتی گی ۔ ترجمان پاک بحریہ دے مطابق نیول ایڈمرل ظفر محمود عباسی سری لنکا دے سرکاری دورے تے ہن ۔دورے دے دوران انہاں سری لنکا دے وزیر اعظم نال خصوصی ملاقات کیتی ،انہاں سری لنکا دی مسلح فوج دے سربراہیں تے وزارت دفاع دے حکام نال وی انجھ انجھ ملاقاتاں کیتیاں ۔ مسلح فوج دے ہیڈ کوارٹر آمد تے نیول چیف کوں گارڈ آف آنر پیش کیتا گیا ۔ ملاقاتاں اچ سانجھی دلچسپی دے امور تے ڈو پاسے بحری تعاون تے گال مہاڑ کیتی گی ۔نیول چیف سمندری دہشت گردی دے تدراک تے خطے اچ سمندری تحفظ کوں یقینی بنڑاونڑ کیتے پاک بحریہ دے عزم کوں اجاگر کیتا ۔ سربراہ پاک بحریہ سری لنکا دی مختلف بحری تنصیبات دا وی دورہ کیتا جتھاں انہاں کوں آپریشنل امور تے بریفنگ ڈتی گی ۔ نیول چیف دا اے دورہ ڈوہیں ملکاں خاص طور تے بحری فوج وچال تعلقات کوں مزید ودھارا ڈیسی ۔

پاکستان کوں ڈیکھنڑ آلی ہر میلی اکھ پھوڑ ڈیسوں ،ملکی معیشت بہتری دے پاسے ٹردی پئی اے ،وفاقی وزیر داخلہ اعجاز احمد شاہ

ننکانہ صاحب ۔ 28 جنوری (اے پی پی) وفاقی وزیر داخلہ اعجاز احمد شاہ آکھیے جو ملکی دفاع مضبوط ہتھاں اچ اے ، پاکستان ڈے ڈیکھنڑ آلی ہر میلی اکھ پھوڑ ڈیسوں ، ملکی معیشت بہتری دے پاسے ٹردی پئی اے ۔اے گال انہاں اتھاں مختلف میونسپل اتے ٹاﺅن کمیٹیاں دے نویں منتخب عہدیداراں دی تقریب حلف برداری نال بطور مہمان خصوصی خطاب کریندے ہوئیں آکھی اے ۔تقریب اچ پاکستان تحریک انصاف سنٹرل پنجاب دے صدر اعجاز چوہدری وی موجود ہن ۔ تقریب نال خطاب کریندے ہوئیں وفاقی وزیر داخلہ آکھیا جو حکومت دے اقدامات پاروں ملکی معیشت بہتری دے پاسے ٹردی پئی اے ۔ بھارتی آرمی چیف دیاں تڑیاں دی حیثیت جیرھے ،گجدن او وسدے کائنی دے مترادف اے ۔انہاں آکھیا ملکی دفاعی مضبوط ہتھاں اچ اے پاکستان ڈے ڈیکھنڑ آلی ہر میلی اکھ پھوڑ ڈیسوں ،انہاں آکھیا جو کارکنان پاکستان تحریک انصاف دا قیمتی اثاثہ ہن انہاں دے مسلیں دے حل کیتے اقدامات کریسوں ، مفاد پرست عناصر دی طرفوں ملک اچ اٹے دا مصنوعی بحران پیدا کرنڑ دی کوشش کیتی گی اے جیرھا جو وختی حکومتی اقدامات پاروں ناکام تھی گئی اے ۔ وزیر اعظم عمران خان دی قیادت اچ پاکستان کوں پر امن،ترقی یافتہ اتے خوشحال ملک بنڑاونڑ دا سفر جاری رکھیسوں ۔

تریمتاں کوں شفاف انداز اچ بائیو میٹرک تصدیق تے اے ٹی ایم دے ذریعے ادائیگیاں کیتاں ویندیاں پن ، ڈاکٹر ثانیہ نشتر

اسلام آباد ۔ 28 جنوری (اے پی پی) بینظیر انکم سپورٹ پروگرام (بی آئی ایس پی) دی چیئرپرسن ڈاکٹر ثانیہ نشتر آکھیے جو بینک الفلاح پشاور دے شوبہ بازار برانچ اچ کفالت دے تحت متعارف کیتے گے ڈیجیٹل ادائیگیاں دے نظام داجائزہ گھدا گے جتھاں غریب لوکاں کوں ادائیگی کیتی ویندی پئی اے ۔منگل کوں اپنڑے ہک ٹویٹ اچ انہاں آکھیے جو تریمتاں کوں پروقار تے شفاف انداز اچ بائیو میٹرک تصدیق تے اے ٹی ایم بینک برانچ دے ذریعے ادائیگیاں کیتیاں ویندیاں پن ۔

آندے 24گھنٹے ملک دیاں کجھ جہیں تے مینھ وسنڑ تے پہاڑاں تے برف پوونڑ دا امکان اے ، محکمہ موسمیات

اسلام آباد ۔ 28 جنوری (اے پی پی) محکمہ موسمیات دے مطابق آندے 24گھنٹے اچ شمال مشرقی پنجاب ، اسلام آباد، اتلے خیبر پختونخوا، کشمیر اتے گلگت بلتستان اچ وقفے وقفے نال مینھ وسنڑ تے پہاڑاں تے برف پوونڑ دا امکان اے جڈاں جو ملک دے بئے علاقیں اچ موسم ٹھڈا تے رکھا رہسی ۔ رپورٹ دے مطابق گزریل 24 گھنٹے اچ پنجاب، بلوچستان اتے کشمیر دے کجھ ضلعیں اچ مینھ وسیا تے ایں دوران مری اچ برف باری وی ریکارڈ کیتی گی جڈاں جو ملک دے بئے حصیں اچ موسم ٹھڈا تے رکھا رہیا ۔گزریل 24 گھنٹے اچ جھنگ اچ 32 ملی میٹر، فیصل آباد 23 ، اوکاڑہ 20، ساہیوال 17 ، ٹوبہ ٹیک سنگھ 16، حافظ آباد 13، لاہور 12، گجرات 10، سرگودھا 9، منڈی بہاﺅالدین 8، بہاولنگر 7، چکوال، گوجرانوالہ، قصور، مری 5، اسلام آباد 4، جہلم، منگلا، جوہرآباد 4، نارووال، نورپورتھل، کوٹ ادو 3، سیالکوٹ 3، راولپنڈی 2، کوئٹہ 7، قلات 4، بارکھان 3، کوٹلی 4 اتے راولاکوٹ اچ ہک ملی میٹر مینھ وسیا ۔اینویں مری اچ2 انچ برف ریکارڈ کیتی گی ۔ منگل کوں ریکارڈ کیتے گے گھٹ توں گھٹ درجہ حرارت دی رپورٹ دے مطابق سکردو اچ درجہ حرارت منفی18 ڈگری سینٹی گریڈ، بگروٹ، پارا چنار منفی 11، گو پس، کالام، استور منفی 10، مالم جبہ منفی 4، گلگت اتے قلات اچ منفی 3 ڈگری سینٹی گریڈ ریکارڈ کیتا گے ۔

قومی اسمبلی دی قائمہ کمیٹی اطلاعات و نشریات دی ذیلی کمیٹی دا اجلاس خمیس کوں تھیسی

اسلام آباد ۔ 28 جنوری (اے پی پی) قومی اسمبلی دی قائمہ کمیٹی اطلاعات و نشریات دی ذیلی کمیٹی دا اجلاس کل ( 30جنوری) کوں پارلیمنٹ ہاﺅس اچ تھیسی ۔اجلاس اچ میڈیا پرسنز دی حفاظت کیتے تجویزاں تیار کیتیاں ویسن ۔اجلاس دی صدارت ذیلی کمیٹی دے کنوینر سید امین الحق کریسن۔

سینٹ دی قائمہ کمیٹی اطلاعات و نشریات دا اجلاس اج تھیسی

اسلام آباد ۔ 28 جنوری (اے پی پی) سینٹ دی قائمہ کمیٹی اطلاعات و نشریات دا اجلاس اج بدھ کوں پارلیمنٹ ہاﺅس اچ تھیسی ۔اجلاس دی صدارت چیئرمین کمیٹی سینیٹر فیصل جاوید کریسن ۔ اجلاس اچ پرائیویٹ میڈیا دے صحافیاں اتے میڈیا ورکرز کوں تنخواہیں تے بقایا جات دے عدم ادائیگی ، پی ٹی وی تے مساوی نمائندگی اتے الیکٹرانک میڈیا تے پیپلز پارٹی دی قیادت دی مبینہ کردار کشی دے توجہ کراﺅ نوٹس تے بحث کیتی ویسی ۔ایم ڈی پی ٹی وی ادارے دے حوالے نال کمیٹی کوں بریفنگ ڈیسن ۔

چین اچ کورونا وائرس نال ہلاکتاں دی تعداد 106 ، 1300نویں کیس سامنڑے آگن

ووہان ۔ 28 جنوری (اے پی پی) چین اچ خطرناک کورونا وائرس نال ہلاکتاں دی تعداد 106 تئیں پج گئی اے جڈاں جو وائرس توں متاثرہ 1300نویں کیس سامنڑے آگن ۔ چین کورونا وائرس دے کھنڈنڑ کوں روکنڑ کیتے اقدامات دے تحت اپنڑے شہریاں باہرلے ملک دا سفر ملتوی کرنڑ تے زور ڈتے ۔ایں حوالے نال نینشنل امیگریشن ایڈمنسٹریشن ڈسائے جو سفری تجویز چینی اتے غیر ملکیاں دی صحت تے انہاں دے تحفظ کیتے جاری کیتیاں گن ۔

ایران نال ڈو پاسے مذاکرات ٹرمپ دی بھُل اے ، ایرانی وزیر خارجہ

تہران ۔ 28 جنوری (اے پی پی) ایرانی وزیر خارجہ ایران نال ڈو پاسے مذاکرات کوں ٹرمپ دی بُھل قرار ڈیندے ہوئیں آکھیے جو مذاکرات دا ہکو رستہ جوہری معاہدے توں پہلے دی صورت حال اچ واپس آونڑ اے ۔ایران خبر رساں ادارے دے مابق اے گال جواد ظریف گزریل ڈینھ اپنڑے ٹویٹ اچ آکھی اے ۔انہاں آکھیے جو امریکی صدر ڈونلڈ ٹرمپ کوں خارجہ پالیسی فیکس نیوزدیاں خبراں تے نی بلکہ باہرلے حقائق دی روشنی اچ بنڑاونڑیں چاہیدی اے ۔ایرانی وزیر خارجہ ایندے توں پہلے آکھیا ہئی جو ٹرمپ کوں ماضی دیاں غلطیاں دی اصلاح کرنڑیں چاہیدی اے تے ایران دے خلاف پابندیاں کوں مکا تے مذاکرات دی میز تے واپس آونڑاں چاہیدے ۔

امریکی دباو دے باوجود ایران اتے روس دے درمیان تعلقات ترقی دے رستے تے ٹردے پن، ایرانی صدر

تہران ۔ 28 جنوری (اے پی پی) ایران دے صدرحسن روحانی آکھیے جو ایران دے خلاف امریکی دباو دے باوجود ایران اتے روس دے درمیان تعلقات، ترقی دی رستے تے ٹردے پن ،۔ایران خبر رساں ادارے دے مطابق اے گال انہاں ایران دے دورے تے آئے ہوئے روسی پارلیمنٹ دوما دے سربراہ ویچسلا والودین نال ملاقات کریندے ہوئیں آکھی اے ۔انہاں آکھیے جو ڈوہیں ملکاں وچال تعلقات دے ودھارے اچ پارلیمنٹ دے کردار دی اہمیت تے زور ڈتے ۔صدر روحانی مزید آکھیا جو ایران تے روس دے درمیان طے پاونڑ آلے معاہدیں دا مرحلہ وار نفاذ تھیونڑ ویندا پئے تے ایں حوالے نال ڈوہیں ملکاں دی پارلیمان تعمیری کردار ادا کرسگدن۔

About The Author

ویب ڈیسک

See author's posts