ہال لوکاں نال بھریجݨ لڳ پیا شادی ہال اچ بڑا سٹیریو ٹائپ ماحول ہائی ۔اگلی قطار اچ صوفے لڳے پائے ہن تے پچھوں آلی قطار اچ رتاں کرسیاں لاتھیاں ہن۔
سامݨے بینر ٹنگیڃ ڳیا تے لوک کرسیں تیں نہ باہون بلکہ ایویں ٹولیں ٹولیں اچ کھڑ کے ڳپاں لائی کھڑے ہوون۔اندرو آون وت ٻاہرو ونڃن حالانکہ پروگرام دا ٹائم ڈو وجے دا ہا پر اتھاں چار وڃ ڳئے پر مارکا باہوݨ دا ناں نہ گھنن۔
ایں دوران میں ڈٹھے مظہر خاں تے امیر زادہ وی ہال اچ ان وڑن۔مظہر خان میڈا بہوں پراݨا سونہاں حے تے ہݨ بزرگ حے۔ایندو ڈیکھو تے پہلا تاثر ایہو ملسی جو بس جوان دردیں دا ماریا ودے، ہیک نماݨی جہیں سنجیدگی چہرے تیں ہر ویلھے سجائی ودا ہوسی تے دل ہی دل اچ سوچیندا ودا ہوندے جو میں جتنا سرائیکیں واسطے کم کیتے سرائیکیں اتنا آدر نئیں ڈتا۔
میکوں ایویں لگدے جو ہر انسان دی زندگی اچ ڈو چار اینجھے مغالطے ضرور ہوندن جیندی وجہ کولو او سمجھی ودے راہندن جو ساکوں ساڈا اصلی مقام یا رتبہ نئیں ملیا تے اے ہاولیں ہاولیں انہاں دے مزاج تے چہرے تیں پینٹ تھی ویندے تے او باقی زندگی ہیک عجیب جہیں خود ترسی دے فریب اچ گزار ڈیندن۔
گالہیں کولو گالہیں ٹر پیاں تے امیر زادے میڈے کولو پچھیا جو کتاب کتھو ملسی ، میں فورا کتاب امیر زادے کوں پکڑوا کے آکھیا اے گھن گودا ایہا کتاب حے۔امیر زادے سوالیہ قسم دی کریوسٹی نال کتاب کوں ڈٹھا تے آکھس اے کتاب پہلے وی چھپی ہائی ایکوں اکرم گرماݨی ہوراں چھاپیا ہائی او تاں کھتڑ جیہاں کتابچہ ہائی پر ایں کتاب دا فانٹ موٹا حے تے ہن ایندی لک چنڳی حے پر مواد اوہو حے۔
میں گالھ کوں سمجھ گیا جو امیر زادہ کیرھی فریکوئینسی کولو الویندا پائے۔ایں دوران مظہر خان وی کتاب کوں ڈٹھا تے آکھس اے تاں اوہا کتاب حے جیرھی ” اساں” چھاپی ہائی۔
میکوں ایویں لگا جیویں ایں نویں کتاب دی کوئی اہمیت کائینی بس کتاب اوہا ہائی جیرھی پہلے چھپی ہائی۔انسانی نفسیات دے کئی ہزار پہلو ہوندن تے ہیک نشابر پہلو اے وی ہوندے جو بندہ اپݨی نفسیاتی کسمپرسی دے ہتھوں ہاولیں ہاولیں دفن تھیندا پیا ہوندے۔
ایں نفسیاتی کسمپرسی دی حالت اچ ٻائے دے کم کوں فورا کہیں سازشی تھیوری یا ذاتی فائدے دے عکس اچ بند کر کے ڈیکھݨ دا رویہ ساڈی سوچ دا ہیک لازمی جز بݨ ویندے۔
چہ مگوئیاں ، اڈو دی گالھ اڈو دی گالھ۔احسن واگھا ، شاکا گاڈی،شاکے دا ساؤرھا ایویں بے ربط تے بے ترتیب گالہیں میڈے کنیں اچ آوݨ پائے ڳیاں۔ہر ادھورے فقرے دے پچھو تہاڈیاں نجی محفلیں دا اثر ہوندے تے انہیں نجی محفلیں اچ وفاداری استوار کرݨ سانگے ہیک خاص قسم دا بیانیہ وی جنم گھندے جیرھا کہیں وی خطے دے لوکیں دی گروپنگ اچ وڈا اہم کردار ادا کریندے۔
چاہندے نہ چاہندے ہوئیں وی موجود بندے دا دماک اوں بیانئے دا شکار تھی کے اپݨا آپ نشابر کرن دا شکار تھی ویندے کیوں جو ہر بندے دے دل اچ اے گمان ضرور ہوندے جو او سب کجھ جاݨ دے تے او باخبر حے۔
ایں محفل اچ میڈی اندر دی ذات میکوں انگل ڈتی تے میں وی آکھن پائے گیا جو اے کتاب پوری کائینی۔ایں فقرے اچ کوئی بیمانی یا شیطانی جہیں ضرور ہائی جیندے سواد دی چس حاضرین وی چاتی۔ وت میں مزید گرگرا تھی گیا تے آکھیم مرو اے استاد فدا حسین گاڈی دی ڈوجھی نسل دی ملکیت حے تے ہالی تریجھی نسل تک وی ویسی۔ایویں کھل دا ٹھکارا آیا تے میڈے اندر دا پڳلپ مزید باہرو آ ڳیا تے میں گالھ کوں مزید اڳاں ٹور کے آکھیا ہالی تک استاد دے کجھ خطوط اینجھے ہن جیرھے صرف واگھا صاحب کولو ہن او انہاں دی تریجھی نسل چھاپ کے ساڈے اتیں ہیک ٻیا احسان کریسی تے استاد دی لیگیسی اوں گھر اچ ہی راہسی۔وت کھل دا ٹھکارا تے ساڈی چپ۔
اساں کارروائی پا کے مزید بے چین تھی گیوسے تے ایں دوران شاکا ہال اچ ٹردا پھردا میڈے نال آلی کرسی تے ان ٻیٹھا۔ایویں چپ چپ تے مونجھا مونجھا۔میں شاکے دو ڈٹھا تے آکھیا مرشد خیر تاں حے ؟
شاکے وت ترنت ولدا ڈتا جو تیڈے آلا کم تھیا ودے ساڈے نال۔اے فقرہ کہیں کوں اندرو پھرولݨ واسطے ٻہوں ہی کارگر تے بے باک جیہاں فقرہ حے۔میں آکھیا او کیویں؟
شاکے اپݨی مخصوص کھل دے انداز اچ جواب ڈتا جو ساکوں وی عشق تھیا ودے تے گالھ کوں اگاں ٹوریندیں ہوئے آکھس جیویں تائیں ” زلفی دی ہٹی ” اچ محبت دا نقشہ چھیکے ساڈی وی کجھ اوہا حالت حے۔
شاکے دے عشق آلی ڳالھ ادھوری رہ ڳئی کیوں جو وت کوئی ٻیا سونہاں آ گیا تے شاکا اوندے نال حال احوال کرݨ لڳ پیا۔ایں دوران عاشق خان بزدار اپݨے قافلے سمیت ہال اچ داخل تھیا تے ساریں اوکوں سلام کیتا۔
عاشق خان دے آوݨ نال ماحول اچ خواہ مخواہ دی سنجیدگی پھیل ڳئی۔کجھ لوک حد کولو زیادہ سنجیدہ تے معتبر لگدن تے مہرے آلے دا اے جوان وی انہاں کرداراں وچو حے جیندے بارے کوڑیاں سچیاں گالہیں ساڈے وسیب اچ ٻہوں ورتایاں ویندن۔۔
انہاں گالہیں دا ذکر اگلے حصے اچ کریسوں۔
About The Author
اے وی پڑھو
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر
موہری سرائیکی تحریک دی کہاݨی…||ڈاکٹر احسن واگھا