"اسٹریلیا دے موئیاں نانویں”۔۔۔ حسن مرتضی

پر ایں دفعہ وکھرا ظلم تھئے
اسٹریلیا دی وسوں تے گگدام
انسانیں دی پیدواری جہنم اچ
سڑ سڑ تے مردے رہیے

خدا ستویں آسمان تے پرلے پاسوں
حوریں دے مقابلہ حسن دے فیصلے اچ
رجھیا رہیا
کݨ مݨ دا فرشتہ حکم دی تانگھ اچ ہا
سبھ توں زیادہ کافر مارݨ آلے کیتے
مقابلہ حسن دی فاتح حور
چݨن توں بعد

حکم آیا
جے تک کینگرو اتے جنگلی گھوڑے
بغیر نکاح دے نسل ودھاوݨ دے جرم پاروں
معافی نئیں منگدے
جے تک جنگلی بکریاں
نماز استسقا نئیں پڑھدیاں
او تک مینہ نئیں وساوݨاں

نظمیں دا خدا وی
نماز استسقا دے باجھوں
اپݨے اتے لکھیاں ہویاں نظماں دے
جنگل اچ بلدی بھا
اپݨے نور دی کݨ مݨ نال
نئیں وسمینداں
پر ملحد نظماں
نماز استسقا نئیں پڑھ سگدیاں