آصف زرداری نال نفرت ،سانجھی نفسیاتی بیماری دی ہک علامت تے اوندی پروجیکشن ، مشتاق گاڈی

پیلھے میں سمجھدا ہم جو اے نفرت ریاستی تے کارپوریٹ میڈیا دے ساندوراند پروپیگنڈے دا نتیجہ ہے جیڑھا پچھلے کئی ݙہاکیں کنیں ایں مُلک وچ چلدا پئے۔ ہُݨ میکوں لڳدے اے نفرت پروپیگنڈے کنیں ودھ ساݙی کہیں وسیبی سانجھی بیماری دی ہک علامت ہے۔

جݙاں ہٹلر کوں ورلݙ وار سیکنڈ وچ شکست تھئی تے نازی ازم دا زور ترٹا تاں وت یورپ دے نفسیات دانیں فاشزم دی ماس سائیکالوجی اُتے سوچݨ شروع کیتا۔ ایں کنیں پیلھوں نفسیاتی بیماری انفرادی سمجھی ویندی ہئی۔ او ایں نتیجے اُتیں پُجے جونفسیاتی تے جذباتی وڳاڑ کݙاھیں کݙاھیں سانجھی وسیبی روپ وی گھن ویندن۔ کہیں ہک علامت کوں گھن کنیں نفرت دی سانجھی پروجیکشن اوندے اُتے کیتی ویندی ہے۔ اینویں ای کہیں ہک علامت کوں قربانی دا ٻکرا سمجھ کنیں وی سانجھی نفرت دا نشانہ بݨایا ویندے، ایں سانجھی علامتی نفرت نال او وسوں تے وسیب اپݨے آپ نارمل سمجھدے۔ ویلیم رائڄ جہیں کُجھ نفسیات دانیں تاں ایں سانجھی نفرت کوں مڈل کلاس دی مذہبیت تے جنسی گھٹن نال وی جوڑے۔ اڄ دا پاکستان دوغلے پن، جنسی گھٹن تے نفرت دا گڑھ ہے تے فاشزم دیاں ابتدائی علامتاں ڈھڳ ہن۔

جے ڳالھ لُنڈی کروں تاں میکوں آصف زرداری دے خلاف اے نفرت اوندی ذات تے کرت کار نال گھٹ تے سانجھی نفسیاتی بیماری دی ہک علامت ودھ ڄاپدی ہے۔ اینجھی نفسیاتی بیماری جیندے وچ اپݨے آپ کوں چنڳا سمجھݨ کیتے ہک نفرت دی علامت دی لوڑھ ہوندی ہے۔ اپݨے آپ کوں نارمل تے چنڳا سمجھݨ کیتے نفرت دی ہک ساندرو راند پروجیکشن چاہیدی ہوندی ہے۔