” او جیڑھے کرم وچ اَکرم تے اَکرم وچ کرم ݙیہدن، او سبھ توں ودھ سیاݨے ماھݨو ہن۔” (بھگوت گیتا)
مُڑ مُنڈھو قدیم سندھ ہند دے فلسفے۔ درشن وچ کرم تے اَکرم (ایکش اینڈ نان ایکشن ) دا سوال ٻہوں بݨیادی ریہہ ڳئے۔ ساݙا جیوݨ کرمیں دا پھل ہوندے، ایں ڳالھ دی سُدھ ٻُدھ ٻہوں پیلھے کنیں سندھ ہند دے ماھݨو کوں آ ڳئی ہئی۔ بھل مہابھارت دے پچھوکڑ وچ لکھی بھگوت گیتا ایں سوال دا سَتت کڈھ کنیں رکھ ݙیندی ہے۔ ایں کیتے بھگوت گیتا کوں ‘کرما یوگا’ دا ناں وی ݙتا ویندے۔ اے کرم تے اَکرم دی دوئی کوں پلٹا کنیں انہیں کوں ننویں اَرتھ ݙیندی ہے۔
بھگوت گیتا وچ کرم یوگی دی سُنڄاݨ دیاں کُجھ نشانیاں ہن۔ اݨ موہا ہووݨ، دھرتا تھیوݨ، کرم کوں اوندے پھل کنیں انج تے وکھرا کر ݙیکھݨ، ست دی سُنڄاݨ کرݨ، بھکتی پالݨ اتیں، سبھ توں ودھ، کرم وچ اَکرم تے اِکرم وچ کرم دی پچھاݨ کرݨ کہیں کرم یوگی دیاں مہا نشانیں ہن۔
میکوں آصف علی زرداری وچ اے سبھیں نشانیاں ملدن تے او ہک اڄوکا کرم یوگی ڄاپدے۔ اپݨے جیوݨ دے تیرھاں کنیں ودھ وریہے جیل وچ گُذار آصف علی زرداری اݨ موہا تے دھرتا ہووݨ دی کلا ڄاݨی ہے۔ ہک سچے پریمی وانگ بے نظیر بھٹو دی اوندے جیوݨ تے موت پچھوں بھکتی کیتی ہے۔ ہمیش ست پال ریہے ڳئے۔ ایں سبھ توں اُتر، اوں اپݨے پورے جیوݨ ملامت دی ہک باری پنڈ وی اپݨے سر چاتی رکھی ہے۔
اوندی کرم تے اَکرم دی بھنڄ دی سُنڄاݨ ٻہوں پیلھوں کنیں نُشابر ہئی پر ایندے اُتے مُہر اوندے ایں فیصلے لائی ہے جو اڄاں میں عدالت کوں اپݨی ضمانت کیتے کئی درخواست نئیں ݙیوݨی۔ ڄاپدے او اپݨے اَکرم کوں ای کرم بݨاؤ ہے. کتھائیں اونکوں ایں ڳالھ دا پک ہے جو پاکستان دی اڄوکی مہا بھارت وچ سبھے کرمی اپݨا کروپ تے گندپ ہک ہک کر کنیں ݙکھیسن تے بچسی کلہا اََکرمی۔
About The Author
اے وی پڑھو
اشولال: دل سے نکل کر دلوں میں بسنے کا ملکہ رکھنے والی شاعری کے خالق
ملتان کا بازارِ حسن: ایک بھولا بسرا منظر نامہ||سجاد جہانیہ
اسلم انصاری :ہک ہمہ دان عالم تے شاعر||رانا محبوب اختر