عادل پیر دا عدل ۔۔۔۔

غضنفرعباس

(روایت مختلف مریدیں دی زبانی)
متھ
آہدن عادل پیر دے پتر سیدن امام ہک ڈینہہ شکار تے گئے انہاں ہک ہرن تے نشانہ بدھیا ہرن اگوں تے ٹر گیاتے سیدن امام دے ہتھوں کمان اچوں نکھتا تیر ہک نینگر کوں ونج لگا اوں نینگر دی بیوہ ماء فریاد گھن انصاف سانگے عادل پیر دو لنگھ گئی
سیدن امام کوں پتہ لگا جو مقتول دی ماء انصاف سانگے عادل پیر کول گئی ہے تاں سیدن امام بھج پئے
عادل پیرماء دی فریاد سن سیدن امام کوں نپن سانگے اوندے نال وگ روانہ تھئے
سیدن امام ہک جاہ تے پُنے تاں ہچھوں گھوڑیاں دا ٹاپاں سن بھوئیں کول پناہ منگیونے بھوئیں پھٹی آپ وچ چلے گئے عادل پیر تے مقتول نینگر دی ماء اے منظر ڈیکھ گھدا ہا
مقتول دی ماء آکھیا میں اپنے پتر دا قتل معاف کریندی ہاں
عادل پیر فرمایا انصاف تھی گئے تیڈے مقتول پتر دا بدلہ پورا تھئے
ہک روایت اے وی ہے جو سیدن امام ہک ون کول پناہ منگی ہئی ون دا مُنڈھ شق تھیا تے سیدن امام وڑ گئے ون دا منڈھ واپس مل گیا سیدن امام دے چولے دا پاند باہر رہ گیاعادل پیر پتر دے چولے دا پاند سنجان کے ون کپن دا حکم ڈتا ون کٹ ڈتا گیاتے سیدن امام کوں دفنا ڈتا گیا
شاہ صدر دین دے واسی شاہ نواز موجب
ہک مائی دا لیلا پیر عادل دا پتر مار کے کھا گیا تے اوں مائی پتر دے وٹے عادل شاہ سئیں دا پتر منگ گھدا
عادل سئیں اپنے پتر کوں ذبح کرڈتا ہا
میڈے سنگتی ولوں پیر عادل سئیں بارے ولدا

جانی پیر عادل سرکار دا ناں سید غیاث الدین ہے,عدل پاروں پیر عادل مشہور ہن,ساڈے خاندان دے جدِ امجد ہن,پیر عادل سرکار دے سجادہ نشین پیر ہاشم شاہ میڈے ڈاڈے دے سکے مُلیر ہن,,,پیر عادل سرکار اوں بڈھڑی کوں لیلا وی جرمانے اچ ڈیوڑاں چاہندے ہن بھلا بڈھڑی راضی نہی تھیندی اوں آکھا ہئ جیویں میڈی نونہہ رنڈڑ تھئ ہے تو جیکر عادل ہیں تاں آپڑیں نونہہ وی ایویں رنڈڑ کر,,,زیادہ معتبر متھ ایہا ہے تے ساڈے خاندان اچ وی ایہا مشہور ہے.

ایں واقعے توں بعدعادل پیر سرائیکی وسوں اچ عدل کرن والے مہان صوفی مشہور تھئے
————
عادل تے پران،جیوے سیدن امام
دری شاہ عادل پیر ،انڈس ہائی وے دیرہ غازی خان اچ واقع ہے ۔ سخی عادل پیر دا مزارانڈس ہائی وے توں لگ بھگ پنج کلومیٹر پوادھ یعنی مشرق آلے پاسے ہے۔

تصاویر:سید مزمل حسین گیلانی ، غضنرعباس

About The Author

غضنفر عباس

Ghazanfar Abbas is a Senior Journalist. He started his career as a Practical Journalist in Seraiki Language Newspapers and Magazines in 1999. He worked as Reporter/Sub Editor in Daily Khabrain Multan from 2001 to 2006. was Bureau Chief/ Station Head Rohi Tv Multan from 2007 to 2010, he was also Outsourced Contributor for BBC Urdu Service from 2010 to 2015. He also worked in Geo News Islamabad as Senior Assignment Editor from 2015 to 2019. He is serving as Senior Assignment editor in Hum News Islamabad and also Editor of the regional news portal DailySwail.com. He tweets at @ghazanfarAbbass

See author's posts