لائف کا ہر شمارہ ہی خاص ہوتا تھا ۔۔۔۔||مبشرعلی زیدی

میرے پاس لائف کا 5 جنوری 1948 کا یہ شمارہ موجود ہے جس کے سرورق پر قائداعظم کی تصویر ہے۔ اندر 9 صفحات پر پاکستان کا ذکر اور تصاویر ہیں۔ مضامین کی فہرست کے ساتھ یہ نوٹ درج ہے:

اس ہفتے لائف کے سرورق سے باہر جھانکنے والی یہ سلگتی، بوجھل آنکھیں ایک بیمار بزرگ کی ہیں جو نئے لیکن اپنی ہی طرح بیمار ملک کے حکمران ہیں۔ پانچ ماہ پہلے پاکستان کے گورنر جنرل بننے کے وقت سے ہی 72 سالہ محمد علی جناح کی صحت گررہی ہے۔ وہ اس وسیع مسلمان ریاست کا انتظام نہیں سنبھال پارہے جس کے قیام کے لیے انھوں نے طویل جدوجہد کی۔ حال میں وہ اپنی کابینہ کے وزرا تک کو دستیاب نہیں رہے اور صرف ان کی بہن فاطمہ جناح ان کی دیکھ بھال کرتی رہیں۔ لیکن پاکستانیوں کے لیے وہ اب بھی قائداعظم ہیں اور قوم کا مستقبل ان کی پالیسیوں کے ہونے، یا نہ ہونے پر منحصر ہے۔