اکتوبر 28, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

کھںٻیاں پارٹیاں تے ہیلن آف ٹرائے

اچھا ساندرا توں ڈس تیں چوکھی دنیا ڈٹھی ہے ۔۔پچھیم تاں ساندرا ڈسیاجو میں ایشیا وچوں چین ۔عراق تے ہانگ کانگ افریقہ وچوں ڳھانا ۔تنزانیہ تے کینیااتے لاطینی امریکہ وچوں برازیل ۔ارجنٹائن ۔پیراگوئے گنی تے کئی ٻے ملک ڈٹھی ودی ہاں
ساندراپاکستان وی ڈیکھ ڳئی ہے میں جولائی اچ لندن گیاہم اتے ساندرا دسمبر اچ پاکستان آئی ہئی ساندرا مشتاق لاشاری تے کیتھ کننگھم دے کٹھے کراچی آئی ہئی تاں میں انھیں کوں ڳھنݨ سانگے ائر پورٹ ڳیاہم ۔ول ٻے ڈینہہ ساندرا ملک اکبر دی دعوت تے سرائیکی عوامی سنگت دے اجلاس اچ شریک تھئی ہئی ایں میٹنگ اچ ڈوسوکنوں ودھ سنگتی شریک تھئے ہن ملک اکبر ٻاہردے مہمانیں نال ساکوں چاندݨی تے ٻلھایا اتے باقی سنگت درئیں تے ٻیٹھی ہئی ساندرا میں کنوں پچھیا جو کجھ لوک دریئیں تے کیوں ٻیٹھین اتے ساکوں چاندݨیں تے کیوں ٻلھائے نے میں اونکوں آکھیا جو آخر مہمان نوازی وی تاں کوئی شئے ھے اونکوں مہمان نوازی سمجھ نہ آئی اوں آکھیا جے اساں سارے ہکو جہیں جاہ تے ٻیٹھے ہووں ہاتاں کیرھااسمان ڈھہہ پووے ہا ساندرا تقریروی کیتی اوں آکھیا جو میں حقی حق حیران ہن جو کیا دنیا تے ینجھے چنگے لوک وی ہوندن اینجھے رج مٹھے لوک وی ہوندن جینجھے سرائیکی لوک چنگے تے مٹھے ہن میں حیران ہاں جو ٻولیاں اینجھیاں مٹھیاں وی ہوندین جیویں سرائیکی ٻولی مٹھی ہے ساندرا لندن اچ رہندی ہے پر انگریز کائنی اے مائی امریکی ہے اتے کھٻاڑی مارکس دی منوتر دنیادے غریبیں نال سانگا جوڑی ودی ہے انسانیں دی ونڈ ولھا کیوں ہے سوکھے ڈھیرسوکھے اتے اوکھے ڈھیر اوکھے کیوں ہن ہک دے حصے دی خوشی ٻے کوں کیوں مل ویندی ہے ہک انسان ٻے انسان دا پورھیا کیوں چوری کر گھندے مائی ساندرا توں تھیوں امریکی ہݨ تیکوں کیا ڈسوں جو بھاڳ وند چھڑا ساڈے سکھ نہیں کھاگیا اودنیا جہان دیئیں آوݨ آلئیں نسلیں دے سکھ وی کھادی کھڑے اساں سارے تیڈے ملک دے گہݨے تھئے لاتھوں تریجھے جہان دے آپݨے شکلوں تے عقلوں اوپرے حکمران ساکوں ڳہݨے رکھ تے آپ عیش کریندن تے ساڈے ٻال گرانہہ تے چپے ڳبھے سانگے روندیئیں روندیئیں سمھ ویندن جگ جہان دے غریب ملکیں دے حکمران آپݨے آپݨے دیس دے لوکیں دا رزق کھس تے آپ وی کھمدن تے عالمی سرداریں کوں وی کھویندن ۔۔ساندرا توں چین کیویں ڳئی ہانویں اوں ڈسیاجو ۱۹۳۰ اچ میڈی ما ۱۷ سالھیں دی ہئی تے چین ڳئی ہئی اتھاں اوں ہک چینی خاندان نال سنگت گنڈھی اوں خاندان ساڈے نال سانگانہ تروڑیا ۔ساکوں یاد کیتی رہ گئے اساں انھیں کوں وسارنہ سگدے ہاسے جے کڈاہاں اساں انھیں کوں وساروی ٻہوں تاں اوساکوں ایں یاد آندے ہن جو اساں انھیں کوں وسارݨ تے پھکے تھی ویندے ہاسے میں ھوں خاندان دے سڈ ے تے ڳئی ہم ہݨ پتہ لگے جو پوادھ کیا ھے پچادھ کیا ہے ؟پچھیم تاں ساندرا چھرکی بھری جیویں نندروں اٹھی ہووےہاپوادھ پوادھ ہے تے پچادھ پچادھ ہے پوادھ سک ہے مونجھ ہے موج ہے ٻاجھ ہے چاہ ہے کھنڈ ہے اتے پچادھ ’’’’’پچادھ سہنپ ہے سوچ ہے فکر ہے نظر یہ ہے فلسفہ اتےاتےبس کر مائی بس چین اچ کیا کیا ڈٹھو اتھاں جیرھاوی ویندے وڈی کندھ کوں ڈیکھݨ ویندے چین دی کندھ اے ڈسیندی ہے جو چینی استادہن کاریگر ہن اوکائی شئے وی جوڑسگدن اݨ ہوندکوں ہوندکرݨ تاں کوئی چینی لوکیں کنوں سکھے ووئے مائی نواں وپرالایو اساں تاں اہرامیں کنوں وہلئے ودے ہاسے تیں کندھ چایادڈیوائی کیتھ بینٹ وی کھٻاڑی ہے ٹونی بلئیر دی حکومت کوں صلاحیں ڈیندے صلاحیں وی کت دیاں ٹکرپاݨی پیسہ ٹکا مل فیکٹری ۔ونج وپار۔ہا یادآیا جاگیرداری سماج اچ ساکوں وڈے ڈسیندے ہن اتم کھیتی وݨج وپار نیچ نوکری پنݨ بیکار امریکہ اچ سووچوں چاربندے رڑھ رہیندن اتے اتلاان تھی پوندے جوساری دنیا کوں کھوا پلاتے بچدی کݨک سمندر اچ چا سٹیندن امریکہ دا سارا زور ونج وپارتے ھے اساں سووچوں ۷۰ بندے رڑھ رہیندوں راکھیاں کریندوں پاݨی وریندوں نانگ لتڑیندوں جھار ھکلیندووں ول وی ڈڈھ بھرن جوگے وی نسے تھیندے ہا کیتھ بینٹ توں ڈس سوویت یونین دے موندھے تھیوݨ دے بعدیورپ دیاں کمیونسٹ پارٹیاں کیا پیاں کریندین اساں پوادھی لوک اے سمجھی ٻیٹھوں جو یورپ اچ گالھ اگوں تے ودھدی پئی ہے ۔اتھاں کھبے ہتھ آلیاں پارٹیاں چوݨ کھٹیندیاں پئن برطانیہ اچ تساں لیبر پارٹی دی حکومت بݨائی کھڑواٹلی اچ کمیونسٹ پارٹی حکومت وچوں حصہ ولھائی کھڑی ہے ۔۔بس ووئے پوادھی بھرا بس یورپ دیاں کمیونسٹ پارٹیاں امریکہ دیاں ٻانہہ ٻیلی ہن امریکہ آکھے اٹھی کھڑو کمیونسٹ پارٹیاں اٹھی کھڑدین امریکہ آکھے بہہ تھیوواے بہہ تھیندین یوگوسلاویہ اچ جیرھا کجھ ہی تھینداپئے اوکہیں کنوں ڳجھا کائنی اتھاں وی کمیونسٹ پارٹیاں امریکہ دو تاڑی کھڑین اٹلی دی کمیونسٹ پارٹی اقتدار اچ سانجھ رلائی کھڑی ہے پر کھڑی کیندے نال ہے اٹلی دی کمیونسٹ پارٹی کنوں تاں یونان دیاں سڄے ہتھ آلیاں پارٹیاں وی ڈھیر چنگیاں ہن ۔پارٹیاں آندیاں پئن چوݨ وی کھٹیندیاں پئن پر الیکشن کھٹ تے ویندیاں کن تے پئن اوتاں سدھا امریکہ چھانہہ ہیٹھ ونج بہندین تےاتھائیں ساہی ونج کڈھیندین ساندرا آکھیا بھلا اے تاں ڈس ہیلن آف ٹرائے دا واقعہ کیا ہا میکوں وسریا کھڑے میں اونکوں ڈساوݨ پئے گیم ہزاراں سال پہلے دی گالھ ہے ہیلن ہک یونانی شہزادی ہئی ڈاڈھی سوہݨی اینجھی سوہݨی جو اوندے ناں دا ہوکا پیا کھڑاہا ہیلن دیوتا زیوتے لیڈادی دھی

ہئی اوندی ماسپارتا دی ملکہ سڈویندی ہی اوندے سہنپ دا جگ عاشق ہا کئی گھبرواندے دیوانے تے مستانے ہن اوں آپݨا ورآپ چݨیاتے سپارتا دے بادشاہ مینیلاوس دی زال تھی ڳئی ٹرائے شہر پنج ہزار سال پہلے وی وسداہا ایں شہر کوں ہومردی اوڈیسی جگ اچ مشہور کرڈتا ۔ٹرائے أڄڑ دا تے وسدا رہ ڳیا تھیا ایں جوٹرائے دے ہک شہزادے پارس ہیلن کوں چوا گھدا پہلے زمانے شئت وڈے لوک ھیݨئیں کوں ڳھٹ کستیندے ہن وڈے لوک وڈے لوکیں نال متھا مریندے ہن اینجھی سوہݨی چھوکری دے چئو ونڄݨ تے بھڑانددا منڈھ ٻدھیج گیااتے ۱۰ سال تائیں بھڑاندتھیندی رہ گئی ہیلن دا حال ایویں ہا جیویں ماروی نال تھیا ہا فرق اے ہا جو ماروی غریب دی منگ ہئی تے اونکوں عمرکوٹ دا بادشاہ چاڳیا ہا اتے ہیلن بادشاہ دی زال ہئی تے اونکوں شہزادہ چاگیاہا
۱۰سال دی بھڑانددا کوئی تت نہ نکھتا چھیکڑ ٹرائے باہروں ہک اینجھاہاتھی بݨایا گیا جیرھا اتلاٹھکݨ ہا جواوندے ڈڈھ اچ ہیلن دے پئے دی فوج آڳئی کہیں کوں سدھ نہ پئی ٹرائے دے لوک ہاتھی کوں ڈیکھ تے حیران تھی گئے شہر دے لوک تے سپاہی درکدے درکدے ہاتھی دے کولھوں پچ گئے اتے اونکوں اودرئیں اکھیں نال ڈیکھݨ پئے گئے ۔۔۔۔ول کیا تھیا ہاتھی دے ڈڈھ وچوں فوج نکلݨ پئے ڳئی ہیلن دے پئے دے فوجی شہزادہ پارس دئیں فوجیں کوں ڈڳلݨ پئے گئے چھیکڑ پئے کوں زال مل ڳئی ہیلن دی من دی مراد پوری تھئی اتے ایں پوری تھئی جیویں غلام حیدر یتیم دی چیڑی دا آلھݨاتے اوندے ٻچےٻچ پئے ہن یتیم آکھیا ہا جو شور اسمان کوں کٹ ڳیا کجھ ہٹ ڳیا کجھ بٹ ڳیا بھنڈے دی صورت بݨ ڳئی کھینجوں تے ٻوٹا اٹ کیا معصوم ٻچے بچ گئے چھٹ عاشقاں دا پھٹ ڳیا چیڑی شودی آکھے مگر میڈاوطن پیارا وطن ہیلن دے سہنپ بارے ہک یونانی نظم سݨو
اے اوچہرہ ہے جیندے سانگے ہک ہزار ٻیڑے سمندر اچ پیٹھے اتے ایلام دے ٹاور دے منار ے ساڑڈتے گئے ماکھی کنوں مٹھی ہیلن میکوں ہکی چمی نال سدھ کنوں ٻے سدھ کرڈتے ایہہ ڈیکھ اے اوجاہ ہے جتھوں ہیلن دے تھوڈیں میڈی روح کوں چھک تے کڈ ھ ڳھدے ساڈھے ڈاہ وڄ ڳئن اجاں رات نہیں تھئی اساں سارے ہوٹل کنوں ٻاہرنکل آیوں ساندراتے کیتھ بنیت کٹھے کاراچ ونج ٻیٹھے میں کیتھ کنگھم تے لاشاری صیب دے کٹھے این دی گاڈی اچ آن ٻیٹھوں انھیں ساڈھے ٻارھاں وڄے میکوں میڈے ٹکاݨے تے چھوڑیئے تے آپ آپݨے آپݨے گھریں دوراونہ تھی گئے
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: