جون 13, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

رادھارانبھݨ ہوئی ۔۔۔رادھاناچے گی

دفتروں نکل تے لاری اڈے تے آگیوں جہانزیب اعجاز تے میں بس نمبر ۱۵۵تے آن ٻیٹھوں بس رڑھ پئی اے ڈگرشاہ دی بس نہ ہئی اے لندن دی ڈوماڑبس ہئی اساں پوڑئیں کنوں چڑھ تے اتلے حصے اچ ونج بیٹھوں جڈاں مونومنٹ کنوں بس تے ٻہہ تے میں تے لاشاری صیب دفتر آئے ہاسے اوں ویلھے دریائے ٹیمز دے جگ مشہور لندن برج توں ٹپ تے آئے ہاسے مونومنٹ کنوں دفتر آوݨ سانگے ناردرن لائن دی ٹیوب وی ملدی ہے اے اوہا لائن ہے جیرھی ساکوں مارکس دی قبرتے گھن گئی ہئی ساڈے دفتر کوں بارواسٹیشن لگدے پر اڄ کل اتھاں بھن ترٹ تھئی پئی ہے اسٹیشن دا کوئی جنکشن ودھداپیاہوسی بس ہک پارک دےنال نال پئی لنگھدی ہے اعجازڈسیا جواے پارک ٹونی بلئیردے ہک وزیردی وزیری کھادی کھڑے ۔اوکیویں ؟اتھاں وزیریں دی وزیری ہݨ پارک کھاون پئے گئن کیا ؟ساڈے پاسے تاں پارک اچ زناورآپوون تاں ہتھوں پارک دی پاڑھ پٹیج ویندی ہے باقی زناوریں کوں کجھ نہیں تھیندا ۔ اعجاز ڈسیا جو وزیرصیب دی ہک چھوکرے نال یاری ہئی یاری وی اونجھی جینجھی یاری تے ساڈے پاسے خون خرابے تھیندن اتھاں چھڑا وزیر مشیر نہ بلکہ ہرایرا غیرا نتھوخیرانہ صرف چھوہریں نال یاری لاسگدے پر انھیں نال پرنیج وی سگدے جی ہا اتھاں چھڑا تریمتیں لانواں نہیں لنہدیاں چھوکرے وی جوانیں نال پرنیج پوندن جے کوئی وزیرکہیں چھوکرے کوں پرنیاودا ہووے تاں اواے گالھ لکیندانہیں اتے پھکاوی نہیں تھیندا سرکاری دعوتیں وچ وی چھوکرے زالیں بݨ تے ویندن جے ملکہ الزبتھ کابینہ دی دعوت کرے تاں جے کوئی وزیرچھوکرے نال پرنیا ودا ہووے تاں اونکوں زال بݨاتے بکنگھم پیلس اچ گھن آسگدے کوئی ہٹک ہوڑکائنی
چھوکرے وزیرکوں پارک اچ آوݨ دی درائی ڈتی وزیرسرکاری گاڈی تے چڑھ تے ھیں پارک اچ آگیا پچھوں ہک پاپا رازی لگ پیا وزیر معشوق نال ٹردا پھردارہ ڳیا اتے فوٹوگرافوٹوبݨیدارہ ڳیا ول ولدے ڈینہہ فوٹو اخبار اچ چھپئے تاں لندن اچ دھاڑ دھاڑپئے گئی عجیب اخلاق ہے ایں قوم دا وزیرچھوکرے کوں ملے کوئی وڈی گالھ نئیں اوندے نال سنگت گنڈھے تاں وی خیر ہے پرنیج پوے تاں ڈوڑی خیرہے ملکہ کوں آپݨا چھوکراونج ڈکھالے تاں وی کوئی وٹ نہیں کڈھینداوت دھاڑ دھاڑ کہیں ہے ۔۔۔۔؟دھاڑایں گالھ دی ہے یزیربے فکرا تھیا وداہا چھوکرے کنوں درائی گھن تے پارک اچ آوݨ تائیں اونکوں اتلا خیال ہی کائنا ہا جو ہک فوٹوگرافراوندے پچھوں لگاودے ول فوٹوگرافرفوٹو بݨیندارہ گیا وزیرکوں کوئی سدھ نہ ہئی اینجھا وزیر وزیرنہیں رہ سگدا چھیکڑ وزیرکوں استففی ڈے تے چیل چھڑاوݨی پئی بندہ کجھ وی ہووے پیا ہووے بے چنتا نہ ہووے ڈاڈا جلب وی ڈاڈھابے چنتا ہا کݨ مݨ شروع تھیوے ہا تاں کھٹ تے ول بہے ہا جھڑڳجکار کرے ہا دھواں دھار مینہہ وسے ہا ننانواں ڈھہے ہا ڈاڈ جلب ہکلاں ٻہہ مریندا ہا صدقہ صدقہ ٻانھاں ٻانھاں فوٹوگرافر فوٹو بݨیندارہ گئے تے وزیرچھوکرے کوں صدقہ صدقہ ٻانھاں ٻانھاں کریندارہ گئے بے خبرابے چنتابے فکرا کہیں جاہ دا اوکیویں وزیر رہسگدے
بس توں لہہ تے آصف ڈاردےگھر پنوں تاں اودرتے تانگھیندا پیا ہا آصف ڈار اپݨی کار کڈھی تریہے کاراچ آن بیٹھوسے آصف ڈار ہک سکھ سنگتی دے گھر گھن گیا سکھ سرکار لندن پولیس اچ افسر ہن اونکوں کلب ڄلݨ دی صلاح کیتوسے تاں اوں آکھیا جو تساں ڄلومیں آنداں پیاں اساں ڳھوک پیوسے اتے کجھ دیر بعد کلب ونج پڄیو سے ہیٹھلی منزل تے ہٹیاں ہن تے اتلی منزل تے کلب ہا آصف ڈار کا ر کھڑاوݨ ڳئے پیا تے اساں پوؓئیں چڑھ تے کلب ونج پڄیوں کلب دے گنجے سیٹھ ساکوں درتے جھل تے پچھیا جو سیٹاں ہک کروائی ودویا کائنا ساڈے ولدے توں پہلے اوں ساڈے پچھوں آصف کوں ڈیکھ ڳھداتاں چٹے ڈندڈکھال تے پسیلا تھی گیا ساڈے سانگے چار سیٹاں وندیج گیاں جھمر دے پڑ[ڈانسنگ فلور ]دو منہ کرتے ٻہہ گیوں ہک پاسوں ہک نینگر گاندا کھڑاہا اتےپڑتے ۷۰ سال دا ہک ٻڈھڑا آپݨی سینگی ٻڈھڑی دی چیل اچ بانہاں پاتے جھمر پیا کھیڈدا ہا پیر چووداپئے پیر رکھیندا پئے ٻانہہ لڈدی پئی ہے چیل ہک ولا مریندی ہے ہک تال دے ردھم تے ڈوپیر چووتے ڈوجھی تال تے فرش تے آن پوندن ہک پیر تریمتانواں بیا مرداوں نینگر فنکار محمدرفیع دی نقل پیا کرینداہا آواز میں نہ دوگا ٻڈھی جوڑی کھنبھ کھنڈیرتے کبوتر یں وانگوں پیلاں پئی پنیدی ہے بھانویں مورہن بھانویں بک ہن بھانویں ڳیرا گھڳھی کوں چوڳ پیا ڈیندا ہا بھانویں شبیر پٹھان دی وساخ تے ڈاچی سیپیں آلے پھنݨ اتآ ٹلئیں آلیاں حمیلاں پادڑے تے دڑامارتے لچھی پئی کھیڈدی ہئی
برسات میں ہم سے ملے تم نہ سجن تم سے ملے ہم اے کوئل کوکی ہے یا لتا الاپ کیتے کائنا اے تاں ہک چھوکری پئی گاندی ہے رتی لال ساڑھی اچ اوندا مکھڑاگلاب وانگوں ترڑیا کھڑا ہا ول چٹی کھنبھور شلوار قمیض والی ہک ٻی چھوکری پڑےتے آکھڑی قدأچاہاٹھی پتلی وال درگھے بہوں درگھے ادھ قدڄیڈے تاں وال ہانسی اکھیں سوجھل مناسب نہ ڈھیر درگھا نہ ڈھیرچھوٹا متھے تلک تلولا ادھ وال سینے تے سٹ تے بوچھݨ چیل نال ٻدھ تے ول رقص دا منڈھ چا ٻدھیس ساڈے نال آلی میزتوں ہک تریمتانویں کوکنیں پئی اڄ ڈوڈی چھکدی پئی ہے ول ہک پکے سن دا جوان اٹھی تے ڈوڈی دے کولھوں پچ گئے ایندا ناں بانوپرسادہے پینٹ شرٹ پاتی کھڑے ڈوڈی کنوں قد ذراجھکا ہس ول وی ڈاڈھا چھکداپئے ڈوڈی تے بانوپرساد سادٻانھیں اچ ٻانھیں پاتے رقص کرݨ پئے گئے موسیقی تیزتھی گئی سازیں دے شور اچ ڈوڈی تے بانوپرساد اکھیں اچ اکھیں پا ہاں نال ہاں رلاہک ٻے دی چیل دے چودھاروں ہتھیں دی حمیل بنا ہک بے دے ساہ کنوں ساہیں دا تھورا کھڑے منگدے ہن
ول جیوتی اٹھی تے پڑڈھیں ٹرپئی پچھوں پئے وی نال گئیس پیا جیوتی وی شلوار قمیض پاتی کھڑی ہئی بھریا جسم رنگ گورا سدھی سیندھ والیں اچ سندور متھے تے تلک قدڈوڈی کنوں ڳھٹ پربانوپرساد تے اوندے آپݨے پئے دے سانویں ’’’’’جیوتی دے پچھوں اوندی سینگی ہک ٻی مائی وی میل اچ ونج کھڑی اتے گدری جھمر دا منڈھ ٻدھیج گیا اتھ نغارہ نئیں پیا وڄدا شرناہیں دے سڈوی ساکوں نہیں سݨیندے نہ لاڑا کنگری کڈھداپئے نہ تریجھی تاڑی وجدی ھے نہ جھومری ہتھ اچ چپڑی پاتے جھومرئیں والی وڳ دے اندروں چیل نواتے چیل نواتے پئوں کھسکاتے بھلو بھلو بھلو اہدئیں اہدئیں دول دے پچھوں میردے اگوں نکھڑی کونج قطاردے وانگوں نگے ٻال دے سڈمارن تے قہرکلوردے موسمیں دے وچ سرور پیردا پھیرامارے نہ کالےکٻرے کالے شینھہ نہ سٹوداݨہ وسے مینہہ نہ منہ مکالے مل تے سارے داݨے پنوں نہ کھجیئں تلے کہل اٻالوں نہ پیپڑئیں دا کھڑکارتھیوے نہ چھوکرے راگ سݨاون نہ چھورھیں ڳڈے گڈیاں سٹ تے دول تے لچھی مارن نہ شنگر نسری ملدی ھے نہ ڈیلھے پیلھو کھاووں نہ چیکل تے ٻہہ ٻہہ تے ول ست ست پھیرے ماروں نہ پیڑ اندر دی ویندی ھے نہ ملدے سول داداروں چیتا کھاوے لال بھنوالی پیریں پئلاں پادوں نہ کہیں ٻے کوں یاد کروں نہ اپݨا آپ وساروں اے کئوکیندی پئی آندی ھے اے کیڑھا اہدا ٻیٹھے نہ نومن تیل ہوگا نہ رادھاناچے گی رادھاتاں بس آگی ہے سانول سانول چارھا چہرہ اکھیں نورتو ں بھریاں چٹی چولی کالا گھڳھرا پیریں موردا بھاڳ موریں وانگوں پیلاں پاوے ڈوڈی جیوتی لچھمی کملا درگا اولوں ڳھولوں ڈیکھو ڈیکھو رادھا نچدی من مستی وچ بے خبری بے چنتی رادھا ہر کہیں دی اݨ سونہیں تھی تے جھمرسنگت جوڑے ہیرسیالݨ ڳھر ونج ستی رادھا رانجھابݨ ڳئی رادھارا دھا کردی نی اے رادھا رانجھݨ ہوئی رادھا آپے رانجھݨ تھی ڳئی رہ گیا فرق نہ کوئی نہ رادھا کہیں نال الیندی ہے نہ کہیں نال رلدی ہے کلھی تھی تے رقص کریندی ہے کہیں دی ٻانہہ اچ ٻانہیں نہیں ڈیندی کہیں دے ساہ توں ساہ نہیں پندی رادھا ہیروی آپ تے رانجھا وی آپ رادھا سسی وی آپ تے پنوں وی آپ رادھارومیووی آپ تے جیولیٹ وی آپ رقص دا پہلا دور مکا تاں ڈوڈی جیوتی لچھمی کملا تے درگاساڈے نال آلی یزتے آن بیٹھیاں بانوپرساد سونہہ گنڈھݨ سانگے ساڈے نال ہتھ ملایا اساں آکھیااستادواہ جو رقص کیتوئی مارگھتیوئی وچ روہی واہ وے سجݨ تیڈے وعدے بانوپرساد کھل پیا ڈوڈی ڈھہیں ہتھ کرتے آکھیس جو اے میڈی زال ہے اتے ساڈا ۹ سالیں دا پتروی ھے ڈوڈی اگوں آن تے آکھیا سارا کوڑہے میں اینکوں ڈہدی اج پئی ہاں اج توں پہلے میں اینکوں ڈٹھاوی کائنی میں آپ ۲۲سال دی ہاں پرنی وی کائے نمھیں پتروت کیڈوں آگیا جیوتی سندھی الاݨی تاں میں وات پٹ ٻیٹھم ہا جیوتی توں ڈس کتھوں لڈآیوں ؟اوں آکھیا تنزانیہ وچوں ساہ گھن تے وت الاݨی ۔۔ساڈے وڈ وڈیرےصدیاں پہلے سندھ وچوں لڈتے ہندوستان گئے وت ڈوسوسال پہلے ساڈے وڈے ڈاڈے تنزانیہ آ گئے اتے میں نکڑی جہیں ہم جڈاں اساں تنزانیہ توں لڈتے لندن آیوں ٻولی کیویں بچائی ودو؟حیران تھی تے پچھیم اساں ٻولی کوں نہیں چھوڑیا ٻولی ساکوں نہیں چھوڑیا ۔جیوتی ولداڈتا رقص داڈوجھا دور تھیا ول تریجھا ول چوتھا نندرتے کیاں جوکاں لائیاں تے رات دھمی دھمی جاندی
پچھلے پہرکلب وچوں ٻاہر نکل تے نال ہک پاکستانی ہوٹل وچ ڈڈھ دی بھاوسمائی ہے سے ول آصف ڈاردی کار اچ آن بیٹھوں کارہݨ چارلٹن کورٹ پئی ویندی ہے
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: