مارچ 28, 2024

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔
اکھ کھلی تاں َسراندی کنوں لاتھیاں کتاباں چاتیم جون ایلیا دی ،،شاید اتے مشتاق یوسفی چراغ تلے واری واری ڈوہائیں کتاباں ڈہدارہ گیاں عنبرین بھاڄی بݨائی تے نال آنے تلیونس نریان کرتے واندے تھیوں تاں نویں ڈینہہ کوں نواں ساہ پئے گئے تیاری کرتے جاوید سومروتے میں کرسٹل پیلس پارک دے اسٹیشن تے آن پنوں اتھوں ڳاڈی تے بیٹھوں تے گاڈی وکٹوریہ دو درک پئی وکٹوریہ دے اتلے اسٹیشن کنوں ہیٹھ لہہ تے زمین دے اندر پیہہ گیوں ول آپو آپ ٹردئیں پوڑئین کنوں ڈھیر سارا ہیٹھ لہہ گیوں جتھاں پوڑیاں مکین اتھاں ہک لوک فنکار گٹار ہتھ اچ پاتے أچے سریں نال گاندا کھڑاہا ۔فنکاردامن یزداں کوں پاڑتے آپݨا گریبان وی چاک کیتی کھڑاہا ڈاڑھی ودھی ہوئی ہس ڈاڑھی کوں ٹھپݨ اجایاجاݨ تے چھڑواگ کر ڈتی ہس ۔کتھوں آئی کیڈے ویسی کوئی سدھ کائنی چنوری ڈاڑھی ڈیکھ تے مہندی داخیال آیا ول استاد خادم حسین یاد آیا ایویں لگا جوفنکاردے پرلے پاسوں استاد خادم حسین کالی عنیک پاتے ڈاکݨی وچوں بھیرویں کڈھدا کھڑے اڄ خوشبو نچدی پئی ہے ۔۔۔۔
میڈے سانول مہندی لئی ہے ول استاد دے پچھوں شاگرد اسلم کلاچی ڈوہیں ہتھ ٻدھ اکھیں نوٹ منہہ اسمان دو کرتے آ وس مآڈڑے کول الاپ پیا کریندے فریددے مصرعے تے عزیز شاہد دا تروپا تے آواز اسلم کلاچی دی ہک لنگ سوچیم جوایہوانگریز گٹار چاتے ایویں کھڑا ہووے تے ایندے سڄے کٻھے پاسوں نصیر مستانہ تے جمیل پروانہ کھڑےہوون اتے رل تے کھڑی ڈیندی ہاں سنیہڑا انھاں لوکاں کوں ڳاندے پئے ہوون تاں کیویں لگسی شئت اجاں جھوک فرید سرائیکی میلے آلی چس اونویں کھڑی ہے ھیں ڳالھوں انگریز فنکار کوں ڈیکھ تے واچھاں پٹیج گین ۔۔وکٹوریہ کنوں آکسفورڈ سرکس اسٹیشن ونجون سانگے اتھوں جیڑھی ٹیوب ملدی ہے اوندا نا ں وی وکٹوریہ ہے لائن بریکسٹن کنوں شروع تھیندی ہے
اسٹاک ول واکس ول تے پملیکو کنوں تھیندی وکٹوریہ پڄدی ہے وکٹوریہ کنوں ول گرین پارک آکسفورڈ سرکس وارن اسٹریٹ ایوسٹن کنگز کراس ہائی بری اینڈ ایزلنگٹن فنس بری پارک سیون سسٹرز ٹوٹن ہیم ہل بلیک ہارس روڈ کنوں تھیندی والتھم اسٹوسینٹرل ونج مکدی ہے جے والتھم اسٹوسینٹرل آگیوتاں میڈے نال ٹروایں اسٹیشن دے نال ہک جاہ اچ ولدے سال میں تے میڈے ساہ سنگتی سائیں مشتاق احمد فریدی ہک ہفتہ کٹھے رہ گیوں ۔۔
ولدے سال میں تے فریدی صیب قاہرہ دے رستے لندن آئے ہاسے لندن اچ ۷جولائی ۲۰۰۰ کوں ہک سیمینار دی صدارتی مجلس اچ اے حقیر فقیر پر تقصیر وی شامل ہا تھیا ایں جو غریب ملکیں تے امیر ملکیں دئیں پابندئیں دے خلاف اتے امن عالم واسطے کم کرݨ والی ہک بین الاقوامی تنظیم تھرڈ ورلڈ سالیڈیرٹی لندن دے کنزنگٹن اینڈ چیلسی ٹاون ہال اچ ہک سیمینار کراوݨ دا بندوبست کیتا سیمینار اچ گالھ مہاڑ اے تھیوݨی ہئی جو ۲۱ ویں صدی اچ پاکستان دا کیا حال ہوسی سالیڈیرٹی دے انگریز ممبریں ساڈے یار مشتاق لاشاری کوں آپݨا امیرمن گھدا تے ساڈے سانگے وی تاکی کھل پئی انھیں کراچی فون کرتے پچھیا جو کرایہ بھاڑا ٹکݨ بہݨ مل پووے تاں سیمینار دی صدارتی مجلس اچ شامل تھیسیں پچھیم جو مجلس اچ ٻیا کون کون ہوسی تاں انھیں ڈسایا جو ساڈی بی بی بے نظیر بھٹو برطانیہ دا سابق وزیر دفاع تے موجودہ شیڈوزیر خزانہ مائیکل پور ٹیلواسکاٹ لینڈ توں ممبرپارلیمنٹ جارج گیلوے لندن دے چارپنج مئیر ۔۔۔۔۔
بس سائیں بس حاضر آندے پیوں ’اساں لاشاری صیب کوں ترسلا ڈتاتے تیاریاں شروع کرڈتیاں ’فریدی صیب نویں زمانے دے جہانگشت جناب غلام مصطفے خان نال رل تے ویزے لواتے زمین دی ابھی چھیکڑی چنڈ نارتھ کیپ ونجݨ دا پروگرام بݨائی کھڑے ہن جتھاں جون اچ چندر ۱۲۰ گھنٹے ہکی جاہ تے کھڑارہندے ساڈے غلام مصطفے خاں دنیا دے پنج براعظمیں دی چنڈ چنڈ ڈٹھی ودن شیداݨی شریف دےغلام مصطفے خاں ہک ملک کنوں ولدن ٻے دوٹر پوندن جے بیگم صاحبہ انھیں دے سفریں تے کوڑیج پووے تاں اونکوں وی نال چا رلیندن خان صیب دا مطالعہ مشاہدے وانگوں وسیع ہے بے حدوبے حساب پڑھدن اتے بے حدوبے حساب سفر کریندن پر لکھدے ککھ وی کائنی اساں کئی سال جیڑالئی رہ گیوں جو سائیں کوئی شئے لکھو پر کائنا زمیں جنبد نہ جنبدگل محمد
May be an image of 4 people
فریدی صیب کہیں طراحویں خان صیب نال ونجݨ کنوں چک پئے شئت گھروں موکل نہ ملی ہوسنیں اوئیں وی پچھلے مہینے جون اچ میڈے نال ڈاہ ٻارھاں ڈینہہ ایران لا آئے ہن ایران دا دور ہ سراکاری ہا اصل اچ میڈے کٹھے شاہد جتوئی سعید خاور تے عبدالباط لاشاری ونجݨا ہا تریئے آلسی کہیں نہ پاسپورٹ بݨوایا ۔ذری جتلا وی اہرنہ کیتونے چھیکڑ فریدی صیب کوں آکھیوسے جو تساں آپݨا پاسپورٹ ایرانی قونصل خانے ڈے آوایں طرحاں اساں ایران گیوسے ول جیرھی میں اہر کیتی اوندا حال وی سݨ ڳھنو ساکوں ۷ مہینئں کنوں سدھ ہئی جو لندن وچ سیمینار تھیوݨے پراساں ویزہ نہ لوایوسے ۶ جولائی کوں ویزہ لڳا تاں فریدی صیب تے میں اگلے ڈینہہ ۷جولائی کوں مصردی ائر لائنزتے بہہ تے دبئی دے راہوں تھیندے قاہرہ ونج لتھو سے قاہرہ وچ ساکوں ہک فائیو سٹار ہوٹل وچ ونج ٹکا یونے پر اساں ٹکݨ تاں نہ آئے ہاسے ٻنھیں مسافریں نال ہک کوچ تے ٻہہ تے قاہرہ کوں ڈیکھݨ نکل گیوسے
قاہرہ پچ تے سوچیم جو آپݨے بزرگ دوست سابق نائب وزیراعظم مصر تے اسلامی کانفرنس دی تنظیم دے سابق سیکیرٹری جنرل حسن التہامی نال رابطہ کراں ول آلس چاکیتم حیاتی تاں حسن التہامی کوں ول پئے ملسوں اڄ قاہرہ ڈہدوں میں تے فریدی صیب کٹھے ٻیٹھوں نال آلی سیٹ تے ملتان دا ہک سوہنا نینگر آپݨی رڄ سوہنی کنوار نال ٻیٹھے ۔۔سدھ پئی جو اے نینگر ساڈے بزرگ قسور گردیزی مرحوم دا پوترا ہے میڈا تے اوں نوجوان دا سانجھا خیال اے ہاجو اندی شکل مخدوم یوسف رضا گیلانی نال ملدی ہے پر فریدی صیب اے گالھ نہ منی ۔پچھلی سیٹ تے دیرہ غازی خاں دا وکیل محمد اسحاق خاں ایڈووکیٹ وکیلیں آلی وردی پاتی ٻیٹھے کالی پتلون کا لا کوٹ تے کالی ٹائی ایویں لگدا ہا جو عدالت دی درسال نال متھا مار تے سدھا أتھاوں پیاآندے
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: