مئی 14, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے(17)۔۔۔ نذیر لغاری

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔
وکٹوریہ ریلوے اسٹیشن دی دھرتی دے اتے ٻݨیے پلیٹ فارم ہک دنیاآباد ہے وکٹوریہ دازمانہ برطانیہ دی عالمی قبضہ گیری دا زمانہ ہا اوندے دور اچ ہندوستان فتح تھیا پوادھ دے ڈھیر سارے ملک تاج برطانیہ دا ملکھ ٻݨین ۔
لارنس آف عریبیہ پورے عرب اچ گاہ گہاون دا منڈھ بدھا ملکہ وکٹوریہ دے زمانے اچ روس دی کمیونسٹ پارٹی سرمایہ داری دے خلاف بھڑاند شروع کیتی اتے ملکہ دے مرݨ دے۱۶ سال بعد روسی عوام زارتے سرمآیہ داری دے خلاف تاریخی فتح حاصل کیتی ملکہ دے شاہی تے بہݨ توں پہلے امریکہ وچوں برطانیہ دے پیر پٹیج گئے ہن
امریکی عوام یورپ دی چݨد چݨد وچوں آوݨ والے قبضہ گیریں کوں کٹ تے کڈھچھوڑیاہا ۔چس دی گالھ اے ھے جو امریکہ وچ بھڑاند بھڑݨ والے ڈوہیں فریق نسلی طورتے یورپی ہن ہک فریق امریکہ کوں ڳھر بݨائی کھڑاہا تے ٻیاچھڑالٹ مار ردی جاہ سمجھداہا آخرامریکہ کوں آپݨی دھرتی سمجھݨ والے کھٹ ڳئےاتے دھاڑامار تے مال مڈی چاونڄݨ والے ڈھہیج پئے
ملکہ وکٹوریہ دے زمانے وچ بہادر شاہ ظفر کوں نئل مارتے رنگون گھن گئے ھیں دور اچ ساڈےسردار یں سݨدیمن کوں مونڈھیئیں تے چاتے قلات ونج پچایا وکٹوریہ دے دور اچ بہاول پوردے نوابیں تاج برطانیہ کوں سجدہ کیتا اتے ایہو زمانہ ہا جڈاں پیرفرید ۔پٹ انگریزی تھاݨے دانعرہ ماریا
فرید پیدا تھئےتے ملکہ تخت تے چڑھی بیٹھی ہئی اتے ول ملکہ اتے خواجہ غلام فرید ہکے سال ۱۹۰۱ اچ ایں دنیا توں ٹرگئے کراچی ایمپریس مارکیٹ ملکہ دے ناں تے بݨی کھڑی ہے اتے اے وکٹوریہ اسٹیشن وی ہوندے ناں نال اڈیا کھڑے
میں اتھاں میجر سݨدیمن میجر منروچارلس نپئیر لارڈ ولزلے لارڈ کلائیو کرنل لارنس مسٹر میکلوڈ مسٹر میری ویدر مسٹر برنس ریڈکلف جنرل منٹڳمری اتے بنھیں انگریزیں دی آل اولاد ودا گولینداں متاں کوئی ناں ڳیا ٹکر پووے اتے اساں وی انھیں کوں آکھݨ جوگے تھیووں جو ساڈے خانیں دیاں پٹکیاں ولا ڈیو جمال خاں تے امام بخش

خاں دیاں پٹکیاں جے چوٹی تے روجھاݨ ول گیاں تاں صوبھ دایا تے ڈتݨ موچی خوش تھی پوسن پر نہ کوئی ساکوں سو لیا ہݨ خان جانݨ تے انھیں دئیں وڈکئیں دیاں پٹکیاں جاݨن آپ وی تاں سال پسالی آئے رہ ویندن
ہک لنگ سوچیم جو جاوید سومرو دے ذمے اے کم لاواں پر ول دل اچ خیال آیا جواو تاں آپ خیر پور دے نوابیں میرپور خاص دے ٹالپر حکمرانیں لاڑکانہ دے چانڈیئے بھٹے کھوڑے انڑتے ہکڑے سردار یں نواب شاہ دے سیدیں تے جتوئی خانیں دیاں پٹکیاں ودا گولیندا ہوسی ۔
اونکوں کہیں دی کیا پارت ڈیواں ’اوندا کم ذرا ایں ڳآلھوں سوکھاہے جو میر شیرمحمد ٹالپر اپݨی پٹکی بچوا گھدی ہئی اوچارلس نپئیر نال میاݨی دے میدان اچ بھڑتے ڈٹھاہا میر شیر محمد ٹالپر دا جرنیل ہوشو شیدی مردئیں مردئیں مرسوں مرسوں سندھ نہ ڈیسوں دا نعرہ مارتے آپݨی میر شیر محمدٹالپر تے سندھ دی پٹکی بچائی گیا ہا اتے اوں کنوں کجھ سال پچھوں ساڈے سارے خان نواب مخدوم انگریز میجریں تے کپتانیں دئیں گھوڑئیں دا گھاودے گلیندے ہن
جاوید سومرو کنوں اپݨا پاس ہا پیامیڈے سانگے کرسٹل پیلس پارک دا ٹکٹ ڳھدس اتے اساں ڳاڈی وچ آن بیٹھوں جیویں سمے سٹے کنوں لیاقت پور دا پندھ پئے کریندے ہوووں ڳاڈی لمے تے ٹرپئی اتے کرسٹل پیلس پارک تے آن کھڑی اتھاں لہہ پیوسے ول پندھ شروع تھی گیا نویں جتی پاتی وداہم پیر کپ سٹیونس اندروں اندروں دھاڑاں ودامرینداہم
ہݨ ٹور کنوں لگداپیاہا جو پیریں اچ پیت دانئل پئے گئے جاوید سومرو آکھیا جو کہیں طراحویں ڳھر پچ جلوں ول خیرہے اتھاں تیکوں جوگر پواتے مئسلے دا حل گول گھنسوں ٹردئیں ٹردئیں چھیکڑپندھ سجایا تھیا تے اساں جاوید سومرو دے گھر پچ گیوسے جاوید درتے گھنٹی ڈتی اندروں عنبرین درکھولیا
ساکوں ڈیکھ تے حیران تھی گئی جو انگریزیں دی آدم شماری اچ اے وادھ کیویں تھئی ہے سدھے ڈرائنگ روم اچ ونج بیٹھوسے میں بہݨ سیتی جتی لہایم کھری تے پھلوہیں تھے کھڑے ہن ۔۔تھی گئی سیرلندن دی ہولے ہولے درد مکدا مکدا مک گیا ساکوں نکھڑئیں اجاں سال وی نہ تھیاہا عنبرین تاں چھی ست مہینے پہلے پرنیج تے آئی ہے
ول وی حال حوال گالھیں تھیاں ’’قصہ قصولی مرگیا پولی ۔۔یورپ امریکہ دیاں ڳالھیں کریندے لندن دی تاریخ ورقہ ورقہ پھولیندے چرچل کنوں ہٹلر دی کنڈ لویندے جرمن فوجیں کوں روس دی گپݨ اچ گار کریندے ٹردیں پھردئیں ول آیوں اپݨی جاہ تے سندھ تے سرائیکی وسیب ریتاں رسماں رڑھ فصلاں ہر شئے ہک ہے
ول اساں ہک کیوں نئیں تھیندے ہک مٹھ تھی تے کروڑیں انسانیں دی بھڑاند کیوں نسے بھڑدے عنبرین بہوں سیاݨی ہے اوندی سندھ دی باݨ تے تاݨ دی تاریخ تے گہری نظر ہے پر اوندی تے ساڈی نظر دی عنینک دا نمبر ٻیاٻیا ہے اوسائیں جی ایم سید کوں سندھ دھرتی دا ہیرو سمجھدی ہے میں تے جاوید سومرو سائیں جی ایم سید کوں سندھی عوام دا ولن سمجھدواے منڈھاو فرق ہے
جڈاں تضاداتلا شدید ہووے تاں بحث ویلے بھڑاندوچ چس آندی ہے اساں آکھیا جو عنبرین گالھیں ختم بکھا ٻٹیرا کے تائیں بھڑسی ۔مہربانی کرتے کوئی شئے کھوا تے ول نویں سروں بحث شروع کریسوں عنبرین کچن دوول گئی ۔اوں دال گرم کیتی تے پکی پکائی روٹی چاتے ساڈے اگوں آن رکھی ۔
روٹی نال انصاف کیتوسے اساں دال دے ہیلک ہیوں جا ڄلیوں تے دال کھا ڄلیوں ساڈی بیگم صاحبہ بہوں کوشش کیتی جو وڈئیں دے ارش کنوں چیل چھڑواتے دال چھوڑ ڈیوں تے ماس دے ہیلک تھیووں پر کتھاں دال تاں وت دال ہے اساں دال نال انصاف کیتا عنبرین کوں سویلے دفتر ونجݨے ھیں واسطے اواٹھی تے سمھݨ ٹرپئی اتے جاوید تے میں ڳالھیں اچ لگ گیوسے نال نال ٹی وی وی ڈہدے ٻیٹھے ہاسے
ول غورجو کیتوسے تاں ٹی وی تے غربت ودھ ڳئی ہئی جیرھے جوان زالیں نظردے پئے ہن انھیں دے لنگیں تے بہوں ڳھٹ کپڑے بچ گئے ہن اساں غریبیں سانگے ٹھڈا ساہ بھریا تے ٹی وی بند کرڈتا ول اساں وی سمھݨ سانگے اتلی منزل دو ٹرگیوسے سوڑ جتلا سردی ہئی پئی اساں سوڑاچ لک پیوسے پچھلے ہفتے اتھاں احمد شاہ ستا پیا ہا ہزارے دا احمد شاہ کراچی وچ آپݨی نگری وسائی پئے
امریکہ تے لندن دی سیر کریندا پچھلے ہفتے کراچی ولیاہا سوڑ وچوں منہ کڈھ تے جون ایلیا دی کتاب شاید چاتم میں ایندا پیش لفظ ۱۰ دفعہ پڑھی ودا ہوساں پر دل نئیں رڄدا اردو نثردی چس چاوݨی ہووے تاں ول جون ایلیا دی نثر پڑھچے جون ایلیا میڈا پیارا سنگتی ہے ۲۰ سال پہلے محمد اسماعیل احمداݨی صیب سانگے اکیڈمی آف لیٹرز دی طرفوں پیت دے پندھ تے ایوارڈ ڈیوݨ دا علان تھیا تاں اساں ایوراڈ کنوں زیادہ ایں ڳالھ تے خوش تھئےودے ہاسے جو کہیں طراحویں سرکار اے تاں منیا جو سرئیکی انج بولی ہے
ول ایں خوشی اچ ڈاکٹرمحمد شفیح بوئی خان دے گھر تقریب تھئی ۔اوں تقریب اچ جون ایلیا آپݨی زال زاہدہ حنا سودھا شریک تھیا ہا اوں ویلھے وی ڈھیر گالھیں تھیاں ہن اوں تقریب وچ ادیبیں وی پوری گلیکسی شریک تھئی ہئی اتے ایڈوں حضرت علامہ غلام یسین فخری زبیر راݨا مشتاق احمد فریدی تے حمید اصغر وی کٹھے ہن ۔۔۔۔شاید پڑھدیئیں اتے آپنے نال الیندئیں الیندئیں سمھ پیم لندن اچ ڈوجھی رات پئی لنگھدی ہئی
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

جاری ہے۔۔۔۔

%d bloggers like this: