اکتوبر 28, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

پارک ہٹی کاک محل تے ٹیمزدے پل

مویل نال ڈٻل روٹی کھیر تے چاہ نال نریان کرتے اساں تریہے کرسٹل پیلس پارک اچ آگیوں پاکستان دے کہیں وڈے یا چھوٹے شہروچ اینجھا کوئی باغ کائنی لندن چھڑا ھیں پارک دی تراݨ تے کائنی کھڑا آلڈدا اینجھے پارک کئی سوہوسن لندن دے پارکیں تے جاہیں دارقبہ سانویں ہوسی جتلا جاہ تے گھربݨیے کھڑن اتلا جاہ تے باغ تے پارک وی ہن پئے لوک گھریں ڳھر والئیں تے بالیں وانگوں پارکیں تے باغیں دی راکھی کریندن جیویں ڄٹ رہک مستاجر ہٹھائیں ہالی رڑھ رنگڑی دی راکھی کریندے جھار ھکلیندے لوڑھا ڈیندے ویلھے سرپاݨی ڈیندے اتھاں پارکیں تے ایں کنوں وی ودھ مہر کیتی ویندی ہے اتھوں دی کونسل فیصلہ کیتا جو کئی میلیں اچ درگھریئے ایں پارک دی ہک چنڈ اچ ہک ہٹی چاکھولیجے تاں جو اتھاں آوݨ آلے لوک اتھ آتے کئی شئے گھنݨ چا ہن تاں ڳھن گھنن اتھوں دے لوک کٹھے تھی گئے وسیبی کٹھ تھیوݨ پئے گئے دھاڑ دھاڑ مچ گئی پارک اچ ہک سلھ نہ رکھن ڈیسوں ’ہک وݨ نہ مارݨ ڈیسوں ڳھادا ہک تیلا نہ پٹݨ ڈیسوں ہڑ تالاں تھیوݨ پئے گیاں پارک دے جیڈ وں بیزلگ گئے آسوں پاسوں وس وسیب دے لوک را کھے بݨ تے کھڑ گئے چھیکڑ پورھیا سجایا تھیا ہٹی نہ بݨی
عنبرین فاسٹ باولر وانگوں ٻھڄݨ پئے گئی بھڄدئیں ٻھڄدئیں کھٻا پیراگوں کڈھ تے سجے کوں ٻھنوالی ڈتس جیویں باولنگ پئی کریندی ہووے اگوں بیٹسمین کوئی نہ ہا ایویں چا سمجھو بس ہوا اچ ڈانگ ہئی حال ڈے عنبرین اوورپورا کریسیس جے اوور پورا تھی پیا تاں ول ڈبل ہٹ ٹرک ہوسی ہوا اچ ڈانگاں ایویں ہوندین ہکے اوور اچ چھی آوٹ جےڈوجھا اوور تھی پیاتاں اتلاریکارڈ بیݨیسیں جو جگ ریس کریسی پارک اچ سدھاونج تے سڄے پاسے پھریوں تاں وݨیں دی قطاردے پچھوں کاک محل بݨیا کھڑے کوئی کندھ نہیں کتھائیں کوئی سلھ نہیں لگی پئی چونے گارے دا لیپ وی کتھائیں کائنی اے پارک دے اندرہک راندہے راندایں ہے جو چودھار دائرے اچ ٻوٹے رادھے کھڑن اوندے اندر گلیاں نݨیا ں پئن گئیں دے ڈونھائیں پاسوں وی ٻوٹے رادھے پئن اگوں اے گلیاں پھرویندین ول اگوں ونج تے ہک گلی وچوں ڈوگلیاں ڈووچوں چارتے چاروچوں اٹھ تے وت چاربندتے چارکھلیاں ’’’’کاک محل دے اندر پہݨ دا ہکورستہ ہے تے ٻاہر نکلݨ دا وی ہکورستہ ہے اندر پہہ ونجوتے رل ونجو سیالے کوں کوندر اچ بھیڈاں چھیڑویندے ہاسے بھیڈاں ٻکریاں گویں ڈاندوہڑیں جھوٹیاں شئ شئی ووئے نہ رھیں جے کوندر اچ رل گیوں تاں تیکوں کیویں ڳولیسوں ووئے سائیں مرنی اگوں جے کھربݨ توں نکل تے گپݨ اچ ونج تے گپیج کھڑوں تاں تیکوں کون آن کڈھیسی کاک محل اچ پیٹھوں بھول بھلیاں جنتر منتر اساں نہ میندھر نہ اگوں مومل ٻیٹھی نہ سادھاں نہ سومل اساں بھوئیں تے درگھر یاں بجھارتاں ٻڄھݨ نسے آئے اساں ڈکھیں ڄائے سکھیں لدھے سیلانی نویں دنیا ڈیکھݨ آیوںرلݨ پھلݨ نسے آئے جتھاں ہک گلی وچوں ڈوگلیاں پیا ں نکلدیاں ہن اتھوں ہک گلی گھن تے کجھ ٹریوں تاں اوگلی بندتھی گئی اساں پچھلے پیریں پھرتے ٻاہرول آیوسے الٹے پھرآئے درکعبہ سے اگر وا نہ ہوا
جاوید تے عنبرین کاک محل دی سیل کرتے ٻاہر نکل آئے اڄ چٹکا چوانتیاں چاتی ودے ڈھنڑھ ڈیکھ تے دل اہدے جو ڈوچارٹبیاں ماروں ہاتے وت نکل آوں ہا گرمی تاں کلھ وی ہئی پراج ایویں لگدے جو درجہ حرارت ۳۰۲۸ درجے سنٹی گریڈ ہوسی آو سائیں جیکب آباد دے ابھیوں تے دیرے دے لمیوں سلیمان جبل دی جھولی اچ وڈاتھیون آلا ۳۰۲۸ سنٹی گریڈ کنوں ڈریاودے بغیر بجلی دے ۴۸ کنوں ۵۲ ڈگری سنٹی گریڈ دی گرمی اچ پیردار ہݨا سکول ونڄݨ آلا اج تھولی جہیں ڳرمی کنوں دہلیا کھڑے پر اتھاں انگریزتاں اینجھے چٹکےسانگے لوہندن زالیں جوان گھاتے اوہیں درگھریئے پئین جیویں ہائیڈپارک تے درگھریئے پئے ہن جتھ کپڑےدی لیر دا ہووݨ بہوں ضروری ہے اتھاں تاں کچھے شچھے ہن پئے باقی عزیز شاہددی غزل دے مصر عئیں وانگوں تن دی تارداکیا بھرواسہ تن تاں گارا گچ وے سانول بیݨے تے کجھ موندھے تے کجھ سدھے سمھ تے لوں لوں کنوں چٹکاپئے کھاندے ہن اہدن چٹکاچٹے لنگیں کوں بھورا کریندے ہا سائیں یورپ اچ ایویں کریندا ہوسی ایشیا تے افریقہ اچ تاں کالا کرگھتیندے

کرسٹل پیلس پارک دا اسٹیشن ھیں پارک دے ناں تے بݨیا کھڑے پراساں پیلس تاں پارک اچ ڈٹھے نہ اسٹیشن تے ۔۔۔۔اتے اووی کرسٹل پیلس ۔۔۔پتہ نہیں کتھاں ہوسی کئیں بݨایا ہوسی اساں پارک دا پھیر ا مارتے اسٹیشن تے ول آیوں شہر دے لمے پاسوں اے اسٹیشن اپݨے وسیب دے اسٹیشن جیہاں لگدے جاوید تے عنبرین کھڑتھئن میں وکٹوریہ اسٹیشن تےآن لتھاں اسٹیشن کنوں ٻاہرایویں نکھتاں جیویں کھنبھی بھوئیں وچوں نکلدی ہے ۳۰۲۵ گزٹرتے کھٻے پاسوں پھرپیاں ٹردئیں ٹردئیں کوچیں دے اڈے تے ونج کھڑاں ٻاہروں کتھاوں نہیں لگدا جو اساں لندن دے اتلا وڈے اڈے تے آئے کھڑوں جتھوں برطانیہ دے چھوٹے وڈے شہریں اتے یورپ دے اکثرملکیں تے وڈے وڈے شہریں سانگے کوچاں ملدین جے تہاکوں بس یا کوچ تے لندن پھرݨے یا ٹیوب وسیلے بھوئیں کچھݨی ہے تاں تہاکوں وکٹوریہ کنوں سبھ سدھ پئے ویسی چھڑاوکٹوریہ ناں کنگز کراس سینٹ جیمز پارک اتے ہیتھرو اینجھیاں جاہیں ہن جتھوں تساں سیل سپاٹے دیاں ساریاں خبراں چاسگدو چھڑا مرکزی لندن اچ چس دیاں جاہیں ۹۲اتے تفریخ دیاں جاہیں ۹۴ہن وکٹوریہ کوچ اسٹیشن کنوں انجوانج کمپنئیں دیاں کوچاں ملدین ولدے سال ھیں کوچ اسٹیشن کنوں فریدی صیب کوں ہالینڈراوانہ کیتا ہاسے اوہالینڈ کنوں جرمنی فرانس تے بلجیم وی سیرکرتے پنجویں ڈینہہ دی درائی بھل تے چھہویں ڈینہہ ول آئے پنجویں ڈینہہ اساں شاکرشجاع آبادی دا مصرعہ پڑھدے رہ گیوں ڄیویں عمر نبھی ھے شاکر دی ہک منٹ نبھا پتہ لگ ویسی کوچ اسٹیشن پھردے وکٹوریہ اسٹیشن ول آیوں اتے ڈسٹرکٹ لائن دی ٹیوب تے ٻہہ تے آپݨے ٹکاݨے تے آن پڄیوسے اتھوں ہتھ منہ دھوتے کیتھرین روڈ دونکل گیاں اتھاں لاشاری صیب نال سرے ونجݨے سرے لندن دے پچادھی پاسوں ہک ضلح ہے اتھاوں دا ہک مکان سرے پیلس دے ناں نال مشہور تھئے اساں تاں اج وی اہدوں جے سرے پیلس آصف علی زرداری دا ہا تاں پہلے ڈینہہ منی ونجے ہا جوہا اے گھر میڈاہے شریفیں دے چالھی کروڑدے چارفلیٹیں دی کیں ورداس گھدی ہے جوزرداری دی پٹکی لہا گھنن ہا اتے اوئیں وی بچایا کیا ھنیں ھیݨی قوم دا ھیݨا رے سینکاجو ہتھ آئے پچھیں فاروق لغاری کنوں ڳھن تے پرویز مشرف تائیں ہر کہیں پئے ٹھنگے مارین کیتھرین روڈ تے لاشاری صیب دی جاہ تے پڄیاں جتھوں اساں کار تے سرے ونڄݨے اتھاں تاج خاں لنگاہ وی آوݨے دعوت ڈتی ہئی ورلڈ سندھی کانگریس دے منورہا لیپورترے لاشاری صیب کاردا سٹیئر نگ سنبھال گھدا انھیں دے نال میں ٻیٹھاں پچھوںلاشاری صیب وی بیگم صاحبہ ٻیٹھی ہے بیگم عابدہ لاشاری ۔۔۔۔کار بھڄ پئی اساں شہردی پوادھی چنڈ وچوں نکلدے پیوں اتے اساں پچادھی چنڈ کنوں ٹپ تے سرے ونڄݨے چھݨ چھݨ موکل دا ڈینہہ ہوندے وت وی سڑکاں کاریں نال بھریاں پیاں ہن اقبال سوکڑی ہووے ہا تاں پچھے ہا جو کیوں تیڈی رفتار پنگݨی پئے گئی اساں ول ہوندا مصرعہ اوندے متھے اچ ماروں ہا اے دری دوزخ دی لنگݨی پئے گئی شہر دی ادھواݨ وچوں ٹپدئیں اوساریاں جاھیں ڈٹھوسے جیڑھیاں پہلے وی ڈہدے رہ گیوں مونومنٹ مینش ہاوس ایمہنکمنٹ ٹیمپل اتے نال ٹیمز دریا دریا دے اتوں پل ٹاور ہل دے نال ٹاور برج مونومنٹ تے باروہائی اسٹریٹ دی ادھواݨ اچ جگ مشہورلندن برج مینشن ہاوس دے نال ساوتھ وارک برج بلیک فیئر دے نال بلیک فیئر برج واٹرلودے نال واٹرلو برج پارلینمٹ دے نال ویسٹ منسٹر برج جیویں زمین دے ہیٹھ دا پندھ سوہݨا لگدے ایویں بھوئیں دے اتوں دا پندھ وی ڈاڈھا وݨدے ٹیمزتے جاہ جاہ پل بیݨئے پئن دریائے سندھ دے منڈھ کنوں پاندتائیں دے سارے پل آتے دریائے ٹیمز تے صرف لندن شہر دے پل جے حساب کیتوھے تاں لندن دے پل ودھ ویسن

اسان رچمنڈ دے علاقے اچ پج گیوں اتھوں لاشاری صیب دی دھی بے نظیر کوں نال رلاوݨے گاڈی اوندے کالج دے نال ونڄ پجی اگوں بےنظیر کھڑی ہئی ۔بےنظیر اپݨی ما نال پچھلی سیٹ تے بہہ تھئی ول مادھیریں دے حال حوال شروع تھی گئے بیگم لاشاری ول ولآ آکھے جوتیں رڄ کرتے پاݨی نئیں پیتا تیں رات کوں نندروی پوری نئیں کیتی بےنظیر آکھئے میں پاݨی پیتے میں نندروی پوری کیتی ہے میں ٹکروی رڄ تے کھادھے وت بیگم صاحبہ آکھے بھلا میکوں اے کیوں پیالگدے جو تیں پاݨی رڄ تے نہیں پیتا بے نظیر آکھیا اماں تہاکوں وہم ہے میں چنگی طراحویں رج تے پاݨی پیتے
لندن کنوں ٻاہر نکل آیوں کنک دیاں فصلاں پکیاں تے کپیاں لاتھین ڈھیر جاہیں تے ڈھوویج وی گئین ھے وولٻارا ڈیکھوں ہااتھاں وڈے وڈے محل بݨیے کھڑن لندن دے ٻارہوں وڈے محل ڈس پوندن اندروں سبھ خیر ہے ہݨ ڳھاٹے ون آگئے ہتھ کوں ہتھ نہیں سجھدا ہر پاسوں ساول ہر پاسوں وݨ ٻوٹے تے گھا ایم ۲۵ کنوں سر آلے پاسے پھر پیوں رڄ ٹھلیاں ڳنویں منہ زور گھوڑے کݨک محل وستی ڳوٹھ وسوں اتے چھیکڑوت گھاٹے وݨ ساوے چچ وݨیں وچوں ٻاہر ہک وستی تے دیدپئی آوسائیں سرے آگئے سرے اچ پہݨ نال کٻھے ہتھ تے پھر گیوں ہک گھر دے درتے انگریزی اچ لکھیاپئے سندھ ہاوس اے منور ہالیپوتر ے دا گھرہے اتے اساں اج اتھائیں مہمان ہیں
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: