جون 13, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

ڈومائیاں ’ہک پیٹ تے ٻی این

بیرنس[لارڈ‘]جے آئی تاں میٹنگ شروع تھی گئی میٹنگ اچ ۱۶ تریمتیں تے ۱۳ بندے کٹھے ہن میکوں مہمان سمجھ تے جاہ ڈتی ڳئی ۔کمیٹی روم اچ جھیڑ ا شروع تھی گیا چارلس تے کرامویل ولا بھڑپئے ۱۶۴۱ اچ شروع تھیوݨ آلا جھیڑاہک لنگ وت سرکڈھی کھڑا ہا ہک ممبراٹھی کھڑاتھیاتے تھہرام نال ہولے ہولے الاوݨ پئے گیا ۔۔اساں لوکیں نال قول کیتا ہا جواشرافیں دی ٹیکی بھن سٹیسوں ہاوس آف لارڈزکوں ختم کرتے نوابیں تے لاٹ صاحبیں دی سیاسی سرداری دا تڈا وڑھیسوں ہݨ اساں قول کنوں پھریئے کھڑوں جے ساڈے زمانے اچ ہاوس آف لارڈ زدا خاتمہ نہ تھیا تاں اے چنگی گالھ نہ ہوسی
ہک ممبر بہنداہاتے بیا اٹھی کھڑاہا ہک بنگالی نینگر ذراڈ ھیر کاوڑیا وداہا اوں آکھیا جو لیبرپارٹی دی لیڈر شپ ہاوس آف لارڈز کوں تروڑن دی جاہ تے اونکوں بچاوݨ سانگے زورلئی کھڑی ہے اوں وزیراعظم تے کوڑیندئیں ہوئیں آکھیا جو ٹونی دے کرونی اونکوں اے کم نہیں کرݨ ڈیندے جیویں وڈے لوکیں دے چمچے کڑچھے ہوندن پئے ایویں ٹونی دے کرونی وی ہوسن پئے پراساں وٹ نہیں کڈھیا جے بنگالی وٹ نہیں کڈھیا تاں اساں کیوں کڈھوں لیبرپارٹی دی سیکرٹری وی الاݨی ول چھیکڑاچ بیرنس جے تقریر کیتی تقریر من بھانوݨی ہئی اتھاں لڑبھن دگا چا آپݨی گالھ کوئی نہیں منوا سگدا اتھاں دلیل کھٹیندی ہے دلیل وی ایویں جیویں جابر الحیان داالجبرا بیرنس جے لیبرپارٹی دیاں مجبوریاں ڈسیاں کہیں منیاں کہیں نہ منیاں اے گالھیں ہن ٹردیاں رہ ویسن کوئی کہیں کوں الاوݨ کنوں نہ ہٹک سگدے تے نہ ہٹکیسی اتھاں ڈوتر یمتیں تے ہک بندے دے سونہے تھیوسے ہک مائی انگریز تے بی نیگرو
انگریزمائی دا ناں پیٹ ہیلے ہا اتے نگیرومائی این نالو بوا ہئی ادھ کھڑانگریزدا ناں باب ہا انگریز مائی کوں ڈیکھ تے میکوں پیلزپارٹی دی جیالی تاجدار صدیقی یاد آندی رہ گئی پیٹ دی شکل تاجدار نال ملدی ہئی جے پیٹ اردوالاوݨ پئے ونجے ہا تاں میں اونکوں تاجدار دی بھیݨ من گھناں ہا پرنہ اونکوں اردو آندی ہئی تے اوتاجدار دی بھیݨ ہئی پیٹ ہک رسالے دی ڈپٹی نیوز ایڈیٹر ہئی اوندے رسالے دا ناں ہاہیلتھ سروس جرنل پیٹ چھڑی صحافی تے لیبرپارٹی دی کارکن نہ ہئی پر مشتاق لاشاری دے کٹھے رائل باروآف کنزنگٹن اینڈچیلسی دی کونسلر وی ہئی ولدے سال ایں بارودے میئر رچرڈ واکرنال یاری ڳنڑھی ہاسے ایں بارواچ لیبر پارٹی اپوزیشن اچ ہے اتے سرکاری پارٹی ٹوری پارٹی ہے اساں ہک کافی ہاوس اچ ٻیٹھوسے تے ہک ٻے دا حال حوال گھدوسے
پیٹ کوں معمولی مائی نہ سمجھاھے لیبر پارٹی ایں مائی کوں دارلعوام دی ٹکٹ ڈتی ہئی جے وس پڄس تاں الیکشن دی بھڑاند کرتے جے کھٹ ونجے تاں پارلیمنٹ دی ممبرسڈاوے جے ہر ونجے تاں خیرہے پیٹ الیکشن ہر گئی لیبرپارٹی اینکوں یورپی پارلیمنٹ دا ٹکٹ ڈتا جو جے کر پارلیمنٹ ہاوس اچ نہیں آسگی تاں یورپی پارلیمنٹ دا الیکشن کھٹ تے اتھاں پئی ونجے پیٹ او الیکشن دی نہ کھٹیا
ڈکھڑئیں کارݨ ڄائی ہم
سولیں سانگ سمائی ہم
پیٹ ڈووڈے الیکشن جھݨ تاں نہ سگی پر ہاں ہٹ وی نہ تھئی نہ سوڑ پاسمھ تھئی نہ ووٹریں کوں مندے پلوتے ڈتونس گھر اچ کلھی رہندی ہے پرنی تاں سہی پر نی تاں سہی پر پتر یج نہ سگی نہ تاں پرنی پتری سڈاوے ہاہݨ کلھی رہندی ہے کھاوݨ پیوݨ داڈکھ بکھ کائنسی جے ہووس ہا تاں حکومت اونکوں بکھ نہ مرݨ ڈیندی ہئی شئت ہر یار ہوسی ھیں ڳالھوں پئے تڑھاچھوڑیا ہوسس یاول ایں آپ اونکوں بھڄا چھوڑیاہوسی اساں وٹ نہ کڈھیا اساں وٹ کڈھوں وی کیوں ہا اساں نہ تریں اچ نہ تیرھاں اچ ساڈاکیاجو اساں وٹ ودے کڈھوں ڈوجھی مائی نیگروہے کٹئیں قومیں [اقوام متحدہ] دے ادارے انٹرنیشنل لیبرآرگنائریشن دا ڈائریکٹر جنرل انوارشہید ساڈا اسنگتی ہونداہا ہک ڈینہہ میں انوار شہید تے جی الانہ کراچی اچ کٹھے ٻیٹھے ہاسے انوار شہید حال پیاڈیوے جو ہک زمانے جی الانہ کٹھئیں قومیں [اقوام متحدہ]دی انسانی حقیں دی کمیٹی اتے چلی ٹرسٹ فنڈ دا چئر مین ہا نیویارک کٹھئیں قومیں دی اجلاس پئے تھیندے ہن ہک ڈینہہ جی الانہ اجلاس توں وانداتھی تے ہیٹھ لہہ آیا اتے آپݨی کار دی پچھلی سیٹ تے آن بیٹھا اوندے نال ہک نیگرومائی بیٹھی ہئی انوار شہید کاردے شیشے وچوں جھاتی پاتے جی الانہ کوں اکھ مارتے آکھیس جو سائیں حبشی حلوہ کڈاں کنوں کھاوݨ شروع کیتے وے

وے اساں این کوںڈیکھ تےجی الانہ انوار شہیدتے حبشی حلوہ یاد کیتا پر نہ اوایں ہئی اتے نہ اساں اوں ہاسے این گھٹ عمردی لگدی ہے پر پنجیں بالیں دی ماپئے کنوں اے وی چیل چھڑوائی ودی ہے کوڑے پاݨی دے تریجھے گلاس تے رانجھݨ دارنگ اینجھا لگداہس جو غیر داوہم بھلالکڑ چاتے این کوں جھنبھݨ کھڑوینداہا رت ورتاں کرہک پاسے سٹ تے اپݨی کھٹ تے ونج ڈھہنداہا ساری رات ہنجوں وہندی اتے پٹھڑی سیت کوں پٹیندی ہئی اتے پئے گراڑے مرینداہا
این کون ہے کتھوں دی ہے اتھاں کیوں آئی ہے اوئیں تاں لندن اچ ڈھیر نیگر وودن ہک زمانے اچ انگریز افریقہ وچوں کالے انسانیں کوں ڈنگرسمجھ تے ٻدھ تے گھن آندے ہن اتے کالے لوک منڈئیں اچ وکدے ہن انھیں دے اگھ لگدے ہن ٻولی تھیندی ہئی ہک ڈوترئے تے سودا چھٹداہا وپاری مال گھن تے نال گھن ویندے ہن ول انھیں کالے انسانیں کوں دانگیا ونیداہا دانگ لواوݨ داسوب اے ہاجوپتہ لگے جواے مال کینداہے اصلوں ایویں جیویں ساڈے پاسے ڈنگریں کوں دانگیاویندے پر این دے وڈکے ٻدھیج تے نہ آئے ہن این اسمان دے پھیرے پچھوں اتھ آئی ودی ہے
ہک ویلھا ہا این یوگنڈادے بادشاہ بوگنڈادے وارثیں وچوں ہئی ۱۸۹۴اچانگریزیں بوگنڈابادشاہ کوں تڑھاتے یوگنڈا اچ کلاٹھوک ڈتا ایں قلعے دے تراݨ تے ۶۶سال تراڈدے رہ گئے جیویں بہاولپور وچ ہک دے بعدٻیا نواب صادق محمد خاں عباسی اتے ہک دے بعدٻیا نواب بہاول خاں عباسی آوینداہا ایویں ۱۹۶۳اچ یوگنڈااچ بوگنڈاول آیا پرایں دفعہ بادشاہ بݨ تے نہ صدربݨ تے آیا این صدربوگنڈادی بھتریجی ہئی ۱۹۶۶اچ وزیراعظم ملٹن اوبوتے شاہ بوگنڈا داتختہ کڈھ ڳھدا ول جیویں کھوہ کھٹیاہس اوئیں کھوہ اچ ڈٹھاپنج سال بعدفوج دے کمانڈرا نچیف جنرل عیدی امین وزیراعظم کوں تڑھا چھوڑیا عیدی امین آوݨ سیتی بوگنڈادے خاندان تے چڑھائی کیتی بوگنڈادابھراتے این دا چاچابے سیتا نکھتا جو عیدی امین دی زال کوں وݨ پیا عیدی امین دی زال لک چھپ تے این دے چاچے نال اٹکݨ مٹکݨ کھیڈدی رہ گئی جنرل امین کوں جو سدھ پئی اوں این دے چاچے کوں چواگھدا اوں شودے دا اڄ تائیں پتہ نہ لگاجو کتھ ہے جیندا ہے یا مرگئے چڑاٹھیاں جوٻلدین تاں کاٹھیاں تڑکدین صدارتی محل تے آرمی ہاوس وچوں خبراں ٻاہر آوݨ پئے گیاں عیدی امین این دے خاندان کوں لڈوا چھوڑیا این ہوریں لڈتے لندن آگئے
ہک ڈینہہ اووی آیاجو عیدی امین دا تختہ لڈیج گیا جنرل امین کھل بچاتے سعودی عرب بھڄ ڳیا سعودی عرب عیدی امین کوں ہاں نال لایا این دے چاچے دی عاشق تے عیدی امین دی زال دی جندچھٹی تاں اووی لندن آگئی اج کل لندن دے علاقے ایسٹ ہیم اچ بارہ چلیندی ہے
این میں کنوں پاکستان دا حال حوال پچھدی ہے ساڈے حال اوں کنوں اوئیں ہی ہن پئے آکھیس بھالانواں غریبی کوں نپھرائ کوں سنڄائی کوں کال کوں بکھ کوں ڈکھ کوں تساں پاکستان چھوڑ کیوں نوھے ڈیندے

آکھیم واہ مائی واہ بھلا تھیوی ٻچے جیونی سارے پاکستان شاہی خاندان دے بندے تاں نہیں جوگھریں کوں چھوڑتے بھڄ ونڄن ول گھروں بھڄ ونڄݨ مسئلے داحل دا تاں نہیں اتھاں تاں جیڑھا گھروں نکلے اوندے نال ممتاز حیدرڈاہروی نظم جھیڑالیندی ہے گھریں کوں کوں چھڑیسوتاں ڳھر گھردی سلھ سلھ دی سندھ سندھ دے وچ سانبھیے لحظے لحظے دیاں ساریاں نشانیاں نشابر نہ رہسن گھریں کوں چھوڑیسوڳھر یں کوں نہ چھوڑوول جتھوں دے لوک بکھے غریب ہوون اولڈو تھی تے ہک جاہ توں ہڈی پٹ ٻی جاہ تے ودے ہوون تاں غریبی نال کون بھڑسی کال کوں کون منہ ڈیسی نپھرکیویں پھرسن آکھیس غریبی نال بھڑݨ سانگے کوئی تاں سکھا ہووے جے سکھے نہ ہوسوتاں بھڑسو کیویں آکھیم توں سکھی تھی گئی ہیں پہلے توں یوگنڈ ااچ بھڑانددا منڈھ ٻدجے تیں کوئی سوبھ کھٹی تاں اساں وی تیڈے نال آکھڑسوں آکھیس میں بھڑدی پئی ہے ں غریبی نال بکھ نال جہالت نال بھڑدی کھڑی ہاں ہݨ یوگینڈ اویندی ہاں تاں لوکیں کوں میڈیاں تانگھاں ہوندین اتھاں این جی اوزکم کریندیاں پئن آکھیم بھلو بھلواین جی اوز جیڑھا کم ساڈے ملک اچ کریندیاں پئن یوگینڈااچ ہی اوئیں پیاں کریندیاں ہوسن این جی اوزوی عذاب ہن جنھیں پوری ہک نسل کوں کرپٹ کیتے لوکیں دی بھڑاندودھ ڳئی ہے جڈاں لوک اٹھسن تاں انھیں کوں این جی اوزنال وی بھڑاند کرݨی پوسی
اساں این نالوبواپیٹ تے باب کنوں مکلایا تے لاشاری صیب دے اوں ڳھراچ آیوسے جتھوں اوالیکشن کھٹیندے اتے جتھاں اوندے ترئے وڈے ٻال غلام عباس عبدالرزاق تے بے نظیر رہندن ٻال اڄاں ڳھر نہیں آئے اچھا جتھ پیرہوونے اتھ خیر ہوونے ٻال پئے آوسن ویلھے تے اساں سائیں سمھدوں
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: