جون 13, 2021

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

پارلیمنٹ ہاوس ۔۔بادشاہ دی پھاسی تے عوام دی سوبھ

ٹیمز دریا دی کندھی تے پالیمنٹ ہاوس دا ایرار کھئیں ۱۰ صدیاں تھی ڳئن ہک ہزار سال پراݨی جاہ ویلھے سویلے اڄڑدی تے وسدی رہ ڳئی ہے کہیں ویلھے سٹرسواتے کیری تھئی اتے کہیں ویلھے اتھاں چوبدار ہکلاں ودے ڈیندے ہن جونگاہ روبروباادب باملاحظہ ۔۔جڈاں شاہ ایڈورڈ اینکوں بنواوݨ شروع کیتا تاں اونکوں سدھ نہ ہئی جو ٹیمزدے ٻاہروں عوام دا ٹیمزوہسی جیرھا بھاڳ وندیں دے بھاڳ کوں بھاہ لاوݨ سانگے چوانتیاں چاتی وداہوسی بادشاہ اتھاں آپݨا محل بݨوایا ہا اتے ویلھے دی ٹک ٹک پنج صدئیں تائیں ہک دے پچھوں ٻے تے ٻے دے پچھوں ٻے بادشاہ دیاں تراڈاں وی سݨدی رہ ڳئی ۔بادشاہ تراڈدے رہ گئے ٹیمزوہندارہ ڳیا اتے ویلھا بگ بین دا گھنڈ لگݨ توں وی پہلے اے یادڈویندارہ ڳیا جو سݨو ووئے لوکو وینداپل ول نوھے ولدا ۱۱۰۰ کنوں پہلے اتھاں شاہی محل بݨیا ول اتھاں ویسٹ منسٹرہال بݨوایا گیا ول ۱۱۳۵ اچ اسٹیفن بادشاہ اتھ سینٹ اسٹیفن چیپل بݨوایا ۱۵۱۲ اچ اتھاں بھالگ ڳئی بھا سٹریندی کانے ککھڑے اتے عشق سٹریندے زیرا کانے ککھڑے سٹرڳئے پر زیرا بچ گیا ویسٹ منسٹر ہال اتے سینٹ اسٹیفن چیپل جتھوں سٹریئے ول اتھاوں اساری تھئی ۱۵۲۹ اچ اٹھویں ہنری بادشاہ دے زمانے اچ پارلیمنٹ ایں محل کوں سنبھال گھدااتے بادشاہ صیب کارڈ ینل وولسے کنوں وہائٹ ہال ونداوا کراہیں اونکوں ٹور چھوڑیا اتے آپ سگھر ا اڈاہیں تے ول گیا ہنری اوبادشاہ ہا جیں برطانیہ اچ کیتھولک چرچ دا زور تروڑ یا جیویں ہر کوڑے تے سچے دوردااصلی تے نقلی بادشاہ ملاں بھوپے تے جوسی کنوں پتر منگدے ہنری وی پترمنگداہا منتاں منتیاں چاڑھے چاڑھیئے کڈھارے کڈھئے ہنری اوترک ہا اواہداہا جواوترک نہ مراں جڈاں ہاں ہٹ تھیاتاں زالیں کوں طلاق ڈے تے کہݨ تے زور چارکھیس دھی پتر ڄاپئے ول وی ہک دے بعد ٻی زال طلاق گھن تے کہیندی رہ ڳئی ڳئی زالیں کہیسج گیاں تاں بادشاہ اسپین کنوں پرنیج آیا اتھاں وت کیڑھا طارق بن زیاد یا عبدالرحمن الداخل پڄیا ٻیٹھاہا جیرھا پھل دھاگے ڈیوے ہا بادشاہ دی کاوڑ جلیڄݨ اچ نہ آوے اوں کیتھولک چرچ دے پچھوں دڳا چا گھدا پادری جھتین وچ منہ لکیندے ودے ہن ہنری کیتھولک چرچ بھنوا تے اوندی جاہ تے چرچ آف آنگلینڈ بݨوایا ہنری صیب کیتھولک فرقے دا تڈاویڑھیا پراو آپ نہ پروٹسٹنٹ ہاتے نہ کیتھولک ہک گالھ ٻی ڈسائی ونجاں جو برطانیہ دی پارلیمنٹ ۱۳۴۰ اچ ونڈیج گئی ہئی اشراف انج تے عوام انج خانیں نوابیں لاٹ صاحبیں تے اشراف دا کٹھ ہاوس آف لارڈ ز سڈیجݨ پئے گیا اتے عوام دے چنئے ممبریں دا کٹھ ہاوس آف کامنزسڈیجݨ پئے گیا ہک تھی ڳیا دارالا مراتے ٻیاتھی گیا دارا لعوام بادشاہ کوں شاہی چلاوݨ سانگے پیسہ ٹکا پونڈ پینی دی لوڑ پوندی ہئی تاں دارا لا مراتے دارا لعوام کوں سڈ مرینداہا بھڄ آو ووئے مارکا لوکیں تے ٹیکس تھپوتے ول اگاڑوآپ وی کھاو تے میکوں وی کھواو وت جڈاں اتھاں ہندوستان اچ مغل بادشاہ شاہجہاں دی زال ممتاز محل ۱۴واں ٻال جݨیدیئیں مرستی اتے بادشاہ گاہلاتھی تے وݨیں کوں چٹے ودامرینداہا اوں ویلھے برطانیہ دے ول گھنݨ سانگے ممتاز محل قبرپیا کھٹویندا ہا اتے اوڈوں لندن دے نینگر چرچ آف انگلینڈ دے ڈڈھپ تے کوڑیج تے کرامویل دی اڳوانی اچ نعرے ودے مریندے ہن ایڈوں آگر ہ اچ تاج محل دا ایراٻدھا گیا اوڈوں برطانیہ اچ گھر دی بھڑاند دا منڈھ ٻدھیج گیا اہدن دارالعوام دے ڈوممبردارلا مرا اچ پہہ گئے اوں ویلھے بادشاہ چارلس اول تقریر پیا کریندا ہا عوام دے چݨیئے ممبر کارڈ یئے کھڑے ہن انھیں آکھیا جو بادشاہ ساڈی گالھ سݨ ایں دارالامرا کوں ختم کراشراف دا کٹھ ہاوسآف لارڈز تیڈا پچھلگ ہے ایں ادارے کوں اساں نسے منیندے بادشاہ کوڑیج تے آکھیا جو انھیں ممبریں کوں پکڑ ڳھنو ونڄݨ نہ ڈیواھے ڈوھیں ممبربھڄ تے آپݨے آٹھئے اچ آن کھڑے دارالعوام دے آٹھئے اچ بادشاہ دا حکم نہ چلدا ہا لہزا سارجنٹ ایٹ آرم انھیں ممبر یں کوں پکڑݨ دی بھانہ مارسگئے اتے پچھلے پیریں پچھوں تے ول گئے گھر دی بھڑاند ۔خانہ جنگی ودھدی گئی لندن آلی بھڑاندسارے انگلینڈ آئرلینڈ اسکاٹ لینڈ ویلزاتے لمے تے پوادھی لندن اچ ہرجاہ تے درڳھر ڳئی چھیکڑ بادشاہ کوں ہتھکڑی لڳ ڳئی بادشاہ ڈور نگا تھیا کھڑاہا آپ پارلیمنٹ نال گالھیں پیا کرینداہا اتے اوندے سنگتی ساتھی بانہہ بیلی ہک ٻی بھڑانددی تیاری پئے کریندے ہن ۱۶۴۹اچ بادشاہ کوں پھاسی تے ٹنگ ڈتا گیا

بھلا کتھاں او اتھاں پارلیمنٹ ہاوس اچ پہݨ نال کھٻے پاسوں اوجاہ ہے جتھاں چارلس کوں پھاسی ڈتی گئی ہئی پارلیمنٹ ۸ ایکڑتے بݨیا کھڑے ۹۴۰ فٹ دریائے ٹیمزدی کندھی کوں پاسہ ڈتی کھڑے پارلیمنٹ ہاوس اچ کمرے چوکھے ہوسن ہاسائیں اتھاں ۱۱سوکمرے ہن ابھے پاسوں ہاوس آف لارڈزہے اتے لمے پاسوں ہاوس آف کامنز ۔سڄے پاسوں اشراف تے کبھے پاسوں عوام اشراف دے کٹھ دی جاہ ۹۰ فٹ درگھی ۴۵ فٹ چوڑی اتے ۴۵ فٹ اچی ہے اتے عوام دے ممبریں دے کٹھ دی جاہ ۱۳۰ فٹ درگھی ۴۸ فٹ چوڑی اتے ۴۳ فٹ اچی ہے دریگھ اچ عوام ودھ ڳئے اتے لمباݨ اچ اشراف واراگھن گئے عام ممبر یں دے کٹھ دی جاہ ہاوس آف کامنز دے اتوں ٹاور تے ۳۲۰ فٹ درگھی گھڑی کھڑی ہے اتے اوندی چٹنکی ٹلی یا گھنڈدا بارے ساڈھے ۱۳ ٹن ہے ہر گھنٹے دے بعد جڈاں ڳھنڈ وڄدے تاں سدھ پوندی ہے جوویلھا وہانداپئے اشرافیں تے عوام دے ممبر یں دئیں کٹھ دئیں جاہیں دے ادھواݨ اچ سینٹر ل ہال ہے جیرھا ۷۵فٹ اچاہے سینٹرل ہال دے پچادھوں سینٹ اسٹیفن ہال ہے
May be an image of 1 person
لاشاری صیب تے میں سینٹرل ہال اچ آئے کھڑوں پچھوں بے شمار لوکیں دے مجسمے لگے کھڑن ویلھاہر شئے دا پھ ڳھتیندے موت تاں مکا ڈیندی ہے ویلھے وہاوݨ دے بعد موت دے پچھوں کم جھاتیاں کھڑاپینداہوندے اوچارلس اول ٹنگیاکھڑے اے کرامویل ویندا پئے اجھوپروٹیکٹر بݨسی اتے وت ویلھا اگوں ٹرویسی تاریخ نواں پیراچیسی
کرامویل فوت تھیا تاں رچرڈ پروٹیکٹر بݨیا جیرھا پٹھی چکی دے پھیر ے ہیٹھ آگیا کھوہ دا ٹھاکݨ پچھوں تے پھریا تاں رچرڈے ۹مہینے وی نہیں لنگھا سگیا پرو٪یکٹری چھوڑتے بھڄ ڳیا ۱۶۶۰ اچ چارلس اول دا پتر آگیا محل تے تخت سنبھال تے ڈوجھاچارلس سڈاوݨ پئے گیا پیودا پور چاوݨ سانگے کرامویل دی لاش کڈھواتے اونکوں پھاسی ڈتس کرامویل دا مڑھ تاں لخطے دی پھاسی بھوگ تے ہیٹھ لہہ گیاپر پہلاتے ڈوجھا چارلس تاریخ دی پھاسی تے اڄ وی ٹنگئے کھڑن ڈٹھے وے یاکائنا
وت ویلھا ٹردارہ گیا ۱۶۸۵اچ ڈوجھا جیمزبادشاہ آگیا جیمز صیب آوݨ سیتی پارلیمنٹ دی چیل تے سٹ ماری اتے اونکوں بھن گھتیس تے کیتھولک فرقے کوں فرش کنوں چا تے عرش تے آن ٻلھایس
May be an image of 3 people
پر تھیا کیا بادشاہ دی زال پتر جݨیا تے اوندی دھی میری پئے نال رل تے پیودے پچھوں پئے ڳئی میری تے اونداپئے ولیم تکڑے تھئے ناں اشراف تے عوام کوں وی تڈآگئی انھیں بادشاہ دی دھی تے جوانتر ے دا حق من گھدابادشاہ بھڳوا ویس وٹاتے لندن وچوں ایویں نکھتا جیویں کوئی نکھتو ڑ بھڄے ۱۶۸۹ اچ ڄوانترے تخت سنبھال گھدا میری وی نال ہئی اتے اےگالھ وی مک گئی جو زوراورکون ہے اوں ڈینہہ کنوں ڳھن تے ہمیش سانگے اے گالھ طے تھی ڳئی جو پارلیمنٹ زوراورہے بادشاہ ھینا ہے بادشاہ علامت ہے عوام حقیقت ہن جتھاں میں تے لاشاری صیب کھڑوں اتھاں پارلیمنٹ دے ممبرآکھڑدن تے انھیں لوکیں کوں ملدن جیرھے انھیں کوں ملݨ سانگے آئے کھڑے ہوندن اتھاں آتے پتہ لگاجواج لارڈنزیراحمد بی بی بے نظیر بھٹو دی دعوت کیتی ہے پر کتھاں ؟اتھاں تاں ۱۱ سوکمرے جھڳےگریڑے کیڑیاں سالھیں نہ سائیں نہ !چمیبر ز کتھاں کتھاں ودے جھاتیاں ماروں پوڑئیں تے چڑھ تے پہلی منزل تے آگیوں اتھوں سجے پاسوں پھریوں ساکوں کمرہ نمبر ۶وچ ونڄݨے جتھاں ساڈھے ترئے سوسال پراݨا جھیڑانویں سروں سرچائی کھڑے لیبرپارٹی دی میٹنگ ہے ہاوس آف لادزدی ممبر بیرنس جے آتے عزرپیش کرݨے جو لیبرپارٹی ہاوس آف لارڈزکوں ختم کرݨ داقول اقرار پوراکیویں نہیں کرسگدی لیبرپارٹی دا وعدہ ہا جواوہاوس آف لارڈز دی پاڑپٹیسی تے اوندا منڈھ ڳارکر ڈیسی ۸۰ فیصد لارڈزوراثت اچ پیودی کرسی تے آن ٻہندن اتے ۲۰ فیصد لارڈز آپݨی حیاتی اچ تاں لارڈ رہندن پر انھیں دے مرونڄݨ تے سیٹ خالی تھی ویندی ہے ول جے ٹوری پارٹی دا زورہوسی تاں اوندا بندہ لارڈ بݨ ویسی اتے جے لیبرپارٹی دازورہوسی تاں لارڈ دی کرسی اوکھٹ ویسی اشراف دے کٹھ اچ لگ بھڳ ۱۳۰۰ لارڈز کٹھے تھیندن ۔۔۔لاشاری صیب لیبرپارٹی دی سیکرٹری ہک مائی کنوں میڈے میٹنگ اچ بہݨ دی موکل گھدی ہݨ بیرنس جے دی تانگھ ہے جے جے جوان ہووے ہا تاں لارڈ سڈاوے ہا تریمت ہے ھیں ڳالھوں بیرنس سڈویندی ہے
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: