مارچ 28, 2024

ڈیلی سویل۔۔ زمیں زاد کی خبر

Daily Swail-Native News Narrative

سینے جھوکاں دیدیں دیرے سرائیکی وسوں دے جگ مشہور صحافی تے دانشور سئیں نذیر لغاری دی پندھ وہانی ہے قسط وار ڈیلی سویل دے قارئین دی نذر
نذیر لغاری
۔۔۔۔۔۔۔۔۔۔۔۔۔۔۔۔۔۔

ہک پل وچ صدیاں جی آیا

لندن کنوں ٻاہر نکل ایم ون تے چڑھوتاں سبھ توں پہلے ایسکس کاونٹی آندی ہے اگوں بکنھگھم تے بیڈ فورڈ شائرامدن ہک پاسوں ہیچن شہر ہے جتھاں اردو دے جگ مشہور ناول ۔۔اداس نسلیس دا لکھاری عبداللہ حسین رہندے ڈربی شائر کاونٹی شروع تھئی تاں ساکوں ڈربی ریس یاد آڳئی ریس اچ گھوڑ‘ے بھڄدن اتے گوکھٹن آلا گھوڑا چھڑی لنگی نہیں کھٹیند اپنے سائیں کوں کروڑ پتی وی بناڈیندے جے گھوڑا ذری جتی ہمت چاکرے تاں پچھیں پنجائے گھیواچ ہوا اچ خوشبورچ ڳئی باہر دا منظر خواب کنوں وی ڈھیر سوہنا ہے شالا روہی وس پووے ہا وت خیال آیا جو ان ڈٹھی تے اے قہر لتھا پئے جو دیس دیاں ڳجھیں وات پٹ تے لہندیاں پئن جے وس پئی تاں وت کیا تھیسی جے دھرتی واس ھیݨے ہوون بھڑݨ دا ڈانہ آندا ہووے ہک ارا دے پچھوں سکے بھراکوں مارگھتن تے لکھاں ایکڑ کھسیجݨ تے چپ کرٻہݨ ٹکے دی گالھ تے کاتیا ں کہاڑیاں کڈھی ودے ہوون اتے آپݨے حق دی گالھ تے چھئو ماربہݨ ملاں دے آکھئے تے ساہ تلی تے رکھ تے مسیت دا مصلااتے غازی دا علم رت ورتاں چاکرن تے دھرتی ما دا بوچھݨ کھسیجݨ تے مپ مارٻہݨ تاں روہی تھل دمان تے گڄھیں نہ لہسن تاں ٻیا کیا تھیسی اوڑک شام غریبا ں ڈھکسی ٻاہروں خوشبو دی جھمر ہے اندروں ہاں دی دوانکھ ہے ٻاہروں ہیل ہے اندروں سیک ہے سکھویندرتے ئلکادی کئو کنیں پئی تاں اصلوں ایویں لگا جوجیویں زمین تݨاویں میل گھدے ہووݨ ویلھا سہک تے کھڑ ڳیا ہووے ایں کئو کوں کیا ناں ڈیوں کیا اے لنگیں اچ وہندے لہودی البیلی ٹور دا میوزک ہے یاول روہ ڈونگر توں آبشار پئی ڈھنہدی ہے مٹھاوݨ دا مٹھاج ہے یا کاہائیں دی اٻاہل ہے اے کھنبھا ݨی دی زوں زوں زکاٹ ہے یا چھاٹ دی چاٹ ہے چاٹ تاں ضرور ہے عشق نہیں ھے چاٹ غضب دی میں پریم پیالہ پی آیا ہک پل وچ صدیاں جی آیا اوئے رمتا جوگی ہوئے ہوئے ۔۔۔اکھ دی حدتائیں پھل ہی پھل ہن اکھ دی حدتائیں ساول ساول سانول سانول ساول ساوݨ ڳولے من دے اندروں تریہہ پئی کوکے ٻاہروں بارش تھیوے دل دریا سمندرگولے پاݨی پیچ رساوے اوکھئیں سوکھئیں عشق رنجھیٹا کھڑئیں نال نبھاوے تھل مارودی اکھ دا پاݨی کیچوں کیچ سڈاوے کیچ نظرنہ آوے توں جان جنون دا حال نہ پچھ اکھ ہے بدلا ساون دا تے اکھ ہی روہی راوے جاں وصل وصال دی خوشبو آوے ہجردی ڈیݨ ڈراوے مومل راگ پہاڑی آکھے راݨا جوڳ سݨاوے ڄوگ دے روگ دا سونہاں کون ہے کیرھا بھوگ ہنڈھاوے روح تاں نت نڄردی رہ ڳئی روح کوں نینھ دا رولو رہزن پل پل آن ستاوے مٹھڑی واٹاں تیڈیاں ڈیکھے واٹ تتی کوں تاوےڈس تیڈی نہ آوے تن تے بدلا پورب وسے من وچ ٹوبھا سکے آتݨ وچ بہہ چرکھا کتاں پوݨی تندنہ سانٻھے دل دلیلاں چھوڑ یہے تاں چیتا چنتے وات ہے ہائے وے لوکو میں مٹھڑی کوں نت سانول دی تات ہے سانول دی کیا بات ہے سسڑی تتڑی شہر بھنبھوروں سوہا ساڑتے بھڄے لانڈھی توں ہنگلاج توڑیں پئی پنوں پنوں کوکے سوہݨی کچا گھڑاگھن تے سونہیاں چھولیاں ڳولے ہر چھولی پئی اوپری لگے چوگر ووں ڳھاݨ ڈکھالیا ں ڈیون کچا گھڑا کوڑی یاری کوڑا کوڑ کماوے یار عزیز پیا ہکلاں ڈیوے دھرتی دھرتی دربھ لتڑیندئیں پیریں چھالے پھس گئے اونکوں آکھوساڈے سرتوں پھل تاں آن لہاوے ألکا پچھدی ہے یہ جوگ لیا کس کارن یہ جوگ لیا کس کارن سکھو یندر ولدا ڈیندے اک جوگن دیکھی بستی میں اک موج اٹھی تو مستی میں دل بھی آیا میں پی آیا میں پریم پیالہ پی آیا اک پل وچ صدیاں جی آیا
May be an image of 4 people
جوڳݨ کون ہئی وستی کیرھی ہئی اگوں نار تھمپٹن سٹی ہے جتھوں دے سنہپ دنیا دی چنڈ چنڈ دے ارباں انسانیں کوں آپݨا اسیر کیتا ہک براعظم توں بیا براعظم ہک ملک توں بیا ملک ہک شہر توں بیا شہر ہک وستی توں پی وستی ہک بندے توں بیا بندہ کون ہے جیرھا ایں حسن دا سونہاں کائنی جی ہا سائیں اے مرکھٹڑی ڈیا نا دی وستی ہے جتھاں چودھاروں اچھریئے پانی دی ڈھنڈ دے اندر أچی جاہ تے لال گلابیں دی ادھوان اچ اوندا گلاب جسم ستائے ۔۔۔میاں افضل خالد پچھیا گاڈی پھیر وں ڄلوں نار تھمپٹن ۔۔۔اکھیم سائیں کائنا ڈیانا قلو پطرہ ہیلن آف ٹرائے مونا لیزا کیندا کیندا ہند ھیرا ودے گولوں ’نارتھپٹن آیوں اے ہݨ سڄے پاسوں نوٹنگھم ہے اتے کھٻے پاسوں کجھ پروبھرا برمنگھم ہے ایم ون کنوں ایم ۶ پھرویسی میں تے فریدی صیب ولدے سال اتھاوں پھرتے برمنگھم کنوں ٹپدے اسکاٹ لینڈ دو گئے ہاسے نوٹنگھم دے نال گھادے میدانیں دے نال نال جنگل دی شروع تھی ویندن ۔بھلااے کون پیا ویندے ڈانددے سنگیں آلا ہک ڈو ترئے چار اے سارے ڈاندیں دے سنگ کیوں لائی ودن ساوے کپڑے پاتی ودن ویلھا ہزار سال پچھوتے بھڄ پیا اتے اساں کیاڈہدوں جونوٹنگھم دے جنگیں وچ رابن ہڈودے ساوا کھلکھا پا تے اپنی سنگت جوڑی ودے رابن ہڈلٹ مارودا کریندے امیریں کنوں کھس تے غریبیں وچ ودا ولھیندے جڈاں کیتھولک تے پروٹسٹنٹ دا جھیڑا ناں تھیا ہا اتے یورپ تے چھڑا کیتھو لک چرچ راڄ کرینداہا اوں ویلھے برطانیہ اچ ہر سال پہلی مئی کوں رابن ہڈدا ڈینہہ منایا ویندا ہا رابن ہڈ دا دور ۱۱۰۰ھے رابن ہڈدھاڑے مرینداہا اووی شئت اللہ بخش پتھرہا منکن کلاتی ہا موسی لکھ پال ہا یاول سندھ دا پرو چانڈیو ہا جے اووی ناں ہا تاں ول پک سمجھو جو محب شیدی ہوسی ووئے سائیں کائنا رابن ہڈ بس رابن ہڈ ہا دے زمانے وچ بادشاہ تے چرچ کٹھے رلیے کھڑے ہن ھیں ڳالھوں چوری کرݨ کوئی سوکھا کم کائنا ہا جے کوئی چوری کریندا پکڑیج پووے ہا یا دھاڑیل ہتھ آونجے ہا اونکوں قطح یددی سزا ملدی ہئی بادشا دے حکم تے اوندا ہتھ کپ گھدا وینداہا اوں زمانے وچ ہرݨ دا شکار صرف امیر کر سکدے ہن کہیں غریب کوں ہرݨ دا شکار کرݨ اتے ہرݨ دا ماس کھاوݨ دا حق کائنا ہا غریب سیالے وچ ہرݨ دی کھل دی نہ پاسگدا ہا باقی اوں زمانے وچ تیر مارݨ دا ڈا آوݨ ضروری ہا جیرھا ہل وہاوے ہا اوندے سانگے تیر چلاوݨ سکھݨ دا قانونی حکم ہا تیر کمان دا باقاعدہ درس تھینداہا تے بادشاہ دے حکم تے ہر بندہ تیر چلاوݨ ڄاݨداہا اینجھا مغز پھر یا بادشاہ ساکوں نہ ملیا نہ نیناں دے تیر چلن ہا اتے نہ فرید آکھےہاجو نہ مار نیناں دے تیروے سانولا نہ مار نینا دے تیر رابن ہڈ ہر ویلھے تیر کمان تے تلوار نال رکھدا ہا جتھاں ٹکداہا اتھاں دردے ٻاہروں وڈی لکڑ وی ضرور رکھدا ہا ڈنگوری پئی رہے کہیں ویلھے تاں کم آوسی اوکھے سوکھے ویلھے کہیں دے سراچ تاں ونج درنج تھیسی
اوندے سنگتی وی رابن ہڈ سڈویندے ہن ساڈا خیال ہا جو ہزار سال پہلے بادشاہ دے راکھویں پولیس والے باد شاہ دی منشا کوں قانون جاݨ تے رابن ہڈ کوں بدھ تے گھن آئے ہوسن اتے بادشاہ اوں کنوں آپݨی چیل چھڑوݨ سانگے کہیں شعیب سڈل کہیں کیپٹن بلوچ کہیں ذیشان کاظمی کہیں سرور کمانڈویا کہیں توفیق زاہددے ہتھو ں پولیس مقابلے وچ مرواسٹیا ہوسی شئت اوں زمانے اچ پولیس مقابلے کھیڈݨ داردواڄ کائنا ایں ڳالھوں باد شاہ اونکوں زہر ڈے تے مروا ڈتا پچھلے میلئیم دے منڈھ اچ موت دی سزا ہک پڑی نال ڈتی ویندی ہوسی جے ایں نہ ہووے ہا تاں یونان دے سقراط دی روایت کوں نبھاوݨ سانگے رابن ہڈ کوں زہر کیوں ملے ہا رابن ہڈ کوں مارݨ دے بعد باد شاہ اونکوں پورݨ دا مسئلہ وی حل کرڈتا اوں کمان اچ تیر پاتے ساراز ورلاتا جتھ تیر ونج پیا بادشاہ أن تے اشارہ کرتے آکھیا جو رابن ہڈ کوں اتھ ونج پور و لوک تاں اے وی اہدن جو رابن ہڈ کہیں دے ہتھ آیا نہ کہیں دے ہتھوں مویا نوٹنگھم اچ میلے ٹھیلے تھیندن تاں لوک رابن ہڈ کوں یاد کریندن کتھائیں نانا درݨ اتے کتھائیں ڈتن لشاری ستے نندر کریندے پئن ول وی جی وی کئو تے جاگدے وی پئن تے قصہ وی سݨییدے پئن جے ڈتݨ لاشاری کوں جی نہ کریسوتاں کراڑے مارݨ پئے ویسی ہک ہا بادشاہ بادشاہ آپ خدا ہے او زمین دے ٹوٹے دا باد شاہ ہا اوہک چور دھاڑیل ڈاکوں کنوں پریشان ہا اوں ڈاکوں دا ناں ہارابن ہڈ اصل گالھ اے ھے جو نانے درݨ اے ڈتݨ لشاری کوں لندن ونجݨ دا خیال نہ آیا جے انھیں کوں اے خیال آویندا تاں ول رابن ہڈ دے قصے آکھݨ اچ انگریز یں کنوں اگوں نکل ونڄن ہا رابن ہڈ دے پچھوں اوندا ناں ٹردارہ گئے اوندے بعد اوندے سنگتی وی رابن ہڈ سڈویندے ہن اتے ایہو کم کریندے ہن پر بادشاہ کوں فوجی آپریشن دا خیال نہ آیا
May be an image of 1 person
جے بادشاہ سلامت کوں اے قیمتی خیال آویندا تاں ڈاہ ٻارہاں ہزار رابن ہڈ تاں مریج ونجن ہا پر ہر علاقے اچ امن تھی ونجے ہا لوک سکھ دا ساہ گھنن ہا ۱۵۰۰ اچ چھاپا مشین دے تیارتھیوݨ دے بعد پہلی دفعہ رابن ہڈ دا قصہ لکھیا گئے ول کتاباں لکھیندیاں رہ گیاں فلماں بݨدیا ں رہ گیاں امیریں کوں لٹ تے غریبیں اچ ونڈݨ ولہاوݨ والا ڈاکو ہک عالمی کردار بݨ ڳیا پر ساڈے موسی لکھ پال تے شملے شیر کو کہیں ناں یاد کیتا پچھلی صدی اچ اے وی تاں انگریزیں کوں ایویں پٹوائی رہ گئن ہݨ سجے پاسوں ترے چمنئیں وچوں دھوں پیا نکلدے اے کول فلیڈ ہے اتھو کولا کڈھیاویندے جیرھا وی ایندی دلالی کریندا ہوسی اوندا منہ ضرور کالا تھیندا ہوسی اگوں شہر دے اولوں پئے نظردن شئت شفیلڈ کولھوں تھیندا آندے یاول اساں اوندے کولھو پجدےویندوں
جاری ہے ۔۔۔۔

اے وی پڑھو:

سینے جھوکاں دیدیں دیرے(15)۔۔۔ نذیر لغاری

سینے جھوکاں دیدیں دیرے(14)۔۔۔ نذیر لغاری

سینے جھوکاں دیدیں دیرے(13)۔۔۔ نذیر لغاری

سینے جھوکاں دیدیں دیرے(12)۔۔۔ نذیر لغاری

سینے جھوکاں دیدیں دیرے(11)۔۔۔ نذیر لغاری

سینے جھوکاں دیدیں دیرے(10)۔۔۔ نذیر لغاری

سینے جھوکاں دیدیں دیرے(9)۔۔۔ نذیر لغاری

سینے جھوکاں دیدیں دیرے(8)۔۔۔ نذیر لغاری

سینے جھوکاں دیدیں دیرے(7)۔۔۔ نذیر لغاری

نذیر لغاری سئیں دیاں بیاں لکھتاں پڑھو

%d bloggers like this: