فروری 25, 2021

ڈیلی سویل۔۔ زمیں زاد کی خبر

Daily Swail-Native News Narrative

تھل گریٹر کینال تھل کہانی(4)۔۔۔فضل رب لُنڈ

تھل دے منظر دی چس چنڑیں دی ساول تھل وچ ہک بہار لائی پئی ھئی اساں چس نال پندھ کریندے پئے ہاسے ہکی پکی عمر دا بندہ جیرھا سڑک تیں کھڑا ھا ساکوں رکنڑ دا اشارہ کیتا اساں رک گئے اونہہ آ کھیا میکوں گوہر آ لے اڈے تک چاتی جلو

فضل رب لُنڈ 

۔۔۔۔۔۔۔۔۔۔۔۔۔۔۔۔۔۔۔۔۔

پٹواری نال رابطے دے بعد اساں منکیرہ شہر دو سفر شروع کیتا بڈدی دیغر ھئی سجھ لاٹ پلاٹی ھا ڈینہہ لہنڑ دے منظر تھل دے منظر کوں مزید دل فریب کرڈتا ھا ڈینہہ کوں دھپ وچ تھل دے جیرھے ٹبے چاندی دے لگدے پئے ھن ھنڑ سجھ دی لالی دے نال سونے دے لگن پئے گئے ھن۔
منکیرہ تئیں پجدیں ساکوں عشاء تھی گئی منکیرہ پہنچ کے صفدر اپنڑے ہک سنگتی نال رابط کیتا جو اساں رات منکیرہ گزرانی ھے ساڈا کوئی انتظام کرو او تاں شاید منکیرہ کائینا ھا اونہہ ساکوں اپنڑے ہک سنگتی دا نمبر ڈتا جو تساں ایندے نال رابط کرو اے تہاڈی رہائش دا انتظام کر ڈیسی اوندے نال رابط تھیا تاں انہاں اپنڑے ڈیرے دا پتہ سمجھا ڈتا ۔
اساں اوندے ڈیرے تیں پج گئے او منکیرہ دا مقامی زمیندار چھینہ تھنیدا ھا اساں رات گزاری تیں سویرے نران پانڑی کرکے اساں رکھ بابا ہوندا لال وستی چھینہ دو پندھ شروع کیتا میڈا ہک ڈو چکر پہلے وی وستی چھینہ لگ چکا ھا فون تیں رابط کیتا مارکے اکھیا تساں پہنچو اساں تہاڈا انتظار کریندے پئے ھیں اساں تھوڑی دیر بعد وستی پہنچ گئے
مارکہ کھٹے تھئے بیٹھے ھن اساں سلام ونج کیتا مارکہ حال احوال شروع کرڈتا پندرہ بندے ہوسن جنیدے وچ نوجوان بڈھڑے پکی عمراں دے لوک ھن،رکھ دے حوالے نال گالھ تھئی مارکہ پورے تھئے بیٹھے ھن دھاڑ دھاڑ کیتی پٹئیے برباد تھی گئے ھیں اساں آ کھیا ہک ہک جنڑا گالھ کرو تھئیا کیا ھے؟
ہک بزرگ ٹھڈا ساہ بھر کے آ کھیا بچڑا رکھ ہئی تاں موج ہئی ساڈی ہنڑ اپنڑے گھر بہہ کے وی بےگھر ھیں رکھ دا رقبہ فوجیں کوں الاٹ تھی گئے،اساں بہوں لڑدے بھڑدے رہ گئے ھیں ساڈی کہیں وی نہی سنڑی الٹا منکیرہ تھانڑے وچ ساڈے خلاف ناجائز پرچے تھنیدے رہ گئے ساڈے بندے ڈھکیج بدھیج گئے۔
اساں موقع تیں الاٹی فوجیں نال جسمانی طور تیں وی لڑے لیکن پوری پولیس تھانہ انہاں دے کٹھے ھا ساڈے کجھ بندے زخمی تھئے کجھ کوں پولیس بدھ تھانڑے گھن گئی اساں ایں الاٹمنٹ دے خلاف عدالت وچ وی رٹ کیتی۔ لیکن روز دی تھانڑے پولیس دی کاروائی نال ساڈے لوک تھک پئے لیکن کوئی وی مقامی سیاسی بندہ ساڈے نال نہ تھیا۔

انہاں آکھیا ساڈے مال وکا گئے جمع پونجی تھانڑے پولیس وچ لگ گئی تیں رکھ وی ہتھوں نکل گئی میں پچھیا آ خر ایویں کیوں تھئے ڈوجھے بڈھڑے ٹھڈا ساہ بھر کے آ کھے بچڑا غلطی ساری ساڈی اپنڑی ھے،

میں پچھیا بابا تہاڈی کیرھی غلطی ھے اونہہ آ کھیا ڈیکھ نہ اساں تھل وچ چنڑے کاشت کریندے نہ انہاں دے ڈڈھ وچ درد پوندا اے ساڈے تھل وچ چنڑے دی فصل ڈیہدے گئین اے ساڈے تھل دی زمین دے پچھو پئے گئے ھن۔
میں پچھیا بابا ایں الاٹمنٹ کینے پہلے تہاڈی زندگی کیویں ھئی انہاں آ کھیا رکھ وچ جڈاں ساڈے مال چردے ھن اساں اتھاں بادشاہ ہاسے ساڈی موج ھئی اساں اوکھ ڈٹھا کائینا ھا مال دے نال ٹردے پھردے ہاسے کڈاہیں بیمار وی کائینا تھئے ہاسے۔
سنجا ہک ڈنگر یا لیلا بکری جو ویچ چھوڑوں ھا چھی مہینے تک لتیں وچ سرانڑے ڈے کے ستے پئے راہندے ھاسے کہیں شئے دی پرواہ کائینا ہوندی ھئی،میں پچھیا ھنڑ تاں نہر آ ندی پئی ھے خش ہوسوبڈھڑے آ کھیا جی ھا بچھڑا بچی کچھی رکھ نہر دے ناں تیں ہتھیکی کر گھنسن اتھاں نہر دی لوڑھ کیرھی ھے میں تہاڈے سامنڑے اتھاہیں کاہی دے چار ٹپے مرینداں  تلوں پانڑی نکل آسی جیرھے ویلھے ول نہر آ ندی ھے اے تاں پورا تھل سوما تھی ویسی، میڈا بچڑا ول اساں کن ویسوں کوئی پتہ کائینی ؟

ایں دروان چاہ تیں بسکٹ آ گئے چاہ تیں گپ شپ کھٹے چلدی رہی چاہ دے بعد اساں اجازت منگی انہاں کینے روانہ تھی اساں رکھ گویر آ لے دو پندھ شروع کیتا۔

تھل دے منظر دی چس چنڑیں دی ساول تھل وچ ہک بہار لائی پئی ھئی اساں چس نال پندھ کریندے پئے ہاسے ہکی پکی عمر دا بندہ جیرھا سڑک تیں کھڑا ھا ساکوں رکنڑ دا اشارہ کیتا اساں رک گئے اونہہ آ کھیا میکوں گوہر آ لے اڈے تک چاتی جلو
اساں آ کھیا آ ونج چاچا او ساڈے نال گاڈی وچ بہہ گیا، چاچے کینے گزرگزران دا پچھیا تاں جنڑے آ کھیا میڈی زمین تاں ھے کائینا اٹھ ڈاہ ڈنگر ھن اللہ دا فرش ھے چر آ ندن حیاتی سوہنڑی گزردی پئی ھے میں پچھیا چاچا گوہر آ لے اڈے تیں کیا کرنڑ ویندا پئیں آ کھیا اے ہفتے کھن دے کٹھے کیتے انڈے ھن انہاں کوں ویچنڑ ویندا پیاں ول کوئی سبزی مبزی وی گھدی آ سا حال احوال چلدا پئیا ھا اڈا گوہر آ لہ وی آگیا
ساکوں وی چاہ پیتے ڈھیر ٹائم گزر گیا ھا اساں وی اوندے نال لہہ گئے اوکوں نال رلا کے ہوٹل تیں چاہ دا آکھیا تیں جوان اپنڑے کھیسے وچ ہتھ ماریا آ کھیا تہاکوں تھل دا تحفہ تاں ڈیواں جوان کھیسے وچوں مٹھ بھر کڈھی تاں بھنے چنڑے بھنا بیج نال گڑ دی ٹھاپ لگی ہوئی
میکوں تاں وڈی چس آ ئی کیوں جو میڈا تاں اے چھوٹے لا دا ذائقہ ھا اماں ساکوں سیالے کوں ایویں مرونڈے بنڑا ڈیندی ھئی صفدر ثیں اسد وی کھادے پتہ نہی انہاں کوں کیویں لگے؟
تھل اچ چردے مال دا منظر
تھل دی مائی جال
تھل اچ جال دا بوٹا
تھل اچ چردے مال دا منظر
تھل دا فلورا
تھل دا فلورا
%d bloggers like this: