استاد نذیر فیض مگی ہک باغی شاعر دی برسی||اکبر ملکانی

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

استاد نذیر فیض مگی ہک باغی شاعر دی برسی۔ مشاعرہ۔موسیقی۔میلہ۔نور اسور تک جھمر
۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔
23 اکتوبر دا سجھ جو ابھردے ۔استاد نزیر فیض مگی ہر غیرت مند محبت کرنڑ آلے وسیب زادے دے مونڈھے تیں ہتھ رکھ تیں یاد ڈیویندے۔متاں سمجھو میں مر گیاں۔میں جینداں ۔اج شام کوں فاضل پور وچ میڈی سوچ دے وارث فیصل نزیر مگی۔عنصر نزیر مگی۔طاہر مگی۔اصف مگی۔سردار منظور احمد خاں دریشک۔عاشق خاں بزدار۔روف خاں لنڈ۔ سبطین خاں گوپانگ۔قصور خاں دریشک۔قصور خاں بزدار۔جاویداصف۔سمیع مجاز۔جام شوکت عزیز۔حسن رضا خاں دریشک میڈے جیونڑ کوں سچی سچ ڈکھالنڑ سانگے برسی۔ورھینے دے ناں تیں پوری رات جاگنڑ دا ہک پروگرام ترتیب ڈتی کھڑن۔میں وی بہشت وچو اللہ سئیں کوں ہیں ہک رات دی چھٹی دی درخوست پیش کیتی اے۔جیرھی اللہ سئیںں نیں بخوشی منظور کر گھدی اے۔ایں برسی۔ورہینے۔میلے موسیقی جھمر دے پڑ وچ میں خود وی شامل ھوساں۔تساں ضرور اوسو تفصیل نال گالہیں وت اتھائیں کریسوں۔اتھائیں ڈسیساں لوکیں کوں مرنڑ دے بعد کیویں جویندے۔اے وی ڈسیساں لوکیں کوں او کیرھا عمل ھوندے جیندے کرنڑ نال بندہ مرنڑ دے بعد وی مردا نئیں انویں جیندا رہ ویندے۔انویں وسیب دی خشی غمی وچ شامل ھوندے۔ اے وی ڈسیساں وسیب دے کہیں پڑ وچ جتھاں جھمر دا پھیرا لگدے میڈے سمیت صادق خاں بزدار۔لیاقت خاں بزدار۔ساغر خاں بزدار ۔حافظ سہیل بزدار۔عنایت خاں بزدار۔مختیار قیصر خاں بزدار۔ملک منظور بھوہڑ۔کریم نواز خاں کورائی۔امین خاں گوپانگ۔جام تاج برڑہ۔امجد عباس عباسی۔خادم خاں گشکوری۔مرید احمد خاں گلفاد۔لیاقت علی خاں گلفاز۔پیلا خاں گلفاز۔ارشاد تونسوی۔شمیم عارف قریشی۔شوکت مغل۔سید محسن نقوی۔سعید اخترسیال۔عقیل چکڑیال۔ظہور دمانی۔سلیم شھزاد ۔اجمل مہار۔منیر دھریجہ۔ایوب دھریجہ۔غلام یسین فخری دھریجہ۔فدا شفیع دھریجہ۔مقبول دھریجہ اساں سارے تحریک دے فقیر فقرا لوک سرور کربلائی۔حمید اصغر شاہین۔تاج محمد خاں لنگاہ۔ مرید حسین خاں راز جتوئی۔صوفی تاج خاں گوپانگ۔خادم حسین جھومری کھوسہ دی قیادت وچ جھمر دے ہر پھردے پھیر وچ شامل ھوندوں۔

میں اکبر ملکانڑیں کوں وی 23 اکتوبر دی سویل کوں نندرو جگا کیں آکھیس پتہ تیں تیکوں ھ پیا۔اج شام کوں فاضل پور وچ تیڈے بھتریجے۔بھنڑینجے انہیں دی سنگت واٹ رل کیں میڈی برسی منیدے پئین۔شام کوں لازمی تشریف گھن اواھے۔میڈے بھتریجے اپڑیں پتر سجاد اکبر خاں کوں وی ضرور نال اناھےتیں اپڑیں چھوٹے بھرا اسلم خاں۔حاجی غلام شبیر خاں بزدار۔عمر خاں بزدار۔راوی صاحب منظور ٹھلا کوں ڈسیسو۔بلکہ نال انیسو۔پچھلے سال تاں توھاڈی مجبوری ھئی۔تساں اسلام آباد ہسپتال وچ داخل ھاوے توھاڈی نماندگی بلکل توھاڈے پتر سجاد خاں نیں کیتی ھئی اور بھرپور کیتی ھئی۔ڈاڈھی سونڑہیں گفتگو کیتی ھئی۔میڈا دل ڈاڈھا خش تھی پیا ھا۔ میں ڈسیئے ساڈی انونڑ دی مکمل تیاری اے۔کل ملک محمد سلیم بھٹہ ایڈوکیٹ نال پروگرام بنڑیئے۔ کیوں جو انہیں کوں برسی دا دعوت نامہ مل چکیا ھا۔سردار منظور احمد خاں دریشک ۔سردار عاشق خاں بزدار۔سردار رؤف خاں لنڈ نال وی پروگرام بنڑ چکیا ھا۔
میں سویلے 10 وجے ملک سلیم صاحب نال رابطہ کیتے شام کوں فاضلپور جلنڑ دا کیا پروگرام اے۔ساڈی سنگت وچ ملک محمد سلیم بھٹہ علمی ادبی روایات دا علمبردار شاندار آدمی اے۔ڈھیر جہیں تیں اجکل ساڈا اکثر گاڈا گھیلی رہندے۔مہربانی اے انہیں دی ۔انہیں ڈسیئے شام کوں چار وجے اساں اتھو دیرہ غازیخاں کنوں نکلسوں۔ملک صاحب اے وی پچھیا سجاد خاں جلدا پئے۔میں ملک صاحب کوں ڈسیئے سجاد خاں ملتان ما کوں ملنڑ ویندا پئے۔اوندی جاہ تیں پارٹی دے طلبا ونگ دے مرکزی صدر انجینیر ھادی خاں گاڈی جلدا پئے۔ملک صاحب نیں فرمائے ٹھیک اے۔اتھو فرمائے اساں ہیں آگو جامپور کنوں چوتھا سردار رؤف خاں لنڈ انتظار وچ اے۔ھونکوں 5 وجے دا ٹائم ڈتے اونکوں نال کرکیں پہلے سدھا راجن پور سردار منظور احمد خاں دریشک دے بوہے تیں جلسوں۔چیرمین بحال تھیونڑ دی مبارخ ڈیسوں۔دیرے کنوں میں چار پھلیں دی مالا گدھی آیاں خان صاحب کوں او وی پویسوں۔جامپور کنوں ٹردیں ھوئیں سردار رؤف خاں نیں رابطہ کرکیں سردار منظور خاں ڈس ڈتا اساں ملک سلیم بھٹہ صاحب دی قیادت وچ مبارکباد ڈیونڑ سانگے گوپے تیں حاضر تھیندے پیوں۔
بخیرو عافیت گوپے تیں پج گیوسے۔سردار منظور خاں اپڑیں سارے پتریں سمیت انتظار وچ ھا۔یار دوست وی استاد نزیر فیض دے میلے مشاعرے تیں انونڑ سانگے گوپے تیں موجود ہن۔ملک صاحب نیں اساں سمیت سردار صاحب کوں مبارخ باد وی ڈتی۔پھلیں دے ھار وی پوائے۔ادھے منے گھنٹے بعد دستر خواں لگ گیا۔ساڈے نال فرید بخش ڈاھا وی شامل تھی گیا۔فرید بخش ڈاھا یاریں دایار مٹھا مانڑوں اے۔ہر کہیں کوں چنگاں لگدے۔سعید خاں پٹھان وی فاضل پور جلنڑ کہتے تیار تھی تیں اگیا۔جمشید بدلے خاں گوپے دی خدمت گزاری وچ شامل ھا۔کھانا لگا۔حسب اے دستور دیسی مرغی دا سالن۔بٹیرے۔مچھی ۔ چاول کھا نا بہوں زیادہ ھا۔جیویں گوپے دی ریت روایت اے۔ساریں سنگتیں رل کیں پرباش کھانا کھادھے۔جیرھے کھانے وچ سردار رؤف خاں لنڈ ھووے اتھ کھانے دی وت چس بی ھوندی اے۔بھائیوالیں کوں کھلوانونڑ وچ دکھائی رہندے۔کھانا تقریبن آپ کھندے۔مگر گوپے دا کھانا ضرورت توں زیادہ ھونونڑ دی وجہ نال بہوں زیادہ بچ ویندے۔جینکوں ملازم۔مسافر کم کار واسطے آئے ھوئے لوک پرباش تھی تیں کھندن۔اللہ تعالیٰ ایں گوپے دا حامی او ناصر ھوے۔جتھاں انسانیں کوں عزت ملدی اے۔دوستیں دے مل بہنڑ دی گولی شاندار جاہ اے۔
ترائے کاریں دے نال سردار صاحب دے قافلے وچ میڈے سمیت سرائیکی دانشور ملک محمد سلیم بھٹہ صاحب ایڈوکیٹ۔سرائیکی دانشور سردار عبدالروف خاں لنڈ ایڈوکیٹ۔پاکستان عوامی سرائیکی پارٹی طلبا ونگ دے مرکزی صدر انجینیر عبدالھادی خاں گاڈی بلوچ۔ سردار منظور احمد دریشک دے پتر سردار قصور خاں دریشک تحصیلدار صاحب۔سردار شاہنواز خاں عرف شانی خاں دریشک ایڈوکیٹ۔سردار صاحب دے کلوز دوست فرید بخش خاں ڈاھا تیں سعید خاں پٹھان تیں بے کجھ لوک جیرھے میڈے شناسے نہ ہن۔ ساڈا قافلہ ٹھیک 9,30 وجے فاضل پور پنڈال وچ پہنچا۔جتھاں جھمر دا ہک وڈا پڑ لگا پیا ھا۔ایں جھمر دے پڑ وچ پرو فیشنل جھومری نہ ہن۔او او جھومری ہن۔جنہیں اندرو بھا دا بھانبھڑ بلدے۔روح دے روگی جیویں انہیں دی کوئی شئے رل گئی ھووے۔تہوں اے آپ نئیں نچدے انہیں دا اندری نچدے۔تاج خاں گوپانگ ہرجاہ تیں اہدا رہ ویندا ھا۔حاجی عزیز گلیار سرائیکی دی دل دل اے۔دل تیں پیش پانونڑیں۔اج وی آوندی جھمر انویں نشابر ھئی۔ایہو حاجی عزیز گلیار اہدے جڈاں میں مراں میڈی میت کوں فاضلپور دے چوک وچ رکھ کیں جھمر مراھے۔میڈی لاش دے وارث میڈا خاندان ھوسی۔میڈے وارث میڈے سرائیکی یار بیلی ھوسن۔ایہا میڈی وصیت اے۔
جڈاں جھمر دا پڑ مکے انتظامیہ نیں انونڑ آلیں مہمانیں کوں اجرکاں پوا استقبال کیتا۔ہک لنگ تاں پنڈال وچ اجرکیں دی بہار اگئی۔طاہر مگی
ٹھیک 9 وج کیں 45 منٹ تیں محفل اے مشاعرے دی کاروائی شروع تھئی۔شاعر اتلا زیادہ تیں نمہیں سڈیئے۔جیرھے ہن کمال شاعر ہن۔عاشق بزدار۔اخلاق مزاری۔جاویداصف۔ساجد علی پوری۔ارشادناصر۔پنل جتوئی۔خلیل فریدی۔عبدالکریم محسن۔بلاول مہار ۔حافظ فیاض غلاب۔زاھد گبول راجنپور۔اصغر احمدانی۔امداد اعوان علی پوری بے وی کافی شاعر ہن۔انہیں جیرھے شاعریں دے ناں میں لکھیںن انہیں وچ تقریبن سارے اکثر کجھ تاں زاتی میڈے دوست ۔نیازمند بال ہن۔ڈھیر میڈے چھوٹے بھرا اسلم خاں دے دوست ہن۔جنہیں کوں اکثر میں ڈھیر مشاعریں تیں سنڑدا رہ وینداں۔مگر بنہیں مشاعریں دے برعکس ایں مشاعرے تیں انہیں ساریں شاعریں کمال شاعری کیتی اے۔اور جدید انقلابی شاعری کیتی اے۔دور اے حاضرہ دی جدید اور فکری شاعری پیش کیتی اے۔بلاول مہار تیں ارشاد ناصر نیں تیں حد مکا چھوڑی اے۔بلاول مہار کوں میں پہلی دفعہ سنڑیئے۔جئیں پورے مجمعے کوں ساکت کر ڈتے۔جئیں لوکیں دے چہرے توں زوریں ریت کھل کھسں کیں رواونڑ تیں مجبور کر ڈتے۔ارشاد ناصر کوں ول ول سنڑنڑ تیں مجبور کر ڈتے۔عاشق بزدار خرابی اے صحت دی وجہ نال مشاعرہ تیں نئیں پڑھ سگیا۔مگر ہشاش بشاش مشاعرے وچ موجود ریہے۔سٹیج تیں انہیں دی نماندگی انہیں دے نامور سٹیجر پتر سردار قسور خاں بزدار نیں کیتی اے۔اور خوب کیتی اے۔عاشق خاں دی کمال نظم پڑھی اے۔ عاشق خاں آپ وی پروگرام دے آخر تک مشاعرے وچ موجود رہ گئین۔سٹیج تیں مشاعرے اور تقریریں دی کیمپیرنگ پرو فیسر سبطین تاج خاں گوپانگ نیں کیتی۔بختیں آلا وڈے ناں آلے جوان مرحوم صوفی تاج خاں گوپانگ دا پتر اے۔مرحوم تاج خاں دی مکمل فکری سوچ دا وارث پتر اے۔خوبصورت اواز۔خوبصورت لب او لہجہ اور خوبصورت انسان اے۔تاج خاں تیں استاد نزیر فیض دا مکمل قاری اے۔ہر لطیفہ۔ہرگال۔ہرشعر دا لوظ بہ لوظ قاری اے۔تاج خاں تیں استاد نظیر دے معاشی اور غیر معاشی سارے لطیفے از بر یاد کیتی ودے۔ایویں الیندے جیویں تاج خاں کھڑا الیندا ھووے۔سٹیج دے ڈا دا جوان اے۔میڈے خیال وچ اللہ تعالیٰ نیں سٹیج دی نماندگی سرور کربلائی۔عزیز شاھد۔صادق بزدار۔پروفیسر سبطین خاں گوپانگ۔قسور خاں بزدار دے نانویں لکھ چھوڑی ھئی۔ہر بندے وچ اللہ تعالیٰ نیں کوئی نہ کوئی خدا داد صلاحیت رکھ چھوڑی اے۔مجمعے تیں مظبوط گرفت دا ناں سٹیج سیکرٹری ھوندے۔ایں کوالٹی تیں ایہے ناں پورے اندن۔مشاعرے دے وچاک وچ استاد نزیر دے بہترین دوست دے خراج وچ منظور احمد خاں دریشک۔عاشق خاں بزدار تیں میڈے کولھو سمیع مجاز دی دستار بندی کرائی گئی۔

صوبیہ ملک سنگر ریڈیو پاکستان ملتان۔خلیل فریدی۔ آصف جاوید۔حسن رضا خاں دریشک۔غلام عباس ببر۔اعظم عادل۔سراج بھٹہ نیں آواز دا او جادو جگائے۔جو کنیں اچ رس گھل گئے ، روح تازہ تھئی اے ، نزیر فیض خوش محسوس تھیندا ہا، سرور کربلائی مسکدا بیٹھا ہا، تاج خاں چس بیٹھا چیندا ہا ، صوبیہ بہوں سوہنڑے رنگ وچ سنیہڑا ڈتے

کھڑی ڈیندی ہاں سنیہڑا انہاں لوکاں کوں
مولا آن وساوے ، ساڈیاں جھوکاں کوں۔
اعظم عادل دی اپڑیں چس ھئی۔سراج بھٹہ دا ہک اپڑاں انداز ھا۔خلیل فریدی کوں تیں اللہ سئیں نیں اپڑیں صوبھ ڈتی اے۔جاوید آصف دا نمانڑاں پن مدھم سریلی آواز کوں دردیں دا داروں سمجھدن۔
اگوانڑیں وچ گال موھاڑ کرنڑ سانگے سئیں ظہور دھریجہ۔جاوید چنڑ ایڈوکیٹ۔عاشق خاں بزدار۔سردار منظور احمد خاں دریشک۔ملک محمد سلیم بھٹہ ایڈوکیٹ دیرہ غازیخاں۔سردار عبدالروف خاں لنڈ ایڈوکیٹ۔عبدالھادی گاڈی بلوچ ۔سردار حضور بخش خاں گلفاد۔طارق اسماعیل خاں احمدانی۔چاچا باسط بھٹی۔پروفیسر محبوب تابش۔پروفیسر ضیاءاللہ سیال۔ شاھنواز خاں مشوری۔عثمان کریم خاں بھٹہ ایڈو کیٹ۔مہر ابوبکر سیال۔قاری بلال۔خواجہ صالح محمد۔رزاق شاھد سئیں سٹیج تیں موجود ہن۔
پروفیسر ضیا اللہ سیال۔سردار رؤف خاں لنڈ نیں تقریر دی انتہا کرچھوڑی اے۔انہیں تقریر نئیں کیتی۔انقلاب بپا کرڈتے۔امید اے لوک بہوں کجھ سوچنڑ تیں ضرور مجبور تھیسن۔ایں میلے وچ مقررین قوم پرستی دا تکڑا پیغام کنوائے کیتے۔فقیر دے کولھو تقریر تیں ڈو وجے رات دے کرائی گئی اے۔میں تقریر دا آپ دعوے نال اہداں۔اے میڈے واسطے بہوں وڈے اعزاز دی گال اے۔میڈی تقریر کوں کوڑ سچ بیمانی عاشق خاں دی بہوں پسند کیتے ۔میکوں وی ھوندے کولھو اپروول چاہیدی ھئی۔ڈوجھی میڈے واسطے اے عزاز دی گال اے میڈی تقریر وچ لوکیں جیئے سرائیکی۔جیئے بھٹو دے نعریں دا شور مچا رہ گئے۔ہیں وجہ نال میں سمجھداں میڈی تقریر متنازعہ وی تھی سگدی اے۔چنگیں وی تھی سگدی اے۔
اے چنگاں فیصلہ کمنٹس وچ تھیسی۔جے کہیں کیتے تاں۔نہ تاں ظاہر اے ایہو کجھ سمجھساں شئیت تقریر چنگیں کئیناں ھئی۔
انونڑ سئیت میں گال کرنڑ بھل گیاں میڈے کولھو میڈے چھوٹے بھرا اسلم خاں۔میڈے پتر سجاد خاں تیں عمر خاں بزدار دا تقریبن جانڑنڑ آلیں ساریں لوکیں پچھے او کیوں نئیں ائے۔
آج دے نزیر فیض میلے وچ ہک کردار شفقت شکلی دا ھا۔جیرھے وقفے وقفے وچ لوکیں کوں وڈی چس چویندا رہ گئے۔لوکیں کوں کھلویندا رہ گئے۔شکلی سئیں میکوں تاں پورے میلے دا آل راؤنڈر لگدا ھا۔
اے استاد نزیر فیض میلا حسب اے رویات سردار رؤف خاں لنڈ دا پڑاؤ اپڑیں جماعت سمیت ہمیشہ الی کار سٹیج دے سامہڑیں زمین تیں ہرجلسے وچ جیویں ہر کہیں نال کریندے۔اوتاں ہرکہیں کوں پتہ ھ پیا۔مگر ایں میلے تیں سردار رؤف خاں لنڈ اپڑیں جماعت کامریڈیں سمیت شاید کہیں چس اچ ہا جو کہیں کوں الفوں بے ای کجھ نیسی آکھیا الایا۔اللہ تعالیٰ کرم کیتے۔
ایں پوری رات وچ ایں میلے کوں جیرھا کریڈٹ ویندے۔او اے ھ۔ایں پروگرام کوں ہرکوئی اپڑاں پروگرام سمجھ کیں پورے نظم او ضبط مظاہرہ کریندا ودا ھا۔نہ کتھاو شور ھا۔نہ شرابہ ھا۔نہ سیٹیاں ہن۔نہ کوکڑے ہن۔نہ ھوکلے ہن۔نہ کہیں کوں ھوٹ کیتا ویندا پیا ھا۔ہتھو بے تحاشا داد ڈتی ویندی پئی اے۔ایہا گال میڈے علم وچ اضافہ کریندی اے۔استاد نزیر فیض جو میکوں سویلے نندرو جگا کیں آکھیا ھا۔ میلے وچ میں ساریں سمیت شامل ھوساں۔اوھا وجہ ھئی استاد نزیر فیض میلے وچ کتھاو چوں چراں دی کاو وی کئیناں ھئی۔ رات دے چار وجدے پئے ہن جڈاں سٹیج تیں اعلان کیتا گئے ہنڑ توھاڈے سامہڑیں عظیم قلا کار غلام فرید کنیرا توھاڈے سامہڑیں اپڑیں فن دا مظاہرہ کریسی۔ میں محسوس کیتے لوکیں وچ کتھاو وی تھکاوٹ محسوس نئیں پئی تھیندی۔لوک ہتھو وادھو سادھ تھی گئین۔ایویں لگدا ھا کجھ لوک اگر ایشین اوڈیں وی تھی چکے ول سارے واپس ول ائین۔
او
جڈاں وت غلام فرید کنیرا اپڑیں مخصوص الغوزے دی آواز وچ الانڑیں ۔
اللہ جانڑے یار نہ جانڑے۔
وت ایں گیت تیں پورا پنڈال پڑ وچ ھا۔حاجی عزیز گلیار۔روف خاں لنڈ۔قصور خاں بزدار۔قصور خاں دریشک۔شانی خاں دریشک۔فریدبخش ڈاھا۔شمس واسی دے نال اتلا نوجوان جھمر وچ ہن۔نہ میں ڈس سگداں۔نہ ڈکھا سگداں۔دیکھا دیکھی وچ پنڈال وچ جھمر دے 4 پڑ سج گئین۔جیڈیں جیندی دید پندی ھئی جھمر ای جھمر ھئی۔حاجی فرید کنیرا وی سٹیج تیں مچدا ائے۔جھومری وی انویں نچدے ائیں۔پھاسی لگے نور اسور دے ویلھے تک کونجاں پھیر وچ پھردیاں ریہن۔بندے بے ھوش تھی ڈھاندے ریہن۔پتہ نئیں میلا ہو
قیامت ھئی۔منتظمین نیں فرید کنیرا کوں بانگ یاد ڈیوائی اے۔پرو گرام توڑ کوں پجے۔ہر بندے زمے واری نال استاد نزیر فیض مگی دی بارگاہ وچ محبتیں دے نزرانے پیش کیتن۔اگلا حال وت مہرے دے میلے تیں ملنڑ نال کریسوں۔
تھکاوٹ دی وجہ نال ساکوں سردار منظور خاں نیں گھنٹہ کھن گوپے تیں گزروائے۔سویلے مکمل دیسی ناشتہ کرائے۔اجازت گھن گھریں دو ٹر پئے ہئیں۔حال بے شک لمبا چوڑا ضرور اے۔مگر حال حال ھوندے۔پڑھو نہ پڑھو توھاڈی مرضی۔میڈا فرض ھا جیرھا میں پورا کیتے۔مناسب سمجھو اگر کمنٹس دے بھالے وچ ھوساں۔شکریہ۔

توھاڈا اپڑاں۔محمد اکبر خاں ذات ملکانڑیں۔قوم سرائیکی۔چیرمین پاکستان عوامی سرائیکی پارٹی ۔
سرائیکستان ھاوس دیرہ غازیخاں۔

dailyswail

See author's posts