سرائیکی لوک سانجھ شادن لُنڈ دے کٹھ دا مشترکہ تے متفقہ اعلامیہ

مشاورتی کٹھ "پی ڈی ایم مُلتان جلسہ اتے سرائیکی صوُبہ دی تحریک”

8 نومبر 2020ء (آݙت)، شادن لُنڈ

سرائیکی لوک سانجھ

قرارداداں

پارلیمانی راڄ، نیشنل ڈیموکریسی اتے ننواں میگنا کارٹا:

:1 سرائیکی لوک سانجھ، پاکستان ڈیموکریٹک موومینٹ (پی ڈی ایمPDM/) دے مُلک ءِچ جمھوُری، آئینی اتے پارلیمانی راڄ دی بالادستی قائم کرݨ دے مطالبے دی بھرپوُر حمائت کریندیءِ۔

:2 محکوُم قومیتاں دی وانج اتے احساس محروُمی مُکاوݨ اتے اِنہاں کوُں مساوی قومی حقوق دی فراھمی یقینی بݨاوݨ کیتے مُلک ءِچ نیشنل ڈیموکریسی کوُں ودھارا ݙتا ونڄے۔ اِیں سانگے چارٹر آف ڈیموکریسی دی طرز اُتیں پاکستان اِچ ننواں میگنا کارٹا کیتا ونڄے۔

سینیٹ کنیں پاس شدہ آئینی بل موُجب سرائیکی صوبہ بݨایا ونڄے۔

انتظامی اختیارات اتے مالی وسائل دی ونڈ:

:4 نیشنل فنانس کمیشن (این ایف سیNFC/) دی طرز تے، پنجاب حکوُمت فوری طور تے پروونشئل فنانس کمیشن (پی ایف سیPFC/) بݨاوے اتے سرائیکی وسیب کوُں اوُندے حصے موجب 530 ارب روپے دے مالی وسائل فراھم کرے۔

:5 وفاقی اتے صوُبائی (پنجاب) پبلک سروس کمیشن ءِچ سرائیکی وسیب دے نوجواناں کیتے مُلازمتاں دا کوٹہ مُختص کیتا ونڄے۔

:6 انڈس ریور سسٹم اتھارٹی (اِرساIRSA/) نہری پاݨی دی ونڈ ویہتر ءِچ سرائیکی وسیب دا حصہ طے کرے اتے اِیں طے شُدہ حصے دی فراھمی کوُں یقینی بݨاوے۔

قدرتی وسائل تے حق حاکمیت:

:7 سرائیکی وسیب دے تمام قدرتی وسائل بشمول زمین، جنگلات، معدنیات اتے پاݨیاں تے مقامی لوکاں دے حق حاکمیت کوُں تسلیم کیتا ونڄے۔

:8 گریٹر تھل کینال دے ناں تے تھل ءِچ زمیناں دی کھس کھو تے غیر مقامی لوکاں کوُں تھیوݨ آلیاں الاٹمینٹاں فوری طور تے بند کیتے ونڄن۔

:9 شکار گاھیں دے ناں تے چولستان ءِچ عرب شہزادیاں کوُں شکار کیتے زمیناں الاٹ کرݨ دا سلسلہ فوری طور تے بند کیتا ونڄے۔

:10 کوہِ سلیمان ءِچوُں معدنیات کڈھݨ دے منصوُبے اتے دمان دے علاقے ءِچ لڳݨ آلیاں فیکٹریاں دے ماحول اتے انسانی صحت دے انتہائی نقصان دہ اثرات تھیندے پئین۔ اِنہاں ماحول دشمن معدنی منصوُبیاں اتے فیکٹریاں کوُں فوری طور تے بند کیتا وَنڄے۔

ٻولی کلچر اتے ایجوُکیشن:

:11 سرائیکی لوک سانجھ اے سمجھیندی اے جو زبان اظہار اتے سوچݨ سمجھݨ دا اھم ذریعہ ھووݨ پاروُں ھِک اݨ مُل ثقافتی ورثہ اے اتے تمام زباناں معتبر اتے قابلِ احترام ھوندن۔ پنجاب دے سابقہ وزیر اطلاعات فیاض الحسن چوھان دے طرفوُں پنجابی زبان دی ھرزہ سرائی انتہائی افسوسناک، شرمناک اتے قابل مُذمتءِ۔

:12 سرائیکی لوک سانجھ پاکستان دیاں تل وطنی زباناں بارے پختوُنخواہ مِلی عوامی پارٹی دے اڳواݨ محموُد خان اچکزئی دے بیان دی بھرپوُر حمائت کریندیءِ۔

:13 اقوام مُتحدہ دی قرارداد موُجب سرائیکی وسیب دے ٻالاں کوُں پرائمری تئیں تعلیم اُنہاں دی ماء ٻولی (سرائیکی زبان) ءِچ ݙتی ونڄے۔

:14 سرائیکی وسیب دے تمام کالجاں اِچ سرائیکی بطور مضموُن متعارف کرایا ونڄے اتے سرائیکی لیکچررز دی تعیناتی کیتی ونڄے۔

:15 وفاقی اتے صوُبائی (پنجاب) پبلک سروس کمیشن دے تحت سی ایس ایس (CSS) اتے پی سی ایس (PCS) دے امتحاناں اِچ سرائیکی بطور مضموُن متعارف کرایا ونڄے۔

:16 مُلک ءِچ ھائیر ایجوُکیشن دے تمام تعلیمی اداریاں (میڈیکل، انجئیرنگ، آئی ٹی اتے ٻنہاں کالجاں یوُنیورسٹیاں) دے داخلیاںءِچ سرائیکی وسیب دے شاگرداں کیتے کوٹہ مُختص کیا ونڄے۔

:17 سرائیکی وسیب دے تمام یونیورسٹیز وچ سرائیکی ایم اے ڈپارٹمنٹ قائم کیتا ونڄے۔ سرائیكی ڈپارٹمنٹس، ٻئیں زبانیں تیں شعبئیں دی اوُتو والی كنوں مٔكت/آزاد تھیوین۔ ایندے نال نال سرائیکی ڈیپارٹمنٹس کوں اردو دے لِسانی اثر کنیں وی ٻاہروں رکھیا وَنڄے۔

:18 سرائیكی شاگردݨیاں ٻَہوُں اؤكھ وچو تعلیم تیں ملازمت وچ پیر ركھدئین۔ اینھیں کیتے اوُچیچے سكالرشپ، تیں خاص سیٹاں/ كوٹہ اتیں سیاسی، ثقافتی تیں آرگنائیزیشنل سكھت/ ٹریننگ دی واند موقعے سِترائت/موجوُد ہووین۔

اے وی پڑھو:سرائیکی تحریک کے ہائی جیکر اور متعصب بیانیہ۔۔ڈاکٹر رؤف قیصرانی