سندھ، سرائیکی وسیب اتے بلوچستان تے مشتمل ہک خود مختار فیڈریشن دا تصور ݙیوݨ آلے وسیب دے مفکر، مدبر، دانشور عظیم قومی رہنما سید زمان جعفری مرحوم دا شمار ملک دی صف اول دی قیادت وچ شمار تھیندا ہائی.
سید زمان جعفری معروف قومپرست اڳواݨ غوش بخش بزنجو تے قریبی ساتھی ہن اتے پارٹی وچ بزنجو صیب دے بعد سینئیر ترین رہنما ہن.
بزنجو صاحب دی پاکستان نیشنل پارٹی او اولین پارٹی ہائی جینے اپݨی پارٹی دا سرائیکستان دے ناں نال صوبائی یونٹ بݨایا.
مرحوم ترقی پسند اتے لیفٹ دے صف اول لیڈراں وچ شمار تھیندا ہائی.
1986 وچ S. S. B( سندھ، سرائیکی وسیب، بلوچستان) دے ناں تے انگلش وچ ہک کتابچہ لکھیا جیہرا انہاں معروف صحافی شبیر حسن اختر مرحوم دی مشاورت نال چھاپیا.
سید زمان جعفری دی فوتگی دے بعد انہاں دے قریبی عزیز سید رضو شاہ صیب مرحوم نے انہاں دی سیاسی سوچ فکر کوں اڳیتے ودھایا( رضو شاہ صیب دا شمار وی صف اول دی ترقی پسند قیادت وچ شمار تھیندے او تاج لنگاہ صیب دے قریبی ساتھی ہن اتے لٹریری طور تے انہاں دا ٻہوں کم اے).
اساݙے طالبعلمی دور وچ سید زمان جعفری صیب دے وررھیݨے دے موقعہ تے تمام قوماں دے اڳواݨ ملتان وچ کٹھے تھیندے ہن. مرحوم بیرسٹر تاج لنگاہ صیب سید زمان جعفری دی خدمات دا بھر پور اظہار کریندے ہن.
میکوں یاد ھ ہک واری زمان جعفری دے ورھیݨے دی تقریب دی بعد چرکے رات ویہلے ملتانوں واپس ونڄݨ لڳیوسے میݙے نال راشد عزیز بھٹہ اتے ٻئے ساتھی وی نال اساں کجھ تئیں پیریں ٹریوسے تاں پچھوں مرحوم زمان جعفری دے چھوٹے بھائی سید اظہر جعفری اپݨیاں ڳاݙیاں گھن تے آڳئے تے ٻہوں محبت نال اساکوں واپس گھن ڳئے انہاں دی فیملی دے ٻئے افراد انتہائی محبت نال رووݨ لڳ ڳئے جو اساݙے بھرا دے چاہوݨ آلے ادھی رات کوں پیریں واپس ونڄن اساں اپݨے بھرا دی روح تے تہاݙے کنوں شرمندہ ہیسے تساکوں اساں خود رحیم یار خان تئیں چھوڑ آسوں.
ٻہوں جذباتی منظر تھی ڳیا ہائی اتے اساں رات اتھائیں ٹک پیوسے.
ایں واقعہ دے بعد مرحوم دے بھرا ڈھیر عر صہ تئیں خصوصا سید اظہر جعفری فون اتے خط لکھ کراہیں خیر صلہ کریندے ریہے اتے ہر قسم دی رہنمائی اتے صلاحیں ݙیندے ریہے. اڄ البم ݙیہدے ہوئیں archives وچوں سید زمان جعفری سئیں دی تصویر سامݨے آئی تاں سوچیم تہاݙے نال شئیر کراں.
نوٹ: – اے تصویر وسیب دی معروف صحافی اتے لکھاری سئیں ارشاد امین اساݙے نال سانجھی کیتی ہائی جیندے کیتے انہاں دے تھورائیت ہیسے.
عبید خواجہ
صدر
انٹر نیشنل سرائیکی کانگریس
یہ بھی پڑھیے
”کوئی خواب میکوں اُدھارا نہ ݙیویں“ (وسیب یاترا :12)||سعید خاور
”بدن دی بھوئیں تے مُونجھ دا متام“ (وسیب یاترا :11)||سعید خاور
””سندھو سکرات وِچ اے“ (وسیب یاترا :10)||سعید خاور