ریاست دی طرفوں لایا گیا نفرت دا بیج اج ہک طاقتور وݨ بݨ گئے جیندیاں پاڑاں ملک دے ہر طبقے ہر ادارے ہر قومیت دی بنیادیں کوں ویڑھی پئین
اج ہک اسٹنٹ کمشنر ہک مشتعل مذہبی جتھے دے سامݨے جیرھی بے وسی نال بیٹھی ہئی او بے وسی صرف اوندی بے وسی نئیں او بے وسی ایں فیڈریشن دی ہر قومیت دے اوں سجاگ بندے دی اے جیرھا اج وی اکھ اچ ہک خاب رکھدے ۔
اساں خاب رکھدے ہیں
ہک ݙھینہ ساکوں
ساݙے اسم توں
ساݙے رب توں
ساݙے اپݨے آپ توں وی
وکھو وکھ کرتے
چھڑا کوئی انسان سمجھسی
وݨ پکھی جی جان سمجھسی
ݙو قومی نظریے توں گھن کے تکفیر سازی دی فیکٹریاں تک سماج کو تہہ در تہہ تقسیم کرݨ دے پچھو ہکا سوچ اے جو اینجھے نان ایشوز بݨائے ونجݨ جیندے پچھو عام آدمی دی گالھ ، تہذیب دی گالھ ، تل وطنی سوچ کو ݙکیا ونجے ۔ جمہور کوں قتل کیتا ونڄے.
چار اپریل توں گھن کے ستاہوی دسمبر تئیں تل وطنی کوں ہکا پیغام ݙتا گئے جو تہاݙی اوقات اے حے. جتھاں ہک بے ہودہ ترین عدالتی فیصلے دے پچھوں آئین دا خالق، پہلا منتخب وزیراعظم پھاسی لاݙتا ونجے ۔ جتھاں چوک اچ ݙو دفعہ دی منتخب وزیراعظم کوں رت رتو کرݙتا ونجے اتھاں کہیں وی سجاک بندے اوقات حیثیت کیڑے مکوڑے توں ودھ کینی ۔
پر شئیت اے خیال اتلا طاقتور ہوندن جو رت دے دریا جو وہا ݙتے ونجن اے نئیں ختم تھیندے ۔ اج وی اوویں انسانیت دی گالھ کرݨ والے گالھ کریندے کھڑن. اج وی رل موئی تہذیب دے وارث اپݨے ماتمی انداز اچ وسوں دے نوحے پئے لکھیندن ۔ اج وی گڑھی خدابخش دا وارث ما دا رت متھے لا تے پنڈی دے مقتل ونجݨ دا عہد کیتی بیٹھے۔
انتہا پسندی کوں جݙاں وی ݙکݨا ہوسی او تل وطنی سوچ نال ہی ممکن ہوسی ۔ ہک نا ہک ݙھینہ ایں پاسے واپس آوݨا پوسی انھاں کوں.
اساں اوں جیہاڑے ہچھسوں ساݙے اگواݨاں توں گھن تے ساݙے کیہل مہاݨے تک ساݙے سندھو دریا دی رت وہاوݨ نال تہاکوں کیا مل پئے ؟
یہ بھی پڑھیے
””میاں عثمان عباسی کنوں نکھیڑے دِی ݙَنج“ (وسیب یاترا :9)||سعید خاور
”شیر دل رانی، مائی چھاگلی (وسیب یاترا :8)||سعید خاور
”چِڑیاں اُٹھو کوئی دھاں کرو“ (وسیب یاترا :7)||سعید خاور