مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

اخلاقی اقدار مُتوں سوسائٹی اچ ڈاڈھے دے خلاف مزاحمت دی ریت ہی ختم تھی ویندی ھے۔ جیندی وجہ کولو کہیں وڈی سیاسی تبدیلی دی توقع رکھݨ غیر منطقی ھے۔ لہذا اے توقع نہ رکھو جو ساڈی ریاست اچ کوئی وڈی تے مثبت سیاسی تبدیلی آ سگدی ھے

ذلفی

۔۔۔۔۔۔۔۔۔۔۔۔۔۔.

سندھ وادی دی اصل روح کثیر جہتی صفات نال سجی سنوری نہ ہووے تاں ول اتنی قدیم تہذیب کوں مہذب اکھواوݨ دا آدھیکار وی کائینی۔
جڈاں کہیں تہذیب دی ووݨت تھیندی ھے تاں اوندے خمیر اچ کُجھ صفات تے وزڈم دے گُݨ شامل تھیندن تاں اوندی روح دا وی جنم تھیندے۔ اے عمل صدیں دے پندھ تیں محیط ہوندے ول کہیں تہذیب دی روح میچور ونج تھیندی ھے تے اپݨی شناخت دا بوتا بݨیدی ھے۔ حوادث زمانہ دے نال نال روح تیں کاری ضرباں وی ہوندن پر او اپݨی اصل شناخت دی شبہیہ کوں زندہ رکھدی ھے۔ سندھ وادی دی تہذیب حملہ آوریں دا مقابلہ اپݨی دِھرتا ، آہندسا تے وزڈم دی صفات نال کریندی آئی ھے ۔ اگرچہ کئی واری اے روح تار تار تھائی ھے پر کہیں تل وطنی وݨ آلی کار ول پھپھڑ کھڑی ھے۔ ایں تہذیب سندھ وادی اچ وڈے وڈے ماھݨوں پیدا کیتن جیرھے آرٹ، کلچر، شاعری، دانش مندی، بہادری، جرات تے ایکو سسٹم کوں آدُر ڈیوݨ دی صفات نال جُڑیل ہن۔ انہاں کلاسیکل کیریکٹراں اچوں اجکل سندھ وادی دا ہیک کیریکٹر ذوالفقارعلی بھٹو جونئیر میکوں بہوں پربھاوِت کیتے۔
آھدن کہیں وی آفت دی گھڑی اچ تہذیب دے اصل ہیروز نشابر تھی کے سامݨے آندن تے اپݨی وسوں دے نال کھڑ کے اپݨا کلاسیکل رنگ نشابر کریندن۔
میر مرتضی بھٹو دے پُترذوالفقار جونئیر ہیک بہوں وڈی لگیسی دے وارث ہن پر او اوں وراثت کوں کہیں دَین اچ قبولݨ واسطے تیار کائینی بلکہ او اپݨی شکتی نال، وسوں دے عشق نال، ماحول دے پورے ایکو سسٹم نال، لوکیں نال جُڑت نال، اپݨے وزڈم نال تے اپݨی پنج ہزار سالہ تہذیب نال جُڑت دے امتحان اچوں گُزر کے اپݨے آپ کوں ثابت کریندا پائے۔ ساوا چولا پا کے، سندھی ٹوپی لا کے ، باہیں ٹُنگ کے او سندھ وادی دا پُتر کڈاہیں محرم اچ پلیٹاں صاف کرینداں ، غم حسین منینداں، لوکیں نال اپݨی زندگی دے پل سانجھ کریندا، تے کڈاہیں سندھ دریا دی شہزادی اندھی بُلھݨ جیرھی آھدن اساں سندھ وادی دے وسنیکیں دے غم اچ اکھیں ڈے کے سندھو دے عشق اچ اڈاپٹیشن دے عمل اچوں گزری ھے اوکوں بچیندا، کڈاہیں او یورپ اچ منصور بݨ کے نچدا تے کڈاہیں کوئیر دا روپ دھار کے ہر قسم دی صنفی تفریق کوں نکریندا، کڈاہیں سیلاب زدگان دی مدد سانگے ہر گوٹھ ہر وستی رانجھا بݨ کے پھردا ، کڈاہیں کنیں اچ والیاں پا کے دھرتی دے عشق اچ جوگی بݨ کے پھردا، کڈاہیں سندھیں دے خلاف ریاستی جبر کوں بے نقاب کریندا ذلفی جونئیر اودیسی بݨ کے ول ول روح دے ریشم نال سندھ دی گھائل روح کوں سیندا پندھ کریندا جُلدے۔
ہیک دفعہ جونئیر کوں کہیں آکھیا جو تُساں بھٹو لگیسی دے وارث ہاو سیاست اچ کیوں نیوھے آندے، اوں آکھیا پاکستان دی سیاست اچ آوݨ سانگے پہلے تاں اسٹیبلشمنٹ دا منظور نظر بݨنا پوندے، ول عالمی سامراج نال کمپرومائز کرݨا پوندے تاں تُساں پاور پالیٹکس کر سگدے ہاو میں جیرھا کجھ کریندا وداں او میڈا کرما ھے۔
کہیں کہیں ویلھے ایویں لگدے جیویں میر مرتضی الویندا پیا ہووے ۔ جونئیر ہیک دفعہ آہدا بیٹھا ہووے جو سندھ دے لوک فیوڈلزم تے سرمایہ دارانہ نظام کولو تنگ ہن۔ او کہیں ویلھے پھٹ پوسن تے انقلاب گھن آسن۔
جونئیر جیرھے ویلھے الواوے تاں ایویں لگدے جیویں کوئی مُدبر ہووے، جیرھے ویلھے او ساوا چولا پا کے لوکیں دی خدمت واسطے نکلدے تاں ایویں لگدے جیویں سُچل سیاسی کارکن ہووے، جڈاں نچ پووے تاں ایویں لگدے جیویں جوگی ہووے اصل اچ تاں اے سندھ دی او پنج ہزار سالہ روح ھے جیرھی ہر حملے کوں سہہ کے اج وی اپنی پوری شمتا نال موجود ھے۔ او کڈاہیں میر دی شکل اچ، کڈاہیں بے نظیر دی شکل اچ تے کڈاہیں جونئیر دی شکل اچ اپݨی دھرتی تیں پھیرا پیندی ھے تے ول دھرتی ما کوں جیوا ڈیندی ھے اے دل تے روح دا رشتہ ذلفی جونئیر کوں خوب نبھاوݨ وی آندے تے اوندا ورتاوݨ وی۔ ایہہ پالیٹکس دی اصل ریت ھے جیرھی او خوب کریندا پائے۔ اظہر کلیاݨی دی ہیک نظم ھے جونئیر دے نانویں
اساں کالے ہیں
اساں بھوئیں اپنڑی دے
نال کھڑوں
ایں ازل ابد دی پٹی وچ
کئی سالیں توں
اساں عشق اپنڑے دے
نال کھڑوں
اساں اپنڑی مونجھ دے
نال کھڑوں
ساڈی دھرتی
بہوں ملوکڑی ہے
ساڈے کن وچ
عشق دی کوکڑی ہے
ساڈے پیریں ساول
ٹردی ہے
ساڈی اکھ وچ رتول
جھردی ہے
ساڈے پندھ اچ بیڑی
ٹھلدی ہے
ساکوں جیونڑی آن کیں
ملدی ہے
ساڈی بھنگ تیں
جاگا پانڑیاں دا
بہوں گالھیاں دا
دل جانیاں دا
اساں اپنڑی کندھی
راہندے ہائیں
اساں جھر اپنڑی کوں
بھاندے ہائیں
بہوں چھالے ہائیں
بہوں گالھے ہائیں
اساں کالے ہائیں۔
Fazal Lund, Malik Umar ISra and 46 others
11 Comments
3 Shares
Like

 

Comment
Share

اے وی پڑھو:

ذلفی دیاں بیاں لکھتاں پڑھو

%d bloggers like this: