غازی یونیورسٹی تے سرائیکی مضمون دا مسئلہ||اکبر ملکانی

اکبر ملکانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دیرہ غازیخاں وچ غازی خان میرانی دے ناں اتے ہک یونیورسٹی کافی عرصے توں قائم تھی چکی اے۔لیکن پہلے ڈینہ توں اے کہیں تنگ دل تے متعصب نظر دے وات آ گئی ہے۔ایندا وائیس چانسلر ہک پنجابی فیصل ابادی آرائیں ہے۔جیرھا سرائیکی لفظ، سرائیکی زبان تے سرائیکی دے ناں توں سڑدے۔تے اللہ بھانویں سڑدا راہوے۔ ہر سال وانگوں ایں سال وی غازی یونیورسٹی وچ نویں داخلے دا شیڈول آ گئے۔جیندے وچ سرائیکی سبجیکٹ کئے نیں، شنید ہے جو وی سی صاحب فرمائے آندے سال سرائیکی کلاسز شروع کریسوں۔ اے صرف ٹال مٹول آلی گالھ ہے۔ حالانکہ سرائیکی دی ایں یونیورسٹی واسطے کتواں سال اے منظوری تھئی پئی اے۔ اے صرف ایں متعصب تے انتہا پسند پنجابی فرد واحد دا فیصلہ ہے۔ ایں توں پچھو کیا اتھاں سرائیکی بالیں کوں سرائیکی پڑھنڑ دا حق کئے نیں۔ دیرہ غازیخاں تاریخی سیاسی سماجی ثقافتی تے قومی شناخت دے حوالے نال مکمل طور تے سرائیکی ہے۔ بچہ بچہ سرائیکی الیندے، ایں شہر دے واسی ،بلوچ ،پٹھانڑ، سندھی ،مہاجر، سید، قریشی، بزدار، ملکانڑیں،میرانی،چنگوانی،رانڑے، کھوسے،لغاری،دریشک،مزاری،لنڈ،قیصرانی، واگھے،بھٹے،گاڈی،ملک، جٹ، لشاری، قاضی، رند، بھٹی،چنڑ، روہیلے،کچھیلے،جتوئی،چانڈیہ ، وڈانی ، مراثی ،نائی، کٹانڑے، بھنگی ، درکھانڑ، کمبھار وغیرہ سبھے سرائیکی ہن،سرائیکی آندے پئیں تے سرائیکی ہوسن۔ اے سبھے بالیں بچیں سمیت سرائیکی الویندن، انھیں دیاں مجالس،مشاعرے،کٹھ، سنگ، جھمر، میل ، کچاریاں، بولیاں، لولیاں سرائیکی وچ صدیں دی شناخت رکھدئین۔ دیرہ غازیخاں جگ مشہور سرائیکی شاعر سرور کربلائی دے آباؤ اجداد دا شہر ہے، سرور کربلائی دا خاندان نواب غازی خان میرانی توں سرائیکی بولیندا آندے۔ ایندے علاؤہ سید محسن نقوی دا خاندان سرائیکی مجالس تے عزاداری وچ پورے پاکستان وچ جانڑیاں سنجانڑیاں ویندے۔ سرائیکی دے ہر دلعزیز شاعر سئیں عزیز شاہد دا خاندان اپنے پیو ڈاڈے توں سرائیکی دی خدمت کریندا اندے۔ جیکوں تساں مہاجر اہدو ، دیرے دا میاں غلام سرور بودلہ او وی اپنے خاندان سمیت سرائیکی ہن۔انھیں دے پتر پوترے نواسے سرائیکی الویندن۔ دیرے دے سیاسی گھرانیں وچ سردار ذوالفقار کھوسہ دا پورا خاندان سرائیکی الویندے۔ موجودہ سی ایم سردار عثمان خاں بزدار صاحب دا ابا سئں سردار فتح محمد خان بزدار مرحوم بلوچکی دے نال پوری سرائیکی زندگی گزاری اے، انھیں دا خاندان آج وی سرائیکی الویندے۔ دیرے وچ کوئی بلوچ وغیرہ چوکھی تعداد وچ بلوچی بول سگدین؟
اے سرائیکی شہر ہے،سرائیکی پڑھنڑ تے پڑھانونڑ دا حق رکھدے۔ اساں وی سی غازی یونیورسٹی دے رویے دی مزمت کریندوں، جیرھا اپنے ناجائز اختیارات دا استعمال کر تے سرائیکی کلاسیں دی منظوری دے باوجود داخلے روکی بیٹھے،تے ہر دفعہ اگلے سال تے ٹلیندا بیٹھے۔ اساں وزیراعظم، وزیر اعلیٰ تے گورنر توں اپیل کرینداں جو او غازی یونیورسٹی دیرہ غازیخان وچ سرائیکی کلاسز شروع کراون، تے متعصبانہ رویے دے حامل شخص دا تبادلہ کیتا ونجے۔ با امر دیگر اساں احتجاج دا پورا پورا حق رکھدوں، اساں یونیورسٹی دے باہروں وی سی دے خلاف چوک تے سرائیکی طلبا و طالبات تے سرائیکی لوکیں دا احتجاجی جلسہ کریسوں۔

توھاڈا اپڑاں۔محمد اکبر خاں ذات ملکانڑیں۔قوم سرائیکی۔چیرمین پاکستان عوامی سرائیکی پارٹی ۔
سرائیکستان ھاوس دیرہ غازیخاں۔

dailyswail

See author's posts