افسانہ: غُمان۔۔۔ محبوب دستی

سلام علیکم،وَے آ سائیں گامݨ خاں توں کَݙنݨ آئیں سعودی،
میکوں اج اٹھاوی ݙینہہ تھی ڳین
اٹھاوی ݙینہہ….یار ولا ݙَسیا وی نِوہی، نہ مِلئیں
.سونہارا. جیرھا ڳلکڑی پاتی کھڑا ہا ہولیں ہولیں ٻانہیں ڈِھلیاں کیتیاں تے حیرانگی نال گامݨ دو ݙہدیں ہوئیں تھولا جیہاں پَولھا ول کھڑا
ہا یار میں مل نمہی سڳیا، تے ڳال ہے اینویں
میݙی ذال ڳئ ہئ تیݙیں سوتریں دے گھر کوئ چولے ݙیوݨ
تے ولا تہاݙے گھر وی ول گئ اے ،ابے تیݙے دا سنیہا چائ ودی ہئ ،جو گانمݨ کوں آکھ میکوں ٹکریا ویسی ، جے نہ آوے تاں اونکوں آکھیں سونہارے پتر کوں آکھسی پیو آہدا پئ جتلا تھی سڳدئ جَلتی گھر ول آ ،میکوں ݙاند بِھڑیے گوݙے دی چھوݨی تھُڑکی گئ اے ، تے ذال تیڈی وی ….وت آکھیے سی،
اچھا ذال دا نہ ݙسیں مونجھا تھیسی صرف میݙا ݙسیں .
ٻالڑی میݙی ٹھیک ہئی ؟ کیا ہے میݙی ذال کوں ؟
ہا ٻالڑی تیݙی تاں ٹھیک ہے ، تے ذال تیݙی …..ڳالھیں تریمتیں دیاں ہِن ،آہدیِن تیݙی ذال دے چنڳے بھلے رولے مچے کھڑِن . اچھا میں وینداں میکوں کم کار ہن ٹھیک اے اللہ خیر کرے .
گانمݨ اینویں ݙو چار ترے کَݨیاں ڳالھیں کریندا تے ویندا تھیا ،
پر سونہارا اُتھو نہ ہل سڳیا سِلھ تے ڈھونگری رکھ تے سوچݨ ٻہہ ڳیا .
پہلی ڳال اے جو گانمݨ ایں ورتیوا کیوں رکھیے ݙِڈھ سال دے بعد ملیے ، او وی پردیس ءچ نال دے ہمساے ہیں گھریں تائیں آونڄ ہے کٹھے چھیڑ چَھٻی کمَمدے ہیں ڈھنگ دا الایا وی نِسی.
ݙوجھی ڳال میݙی ذال دے کینجھے رولے ہوسن.
ول تاں ہک مرد دی سوچ ہئی تریمت دے بارے او وی جے پَے شکل دا پورا سورا ہووے تے ذال ٻہوں سونہݨی ہووے تاں آنیو بہانیو شک پَے دے ذہن ءچ پاڑاں لہیندے ویندا.
سونہارے نال وی ایہو کجھ تھیا اوں جِندی دے بارے غُمان شروع کر ݙتا
بھلے میݙی سَکی مسات اے پر شیت ہئئی مُنڈھ لا دی کمینی ،
اینویں نہ ایندے 7 ڈھوکڑو ڈُھکدے رہ ڳَے ہن ہک آہدا ہا میکوں ݙیو ٻیا آہدا ہا میکوں،
ولا اے وی تاں میݙیں کَنیں کَوّ پئی  ہئی جو سینگیں سہیلیں کوں آکھیے سی میں سونہاری کوں نمہی پرنیندی اے بھینگا اے.
اینویں سِلھ تے ٻیٹھیں ٻیٹھیں جِندی دے کئی یار کٹھے تھی ڳے،
شام کوں سونہارے مدیر کوں آکھ ݙتا جیویں کریں میکوں گھر بِھڄوا
اوں جتلا کتلا آکھیا جو کوئی مسلہ ہے تاں خط کیسٹ بھڄیندے ہیں چا
سونہارے آکھیا کیناں خط کیسٹ دے ونڄݨ ولݨ تے مہینہ لڳدے میں ہݨ ونڄݨے .
سولھویں ݙینہہ سونہارا گھر پڄ ڳیا
ماء. پیو. ذال .تے ہک اڈھائی سال دی دھی ایہو کجھ کنبہ ہا سونہارے دا
ݙیڈھی ٹپیا تاں پہلے کوٹھے ءچ ایندا ماء پیو ایندی دھی نال گیڑے بِشے لائی  ٻیٹھے ہن
ڳلڑیاں شلکڑیاں خیر خوش دے بعد ماء کنے پچھس
جِندی ؟
اوں ݙِپھی جوڑ کے ݙوجھے کوٹھے دو اشارہ کیتا
پیو ماء پہلے نال اٹھیے وت اے سوچ کے ٻہہ تھے جو ݙِڈھ سال بعد آیا کھڑے پہلے مل گھنے اساں پچھیں ویسوں،
دروازے ءچ جھاتی پاتُس تاں جِندی گھڑے جیڈے ڈِڈھ نال کھٹڑے تے سُتی پئی  ہئی.
سونہارے کوں ݙیکھ کے منہ تے بوچھݨ ݙے کے رووݨ لڳ پئی ،
سونہارا دروازے ءچ کھڑ کے چیکیا طلاق ہئی ،طلاق ہئی، ماء درُکی ، پیو ہکل ماری واے کتے دا پتر آ برباد تھیویں اے کیا کریندا پئیں ، واے نہ آنوݨی دا پیرا پووی اینکوں کل ڈاکٹر کوں ݙکھال آے ہیں او آہدے اینکوں ٻال نہیں اینکوں جلندر اے ،
جلندر مونہو نکلݨ تو پہلے اُݙو تریجھی دفعہ طلاق لوّظ نکل چکا ہا..

dailyswail

See author's posts