محبوب دستی دی شاعری۔۔۔ رفعت عباس

ایہ دنیا شاعریں کوں ول ول جنم ݙیندی ہےِ ۔ بھانویں ویلا مشین دا جیݙا ہیلک تھی ونڄے لوکیں کوں اپݨے خواب ، قصے تے آدر دی لوڑ اے ۔ ایہ حیاتی ہر ڄَݨ دا ڳاوݨ منڳدی ہے ۔ ہر وسوں کوں اپݨے گیت دی تانگھ ہِے ۔ سچ اکھیجے تاں ہر دھرتی اپݨے شاعر دا ماݨ ہنݙیندی ہے ۔
سرائیکی شاعری محبوب دستی تئیں پڄی ہِے ۔ ایہو سچ ہِے جو ہر وسوں دی ما بولی آپ اپݨے شاعر چݨدی ہِے ۔

ما ٻولی آپ چیتے وچ اپݨا چمن لیندی ہِے ۔ ما ٻولی آپ اپݨے قصے تے اساطیر وچوں راہ ݙیندی ہِے ۔ ما ٻولی شاعر تیں اپݨا لوݨ پاݨی ، جنگل دریا ، پکھی پہارو نشابر کریندی ہِے ۔ ما ٻولی اپݨی ساری جِیا جون تے اپݨے سارے لوکیں جھوکیں دا ناں شاعر کوں سنبھال ݙیندی ہِے ۔

محبوب دستی دا کلام ما ٻولی دی ہِیں پارت دا ماݨ اے ۔ محبوب دستی دی شاعری ، غزل ہووے یا نظم ، ݙوہڑا ہووے یا کافی ، اپݨی وݨت تے دھیان وچوں ایں وسوں دی حکمت کوں اڳاں ٹریندی ہِے ۔

اوندی شاعری بھانویں جیڑھے روڳ وچوں لنگھے انت جوگ تاݨیں پڄدی ہِے ۔ اوہ جیوݨ وچوں جوگ جگیندے تیں حیاتی دے ہر پَل دی تَلی تے میندیاں لیندے ۔

اوندا مجموعہ کلام ” پپلیں کوں پارتاں ” ایں وسوں دا پندھ سَوَلا کریسی ۔ اوہ جاݨدے جو ملاپ دے دڳ تے پیریں تے ٻیریں ݙوہیں کوں ہکے ویلے اگونہاں تھیوݨاں پوندے ۔

اوہ ڄاݨڑدے جو چنیاں رنڳݨ اوکھا ہِے پر چنیاں رنڳݨیاں پوندن ۔اوہ حیاتی دے ادھور نال بِھڑدیاں سلامتی نال ٻیڑیاں دے پور پار لہیندے تے ٹردیاں کوں پیریں دی نویں سڄاکی ڈیندے ۔

ایں تَردی جھات پِچھوں محبوب دی شاعری کوں ول ول پڑھو تاں پتہ لڳدے اوہ جیوݨ دا شاعر ہِے ، جیوݨ جوگا ۔

ویب ڈیسک

See author's posts