سرمائے دے آوݨ تو بعد ہر شے دا مل پوندے ۔ ہر شے دی ویلیو اے ۔ سرمایہ دارانہ نظام کوں چنڳے شاعر دی نئیں بہترین انجینئر دی لوڑھ اے ۔ اچھے گلوکار دی نئیں بلکہ تجربہ کار اکاؤنٹنٹ دی لوڑھ اے ، اپݨے وچار کینوس تے پینٹ کریندے مصور دی نئیں بلکہ سرمائے کوں کٹھا کریندے بینکر دی لوڑھ اے ۔
ہا لوڑھ فنکاراں ، شاعراں ، گلوکاراں اتے مصوراں دی پر صرف انھاں دی جیہرے کئی پراڈکٹ ویچݨ اچ مدد کرن ۔ مزید پیسہ جوڑݨ اچ سرمائے دار دی مدد کرن ۔ اندر دی گالھ کریندے ۔ لوظ لکھیندے ، درد کوں تصویری شکل ڈینݙے فنکار جاہل ان ۔ انھاں دے مرݨ دا انتظار کرو۔ جے اے مقبول ہوسن اساں انھاں دا میوزیم بݨا ݙیسوں ۔ انھاں دیاں استعمال شدہ چیزاں دی بولی لگسی ۔
ول ہک سرمایہ دار او کنگھی وی چا ویسی جیندے نال ہک بکھا فنکار ادھ حیاتی اپݨے بے ترتیب وال بݨیندا رہ گیا ۔
سماج اتے ایندے اصول نت ہکو جئیں رہسن بھانویں سو وبائیں ہکی واری دھرتی تے نازل تھیوین تے ساکوں یقین وی ہووے پیا جو جیوݨ دا ہکی جنم اساں ہک بئے دیاں خشیاں غارت کریندے گزار ݙتے ۔
محبت مردی مر ونڄے ، اندر دا درد خود مریض تھیوے ، دھرتی دی گالھ ٹینک دے بھاری وزن تلے آکے کچلی ونڄے کیا تھی پیا ۔ اساں تے ہیر رانجھے ، سسی پنوں دے قصے وچوں وی ایہو سبق گھدا جو کوئی مہا بے غیرت ہن ۔
اوسطا عمرا دے سٹھ سال جیوݨ سانگے ۔ انسانیت مارو۔ ہک روبوٹ تیار کرو ۔ جیہرا 20 سال دی ٹریننگ دے بعد ایں نظام دا بہترین اتے ذہین پرزہ ہووے ۔ ورنہ شاعر تے ساغر ای وݙا ہا ۔ تے گلوکار استاد پٹھاݨے خاں وی پر او کیہرے ٹکے دا فیدہ ݙے ڳئن
امید اے جو ہک ݙھینہ سرمایہ دارانہ نظام اتے غیرت دا وائرس ہک اینجھی ویکسئن بݨا گھنسی جیندے نال انسان دیاں انسانی کیفیات مر مکسن تے او بہترین طریقے نال ذہن استعمال کریندے ہوئیں نت نویں بم بنڑیسی ۔ نویں سیارے فتح کریسی ۔نا موت تے ہنج وہیسی ۔ خوشی تے کھل نا سگسی ۔ گاوݨ اوکوں کئی محسوسات نا ݙیسن ۔ شاعری اوکوں بکواس لگسی ۔
تے جیہرھا سائنسی قوانین کوں رٹا مار تے چنگا پرزہ بݨ سگیا ٹھیک نا تے او آپیں مر ویسی ۔ سروائیول آف ڈی فٹسیٹ اچ گنجائش کینی جو محبت کیتی ونجے ، دھرتی نال پیار کیتا ونڄے ، رنا ونڄے یا وت لحظہ کھل گھدا ونجے ۔
غیرت توں علاوہ ہر کیفیت بکواس اے ۔
فٹیسٹ تھیوو تے سروائیو کرو ۔ ہک چنڳا سرجن ، ہک چنڳا فوجی افسر ، سول سرونٹ ، بینکر ، انڈسٹریلسٹ ایں توں علاوہ بئے وی لکھاں پیشے ہن ۔ جنھاں اچ بے بہا پیسہ اے ۔ سرمایہ دی جنگ اچ ایویں تھیسی ۔ ایں توں بعد ساݙے من اچ کوئی مونجھ آوے تے فیشن دے طور تے ہک دفعہ نظام تے لعنت بھیج ݙیسوں۔ کوئی غیرت دے نانویں قتل تھیسی تے دھاڑ پٹکار ای کر گھنسوں پر کیا کروں زمانہ خراب اے گھر دی تریمتیں دے فون چیک کرݨ فرض اے ۔ کوئی دھرتی دی گالھ کریندے مرسی تے ہک سٹیٹس لا گھنسوں ۔ پر اساں افورڈ نئیں کرسگدے نا بلکل نا ساݙے پچھو خاندان کن ویسی ۔ ساݙے اندر جوانی اچ جیہری بغاوت جنم گھندی اے ہولے ہولے سماج دے رویے نال او بھا وسم ویندی اے ۔ وت آوݨ آلی نسل کیتے ساݙا روپ اوں سماج دا کردار ادا کریندے۔ اساں ایں جنگ اچ اپݨی محرومیں دا بدلہ بئے توں گھنݨ فرض سمجھدے ہیں ۔
جے محرومیاں ہوسن ای ناں تے ول بہترین ہوسی ۔ تہوں اے سارے جذبات اتے خیالات ہک جھا دفن کرتے مکمل ہک روبوٹ دا کردار ادا کیتاونجے۔ نا کوئی محرومی نا کوئی ݙکھ نا کوئی خوشی. اوہو سروائیو کرے جیہرھا نظام کو بےلوث تھی تے چلا سگے ۔ انسانی کیفیات بے مل ہوندین انھاں دا مدفن دل ہوندے ۔ جیرھا آپ موت دے کجھ جیہاڑے بعد مٹی تھی ویندے۔
یہ بھی پڑھیے
””سندھو سکرات وِچ اے“ (وسیب یاترا :10)||سعید خاور
””میاں عثمان عباسی کنوں نکھیڑے دِی ݙَنج“ (وسیب یاترا :9)||سعید خاور
”شیر دل رانی، مائی چھاگلی (وسیب یاترا :8)||سعید خاور