نندر کیوں نئیں آندی ؟۔۔۔ مظہر حسین

میکوں نندر کیوں نئیں آندی، آخر او کیہری وجہ اے جیہری میکوں سمھݨ نئیں ݙیندی، کئی سوہݨے خاب میݙے بھالے اچ کھڑن،ہیک خاب اچ میکوں پُھل چاوݨے، ٻئے خاب اچ نندر کہیں دے قدمیں اچ ونڄ وچھاوݨی اے، کیتھائیں جھمر کھیݙݨی اے، ہیک خاب اچ ٻیڑی اچ ٻیہہ کے پاݨیاں دی مستی نال لوݙے کھاندے پکھی دی تصویر بݨاوݨی اے،
ہیک خاب اچ صرف ݙیکھݨے، جو میں آپ کینڄھا ہاں، اتے میکوں مختلف اکھاں کیویں ݙیھدین اتے اکھیں نال ݙیکھݨ دی سک کوں آدر ݙیوݨے
ایتلا خاب ایتلا کم کار میݙے ذمے ہن وت میکوں کیا شئے سمھݨ نئیں پئی ݙیندی،
ہیک ݙیوا اے جیہرا یکا ٻلدا رہ ویندے، ایں ݙیوے اچ کیا ہے یار، اے تاں رات ݙینہہ ٻلدا رہ ویندے،
لیکن او ݙیوا کائناتیں دے پندھ نال پندھیا کھڑے یا میں ایں کنوں ٻہوں پروٻھرا ٻیٹھاں، حساب کتاب لا کے میں پندھ شروع کر ݙتا، پندھ مکݨ دا ناں ای نہ گھندا ہا
ایہیو ݙیوا وسمیساں تاں سمھساں، ݙاݙھا اوکھا پندھ کر کے کینہوائیں اوں ݙیوے تائیں پڄ تاں ڳیومی، پندھ کینڄھا اوکھا ہا اے ہیک انڄ داستان اے، پڄیاں تاں ݙیوا ٻلدا نہ پیا ہا بلکہ ہنڄھوں دے پرٻاٹ پیا کریندا ہا،
بس میں ول اوندیاں ہنڄھوں ݙکݨ دی کوشش اچ لگ گیا، او ݙیوا تاں نہ وسم سڳیا لیکن میݙا چولا بھریج ڳیا، اکھیں دا پاݨی سُک ونڄے تاں نندر چنگی آندی اے، کیا پتہ میکوں وی نندر آ ونڄے اتے آپݨے خاباں اچ آپݨی ذمے داری پوری کر سڳاں

ویب ڈیسک

See author's posts