انور سن رائے نال ملاقات اتے خاب ۔۔۔مظہرحُسین

اڄ توں تقریباً ہیک سال پہلے ٻہوں سوہݨے سنگتی دانیال گھلو سئیں نال ہیک ادب فیسٹول اچ ونڄݨ تھیا، اتھاں دانیال میکوں مختلف لوکاں نال ملوایا، انھاں اچ ہیک شخصیت جنہاں میݙے دماغ دے سارے پیرا میٹر ای ونڄا چھوڑے نال دانیال گھلو سئیں خصوصی ملوایا، او ہن انور سن رائے صیب، انور سن رائے اردو دے ناول نگار، افسانہ نگار اتے شاعر وی ہن،
انہاں دا پہلا ناول انوی سو اسی اچ مکمل تھیا لیکن پابندی دی وجہ کن چھپ نہ سگیا، اتے ستاسی اچ ونڄ چھپیا، ناول دا ناں ہا چیخ، اتے لیفٹ آلے ادبی حلقے اچ ایں ناول کوں ڈکٹیٹراں دے خلاف ایف آئی آر آکھیا ڳیا،
انور سن رائے صیب دا 13 نومبر 1950 اچ خیرپور ٹامے آلی اچ جنم تھیا،
خیر دانیال میݙا تعارف کروایا، اتے انہاں چنگا رسپانس ݙتا، سن رائے صیب دا تعلق کیونکہ صحافت نال وی رہیے تاں سرمایہ دارانہ صحافت دی انتہائی گھٹیا اتے بے توقیر ٹور ڄیہری عام طور ساݙی نگاہ اچ نئیں آندی انہاں ݙکھالی،
کوئی ݙو اݙھائی گھنٹے انہاں کنوں ٻہوں چیزاں سکھݨ اچ ملیاں، انہاں میکوں صلاح ݙتی، جو توں آپݨے خاب لکھیے کر، روزانہ سویل نال اٹھی کے پندرہ منٹ اپݨے آپ کوں ݙے، صرف ایں دوران آپݨے خاب یاد کر اتے انہاں کوں لکھ،
اوں توں بعد میں ایویں کرݨ شروع ݙتا،
خاباں دا ہیک ٻہوں وݙا مسئلہ ہے، خاب اچ انسان منافقت ٻہوں ڳھٹ ای کر سڳدے، اے کوئی ٹھیٹھ رویے نال سوچݨ دا ہیک عجب عمل ہے،
کڄھ خاب اینڄھے ہوندن ڄیہرے ترٹے ہوئے ہوندن، یعنی انہاں کوں کہیں وی طرانویں نہ لکھیا ونڄ سڳیندے نہ ترتیب ݙتی ونڄ سڳیندی اے،
اتے کڄھ اینڄھے ہوندن ڄیہرے سماجی اتے مذہبی شدت پاروں وی کہیں نال شئیر نئیں کیتے ونڄ سڳیندے،
کڄھ خاب اینڄھے ہوندن ڄیہرے نندر اکھڑدیں ای دماغ اچوں ڈلیٹ تھی چکے ہوندن
اتے ویسے وی ٻلپݨ دی نسبت ہݨ میکوں خاب ٻہوں ڳھٹ آندن، اتے خاص کر ہݨ ڄݙاں توں سن رائے صیب دی صلاح توں بعد میں خاباں دو توجہ ݙتی اے تاں خاب ٻہوں ڳھٹ تھی ڳئین
میکوں اپݨے خابیں ٻہوں کڄھ سکھا ݙتے، میکوں خابیں اوں گوتم نال ملوائے جیندے نال اشو سئیں ڄھیڑا کیتا.
آپݨے ہیک خاب دا حصہ دوستاں دی خدمت اچ پیش کرینداں

میں سمندر دے کنارے ٻیٹھا ہم اتے زندگی کنوں مکمل تھک چکا ہم، دنیا دا ہر انسان آپݨاں دشمن ݙسدا ہا، میں خودکشی کرݨ بارے سوچیندا ٻیٹھا ہم، تاں ہیک سندھی تریمت اتھاں پڄی اے، آکھݨ لڳی اے تیݙی اماں تیکوں سݙیندی پئی اے، میں آکھیے کتھاں اے اوں آکھیے ہݨ تاں او گھر گئی اے توں تھکا ودیں، پریشان ایں ونڄ پیا پرلی سڑک تیں ہیک درگاہ اے اتھاں دعا ونڄ منڳ اتے ݙیوا ونڄ ٻال تیݙی پریشانی مک ویسی اتے پہلے دربار تیں ونڄ بعد اچ ہولا تھی کے ماء کوں ملݨ ونڄیں، میں اٹھی کے ٹُر ڳیا، درگاہ اچ رلدا پھِلدا پڄ ڳیا،
اتھاں ہیک ملنگ ملیا اوں پچھیوس کیا ہووی میں آکھیا میں ݙاݙھا پریشان آں زندگی کنوں تنگ آں، انگزائٹی اتے ڈیپریشن چڑھیا ودے، اوں آکھیے اتھو تیکوں کئی سکھ کینا ملسی ونڄ ݙیوا ٻال آ تیکوں مسئلے دا حل ݙسینداں
میں ول آیاں،اوں آکھیا ونڄ گھر دارو پی، پرباش تھی کے آپݨے آپ کوں آپݨے سامݨے ٻلہا اتے اپݨے آپ نال ہیک نواں سوشل کنٹریکٹ کر.

ویب ڈیسک

See author's posts