میں کئی ڈھائی سال پہلے نوکری چھوڑ کے اپݨا کاروبار شروع کرݨ دا پلان بݨایا ہائی۔میڈا ہیک دوست بار بار میکوں آھدا ہائی نوکری چھوڑ کوئی اپݨا کم کر نوکری خجالت حے وغیرہ وغیرہ۔۔
میں آہستہ آہستہ ذہنی طور تیں تیار تھی ڳیا تے نوکری کولو استعفی ڈے کے سدھا کنٹرول شیڈ تیں لگا گیا۔ اے کنٹرول شیڈ مرغیاں دا وڈا سارا بھاݨا ہا جیندے اچ کم از کم تریہہ ہزار مرغی پلدی ہائی تے اینجھے ترائے شیڈ میڈی نگرانی اچ ڈے ڈتے ڳئے۔ یاد راہوے جو میڈا او دوست پہلے کولو اے کم کریندا پیا ہائی۔
ایندے علاوہ طے اے تھیا جو اساں وڈے تے سوھݨے ڈنگر وی پلیسوں تے ہیک الگ شیڈ بݨیسوں جنھاں کوں عید دے سیزن تیں وچیسوں۔
میں کوٹ ادو کولو سدھا نور کبڑے مظفر گڑھ دے نال ہیک جاہ حے اتھاں لگا گیا تے پورے شیڈ دے سسٹم کوں سمجھݨ لڳ پیا تے نال نال اوندی ڈاکومینٹیشن وی کمپیوٹر تیں شروع کر ڈتی۔
کنٹرول شیڈ اچ سپروائزر بادشاہ ہوندن تے انہاں دے تلے لڳ بھڳ پندرہ مزدور کم کریندن۔ کنٹرول شیڈ دی پالیٹکس دے اے دنیا ٻہوں ہی پیچیدہ تے زبردست ٹینشن آلی دنیا حے۔
خیر اساں اپݨے کم تیں لڳ ڳیوسے ساکوں این جی او اچ کم کرݨ دی عادت ہائی تے نال لیفٹ دی پالیٹکس وی کریندے ہاسے۔اتھاں جڈاں مزدوراں دا حال ڈٹھوسے تے ول پتا لگا جو مزدوری کتنا آوکھی ہوندی حے تے سرمایہ دار کیویں اپݨے نفع دی خاطر لوکاں دا استحصال کریندے۔
خیر میں اتھاں کوشش کیتی جو پہلی فرصت اچ مزدوراں دی تنخواہ ودھائی ونڃے تے انھاں کوں اعتماد اچ گھدا ونڃے۔
میں جوں جوں مزدوراں دے نیڑے تھیندا ڳیا توں توں شیڈ دے اندر دی پاور پالیٹکس پیچیدہ تھیندی ڳئئ۔روز کوئی نہ کوئی شکایت تے روز کوئی نواں مسئلہ۔کڈاہیں ٹکر دے راہ تیں جھیڑا تے کڈاہیں ڈیوٹی اور تیں رولا۔ ول میکوں پتا لگا جو کمزور تے ڈاڈھے دے درمیان بیلنس رکھݨ تے ڈوہیں کوں راضی کرݨ ٻہوں ہی آؤکھا کم حے کیوں جو ڈاڈھا اپݨے اختیار کہیں قیمت تے ونڈݨ نئیں چاہندا تے ہیݨا ٻئے دے مونڈھے تیں بندوخ رکھ کے چلاوݨ اچ دیر نئیں کریندا۔
آکھݨ دا مطبل اے حے جو اختیارات تے حقوق دی جنگ اچ ہیک باریک جیہاں دھاڳا ہوندے جیرھا تھوڑی جہیں تڈ ڈیون دے ترٹ پوندے تے حالات سنگین تھی ویندن۔
خیر اے قصہ ول کڈاہیں۔ میں آندا اپݨے کاروبار دے تجربے تیں۔میں ڈیہہنہ رات شیڈ کوں ٹھیک کرݨ تے مرغی کوں دوست طریقے نال پالݨ پاروں اپݨا کوششاں جاری رکھیاں تے نال نال ڈنڳریں دا بھاݨا بناوݨ سانگے مستری مزدور وی لا ڈتے۔
وت مستری جتھاں لگدن او سرو بندے دا چیکاں کڈھوا سٹیندن تے اتھاں وی مزدور شودا مستری دے ہتھوں شدید استحصال دا شکار تھیندے تے کڈاہیں کڈاہیں کٹ وی کھا کھڑدے۔ کم ٹرپیا تے اساں ڈنگریں دا جدید شیڈ وی بنا گھدا جیندے اتیں لڳ بھڳ تریہہ لکھ دی لاگت آئی۔
اوندے بعد اساں مختلف منڈیں تیں ڈنگر خرید کرݨ شروع کیتے سویل دے بنڃ وجے اٹھی کے اساں ملتان مویشی منڈی تے بہاولپور مویشی منڈی دے علاوہ بہوں ساری بھاݨیں تے وی گئے تے سٹھ ستر لکھ دے ڈنگر گھن گھدوسے۔منڈی تیں ونڃن تے ڈنڳر ویچݨ یا گھنݨ ٻہوں جوکھم بھرا کم حے۔
پر اساں اے تجربہ کیتا تے ایں کم اچ ساڈے باننہ ٻیلی زخمی وی تھائے تے ہیک ساڈا وپاری ہیک ڈاند دی وٹھ اچ ا گیا تے اوکوں ڈاند ماریا او مویا مویا بچا۔
ڈنگر پا ڈتونسے تے انہا کوں سائیلج پاوݨ شروع کیتا تے انھاں دی گروتھ چنڳی تھیوݨ لڳ پئی۔ ڈنگریں دے نال راہوݨ دا تجربہ وی ٻہوں یونیک تے کمال ہا۔
ول کبوتریں آلی کار ڈنگریں دیاں وی کئی ورائیٹاں ہوندن۔۔اے سائیں ابلک حے، اے برہمن حے، اے مکھی چینی حے، اے سندھی حے، اے ساہیوال حے، اے دیسی حے تے اے نکرا حے وغیرہ وغیرہ۔
شیڈ تیں رونقاں لڳ گیاں تے ساکوں گھر دا ہوش حواس نہ رہیا اساں کم اچ غرق تھی ڳیوسے۔۔
باقی اگلی قسط اچ
یہ بھی پڑھیے
”شیر دل رانی، مائی چھاگلی (وسیب یاترا :8)||سعید خاور
”چِڑیاں اُٹھو کوئی دھاں کرو“ (وسیب یاترا :7)||سعید خاور
” "دل تاں آہدے یار دی وَستی ڄُلوں”(وسیب یاترا :6)||سعید خاور