سینیٹ دی قائمہ کمیٹی وچ جنوبی پنجاب دی اصطلاح مُسترد،سرائیکستان دے قیام دا مُطالبہ

کراچی وچ سینیٹ دی قائمہ کمیٹی برائے قانون و انصاف دی عوامی سماعت وچ شرکاء 23 ضلعیاں تے مشتمل صوبہ سرائیکی دا مطالبہ کریندیں ہوئیں جنوبی پنجاب دی اصطلاح کو سختی نال مسترد کر ݙتا۔سوموار دے ݙینہہ کراچی دے مقامی ہوٹل وچ سینیٹ دی قائمہ کمیٹی برائے قانون و انصاف بہاولپور جنوبی صوبہ دی تشکیل،بلوچستان وچ قومی و صوبائی اسمبلی دی نشستاں وچ اضافے اتے ٻالیں دی مشقت دی عمر دی حد بارے آئینی بلاں تے عوامی سماعت کیتی۔سینیٹ دی قائمہ کمیٹی برائے قانون وانصاف دے چیئرمین سینٹر محمد جاوید عباسی دی صدارت وچ عوامی سماعت کیتی گئی۔ایں موقع تے کمیٹی دے ممبران سینٹر ولید اقبال، سینٹر غوث محمد،سینٹر مصدق ملک دے علاوہ سینٹر قرہ ٌ العین مری وی شرکت کیتی۔ سابق سینٹر تاج حیدر، ڈاکٹر کرامت، صلاح الدین گنڈا پور،سینئر صحافی نذیر لغاری، سینر صحافی ارشاد امین،سرائیکی عوامی سنگت دے صدر مشتاق احمد فریدی، سرائیکی عوامی تریمت تحریک دی صدر کرن قاسم لاشاری، راشد عزیز بھٹہ، فیصل کھرل ودیگر سرائیکی صوبے دے حوالے نال تجویزاں پیش کیتیاں ۔ سینیٹ دی قائمہ کمیٹی برائے قانون و انصاف دے چیئرمین جاوید عباسی آکھیا جو اج دی عوامی سماعت وچ ٻہوں چنڳیاں تجویزاں ساݙے سامݨے آئن ۔ ساکوں ہݨ سرائیکی صوبے بارے فیصلہ کرݨ وچ آسانی تھیسی۔عوامی سماعت دے موقع تےسرائیکی عوامی سنگت دے صدر مشتاق فریدی،سرائیکی قومی اتحاد دے رہنما کرنل(ر) عبدالجبار عباسی، سرائیکی ادبی سنگت دے علامہ اعظم سعیدی، سرائیکی عوامی تریمت تحریک دی صدر کرن لاشاری، سیکرٹری جنرل سعدیہ نورین اتے ٻیاں سینٹ دی قائمہ کمیٹی برائے قانون و انصاف کنوں مطالبہ کیتا جو بہاولپور، بہاول نگر، رحیم یار خان لودھراں، وہاڑی، ڈیرہ غازی خان، راجن پور، لیہ ، ڈیرہ اسماعیل خان، ٹانک ،جھنگ، خوشاب ، چنیوٹ، مظفرگڑھ، بھکر ،میانوالی ملتان،ساہیوال، پاک پتن، اوکاڑہ، خانیوال،سرگودھا، فیصل آباد ، ٹوبہ ٹیک سنگھ تے مشتمل سرائیکی صوبہ سرائیکستان بݨایا ونڄے ۔ ایں موقع تے سینئر صحافی نذیر لغاری آکھیا جو سرائیکی وی ملک دیاں ٻیاں قوماں وانگوں اپݨی سنڄاݨ منگدے پن جیڑھا جو انہاں دا آئینی حق ھے ۔

ویب ڈیسک

See author's posts