زرداری دے ناں ہک خط۔۔۔حسن مرتضی

حسن مرتضی

سندھو دا سوہنڑا پتر
سلام
سئیں کیا حال اے امید اے ٹھیک ہوسو۔ بال تہاݙے وی ٹھیک ودن ۔ بلاول تاں حوصلے اچ ہوندے پر کڈاہیں کئی جلسے وچ ما دا ناں چاوے رو پوندے ۔ کیا کرے اوندی تے سکی ما اے اساں وی رو پوندو ۔ آصفہ بھیݨ بہوں نازک اے کاوڑ وی کر ویندی اے تے رو وی پوندی اے۔ اے حال ݙیوݨ دا مقصد اے نہی جو تساں مونجھے تھیوو۔
اصل گالھ تے آواں ۔ سئیں بھٹو نے ، بی بی نے تے تساں ایں ریاست تےساڈے وسیب تے لکھ احسان کیتے اساں ہمیش تہاکوں ڈکھ ڈتن اساں بے وس لوک ہیں سئیں۔ اے ریاست ساڈے اتے آ پئی اے کیا کروں۔ تساں پاکستان کھپے آکھیا ہک گناہ وی کافی اے۔ کتلا مد کولوں لڑدے پئے او آخر کیوں ۔ اساں کوفیاں واسطے ۔ ؟
سئیں بس کرو ۔ اساں کئی بیا تل وطنی اگواݨ مردا نہی ڈیکھ سگدے۔ تساں اتلا کجھ کیتے اساں وسیب اچ وی تہاکوں نہی جتوا سگیے ۔بلاول کلھا پتر سے تہاڈا ۔ ریاست کنے نکل ونجو شفٹ تھیوو کتھائیں ۔ خشیاں ماݨو ۔ کتلا عرصہ تنگ تھیسو۔ عرصے کنے اے بھوگ بھوگ جلیو۔ جوانی گل گئی اے۔ کیا تہاݙیاں کئی خشیاں کینی۔ اج وی پنجابی شاؤنسٹ تہاݙا ناں چاوݨ کوں تیار کینی جیہرھے نواز شریف دے ناں تے ماتم کریندن۔ ریاست وسیب ای فتح کر گئی۔ یار ساڈے کیتے کیوں سر ݙینڊے پئے او۔ اے وسوں 5000 ہزار سال بھوگ بھوگین حملہ آور دے تے ہݨ وی بھوگ ویسی ۔ تساں بہوں کر گدے ول ونجو سئیں جیوݨ جیوو دادا نانا تھی تے بزرگی گزارو۔ اساں اپݨا بھوگ بھوگ گھنسوں۔
وسیب بیا تے کجھ نہی کر سگیا بس ہک سیاسی کارکن فضل لنڈ تہاڈے کیتے پنتالی ڈھینوار بغیر جتی ٹر ٹر لوکیں کوں تہاݙی مظلومیت ڈسینڈا رہ گئے۔
اجڑی وسوں دے نانویں تساں سبھ کجھ کیتے اتھو دستی تے لغاری جییں اژدھے نکھتن ۔ پراݨے ورکر بھک مر گئین۔ نویں پود تے بی بی دا قاتل تہاکوں سمجھدی اے. تہاݙا حوصلہ اے کھلدو اساں نسے کھل سگدے ۔ بس ہر حال جیوو ۔ تے اتھو ونجو بس۔ بی بی دے بعد کئی بیا نقصان نسے چا سگدے ۔
وسوں ہمیش اپݨے سوہݨے پتر تے ماݨ کریسی

کوفے اچو کوفی

dailyswail

See author's posts