جولائی 12, 2024

ڈیلی سویل۔۔ زمیں زاد کی خبر

Daily Swail-Native News Narrative

ذوالفقار علی لُنڈ عرف ذلفی سرائیکی وسوں دا سوجھوان لکھاری ہے ، او سیاسی سماجی اتے نفسیاتی مسائل بارے لکھدے ریہہ ویندن ، انہاں دیاں چونویاں لکھتاں ڈیلی سویل دے قارئین دی نذر

ذلفی

۔۔۔۔۔۔۔۔۔۔۔۔۔۔.

انساناں دا بنہیں جانداراں کولو جیرھا سب توں وڈا تے یونیک وکھرپ ھے، او اونہاں دی زبان، تہذیب تے ثقافت ھے۔ ہر خطے دے لوک اپݨی وسوں نال فطری تے ماحولیاتی عوامل نال جُڑ کرائیں اپݨی زندگی گُزارݨ سانگے ونکو ونک دے ریتی رواج، خوشی غمی دے انگ رنگ، سماجی گنڈھ تے آرٹ کوں زندگی دے اجتماعی اصولیں کوں ترتیب ڈیندن۔
ایں سانگے اے پوری دنیا دا منیا منایا بنیادی حق تے اصول ھے جو ہر علاقے یا خطے دے لوکیں دی اپݨی شناخت سانگے مقامی مروجہ اصولیں مطابق ڈوجھے لوکاں کوں نقصان ڈتے بغیر زندگی کوں ٹھہاوݨ تے گُزارݨ دی آزادی ہووݨی چاہیدی ھے۔
اگر کوئی گروہ یا قوم یا ادارہ یا ریاست ایں حق کوں تسلیم نئیں کریندی یا زبردستی کہیں قوم دی شناخت کوں مسخ کریندی ھے تاں اے اجوکی دنیا اچ انتہائی غیر مہذب تے کالونئیلسٹ اپروچ سمجھی ویندی ھے جیرھی کہیں صورت اچ قابل قبول کائینی۔
پر سندھ وادی دی بد قسمتی جو اتھاں کجھ شاؤنسٹ قوم پرستاں تے لوکاں دے کارݨ بہوں ساریں ہیݨے قومیں دی قومی شناخت کوں دباوݨ ہا مسخ کرݨ دی بہوں ہی گھناؤنی حرکت دا عمل کئی ڈہاکیں کولوں جاری ھے۔ موجودہ پاکستان اچ ایں غیر مہذب حرکت تے سیاسی جبر دے پچھوں ہیک وڈی تے ڈونگھی ویہتر پنجابی قوم پرستاں دی ھے۔ جیرھے کہیں اخلاقی یا سماجی پیمانیں کوں منیے بغیر ہیݨے قومیں کوں دبائی رکھدن تے اُنہاں دی شناخت کولو گھن اُنہاں دے ہر قسمی وسائل تیں اپݨا جماندرو حق سمجھدن۔
آہدن جڈاں کوئی فاشسٹ قوم پرست کہیں ریاست تیں قابض تھی ونجن تاں ول او ریاست دے وسائل کوں زیادہ کولو زیادہ اپݨے ہتھ اچ رکھݨ سانگے پہلا حملہ اونہاں دے نال راہوݨ آلیاں بنہاں قوماں دی شناخت تیں کریندن۔۔!
اجکل سانجھ پبلیکیشن دی طرفوں ہیک قاعدہ چھاپیا گئے جیندے اچ بہوں ساریں ہیݨے قومیں دی شناخت کوں ختم کرݨ دی گھٹیا حرکت کیتی گئی ھے تے اے قاعدہ ظاہر ھے ریاستی اداریاں دی فنڈنگ مُتوں نئیں چھپیا تے نہ ہی اے قاعدہ کہیں صلاح مشورے مُتوں چھپئے۔۔!
پنجابی لٹریچر تے لکھتاں ایں ویلھے بہوں گھٹ ہن ، انہاں دا نہ کوئی وڈا لکھݨ آلا بچے تے نہ کوئی پڑھݨ آلا بچے ، ہݨ انہاں ہیک واردات اے پا چھوڑی ھے جو اگر بنہاں مقامی زباناں اچ لٹریچر لکھیندا پائے تے اوندے تیں کہیں تراویں قبضہ کرو اوکوں کرو بھرو پنجابی لٹریچر بݨا کے اپݨے کھاتے دب ڈیوو تے سارے حقوق وی اپݨے ادارے کولو رکھو تے کتاب لکھݨ آلے کوں چند کتاباں ڈے کے ٹرخا چھوڑو اللہ اللہ خیر سلا۔
جیویں جو میں آکھئے اے عمل کئی ڈہاکیں کولوں جاری ھے تے بد قسمتی نال سرائیکی وسوں تے کئی وڈے لکھاری، ادیب، شاعر تے ناول نگار ایندا حصہ بݨ کے اپݨی شناخت کوں نقصان پُچاوݨ اے انہاں پنجابی قوم پرستاں دے ہیک لحاظ نال بانہہ ٻیل ہن، پتہ نئیں انہاں کوں کس چیز دی کمی ھے، جیرھی بُکھ ھے جو اے بار بار انہاں پنجابی شاؤنسٹ قوم پرستاں دے ہتھیں اپݨی شناخت کوں گِروی رکھ خوش تھیندن۔ میں کیرھے کیرھے مہان ادیب دا ناں چاواں جیرھا ایں بے کار تے نیچ حرکت اچ شامل نہ رہیا ہووے۔
بھائی اگر ساکوں واقعی اپݨی سنجاݨ/شناخت کوں جیندا رکھݨے تاں ساکوں پنجابی قوم پرستاں دے کوڑکیاں کولو بچݨا ہوسی نہ تاں اے او قوم ھے جیرھی ہر قسمی وسائل تیں قابض تھی کے باقی قوماں دا وجود وی کھا ونجݨ تیں راضی کائینی۔

اے وی پڑھو:

ذلفی دیاں بیاں لکھتاں پڑھو

%d bloggers like this: