اظہرلشاری
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان ئچ جیکر اساں آپݨے ایݙوُں اوݙوُں سندھی، بلوچ اتے پختوُن قوم پرستی دیاں تحریکاں کوُں ݙیکھوُں تاں ساکوُں اِنہاں سبھݨاں ئچ ترقی پسندی، روشن خیالی اتے سیکولرازم دا ھِک ٹھوکواں سانجھا عنصر ݙسدے۔ جدید سائینسی علوُم کوُں ودھاوݨ ، دین دھرم اتے فرقے دی بنیاد تے لوکاں کوُں ونڈݨ دی مخالفت، تریمتیں، اقلیتاں اتے ٻنہاں پنڄے کُٹے طبقات (پورھیت، ھاری، بے زمین لوک) کوُں اڳوُں آݨن، انہاں تحریکاں دے نظریاتی فلسفے دے تھمب (ستوُن) ریہہ ڳئین۔ ایہو ئی فلسفہ بنگالی قوم پرستاں دا ریہہ ڳئے۔ سرائیکی قومی تحریک دا تل ٻدھݨ آلے موھری سرائیکی اڳواݨاں اتے سنگ سانجھاں کیتے وی بنگالی، سندھی، بلوچ اتے پختوُن قوم پرستاں دا اے ترقی پسند، روشن خیال اتے سیکوُلر چہرہ ھِک وݙی انسپائریشن ھئی۔ سچ تاں اے ھِ جو انوی سو اسی دے ݙہاکے تئیں سرائیکی تحریک دے اڳواݨاں دی ھِک وݙی تعداد مارکسسٹاں دی ھئی۔
ھُݨ کتری اڄوکی سرائیکی قومی تحریک تے دید بھنویجے۔
ھیٹھ ݙتی پوسٹ پڑھیجے، جیندے ئچ ھِک آپوُ ڄاݨ سرائیکی قوم پرست جوان ‘تحریک لابیک’دے اڳواݨ مولانا سعد رضوی کوُں سرائیکی وسیب آوݨ تے "ھردم آئے سَت بسم اللہ” آھدا پئے۔ اےفیس بُک پوسٹ ایں طراں دی کوئی کلھی ھِکا (آئسولیٹڈ) آواز نئیں۔ اِیں توُں پہلے جماعت اسلامی دے امیر مولانا سراج الحق وسیب ئچ سرائیکستان ڈیموکریٹک پارٹی دے سیکریٹیریٹ دا دورہ کیتا، تاں پارٹی دے اڳواݨاں امیر جماعت اسلامی مولانا سراج الحق کوُں ھردم آئے آکھا، نیلی اجرک پوائی، نہال تھی تھی فوٹو چھکوائے اتے سوشل میڈیا تے ایں ملاقات دا خوُب دھوُم دھڑکا کیتا (نیلی اڄرک تاں خیر مارکے عمران خان کݨ گھن جنرل مشرف تئیں ھر کتے ٻلے کوُں پوّائیءِ)۔
ڳالھ اِتھائیں نئیں مُکدی۔ کجھ ݙینہہ پہلوُں تسُاں سائیں نذیر لغاری دے اوُں ٹی وی انٹرویوُ دی سوشل میڈیا تے وڈیو وی ضروُر ݙٹھی ھوسی جیندے ئچ سائیں ھوݨیں پوُرے زور شور نال تریویہہ ضلعیاں دے سرائیکستان دی ڳالھ پئے کریندے ھَن۔ اِیں انٹرویو ئچ سائیں ھوݨیں جگ مشہوُر فرقہ پرست مولانا اعظم طارق دے پُتر، ایم پی اے مُعاویہ طارق دا سرائیکی صوبے دی ھمائت اتے جھنگ کوُں اِیں صوبے ئچ شامل کرݨ دے مطالبے کوُں سرھیندے پئے ھَن۔
اے وڈیو ݙیکھ میں حیران تھیندا ریہہ ڳیم اتے اندری اندر سوال کریندا ریہم جو مُعاویہ طارق کوُں سرھیندے، سائیں نذیر لغاری کوُں جنرل ضیاء دے دور کݨ سرائیکی وسیب ئچ شروع تھیوݨ آلی فرقہ پرستی اتے خوُن ریزی دی سیاست یاد ئی نہ آئی ھوسی یا ڄاݨ ٻُجھ اکھ نوُٹی کیتی ریہہ ڳئے ھوسن؟
سرائیکی اڳواݨاں دا اڄ رضوی کوُں ھردم آئے آکھݨ، سراج الحق نال نہال تھی تھی فوٹو چھکواوݨ اتے مُعاویہ طارق کوُں سرھاوݨ کیا ظاھر پیا کریندے؟
ݙیکھݨ دا آپݨاں آپݨاں انداز ءِ۔ اِنہاں واقعات کوُں ݙیکھݨ دا ھِک انداز اے تھی سنڳدے جو پرے بھاہ لاؤ۔ اِنہاں واقعات کوُں، غنوالاؤ ئی نہ، سُنڄیاں سِریاں ھِن، آکھن پئے تے کرن پئے جو دِل آھدے نے۔ اِنہاں دے آکھݨ کرݨ نال کیا تھیوݨے، اتے چُپ کر، سُݨی رکھو، ݙٹھی رکھو (اساں سرائیکیاں دی وݙی تعداد ‘اوہ ڄاݨے’ دا مزاج رکھدے سے اتے اساݙے ݙیکھݨ دا انداز اکثراء ایویں ئی ھوندے)۔
ݙیکھݨ دا ٻیا انداز کتری سنجیدہ وی تھی سنڳدے۔ وِچار کریجے جو ایویں کیوُں پیا تھیندے اتے ایندے کیا سِٹا نکلݨے؟ سرائیکی قومی تحریک کیڑھے پاسے ویندی پئی ءِ؟ کتھائیں اِیندا "پاسا پھٹ” تاں نئیں ڳیا؟ کتھائیں اساں کہیں اندھارے کھوُہ ئچ دھرک تاں نِسے پئے مریندے؟ جیکر سرائیکی قومی تحریک دا "پاسا پِھٹدا” پئے، تاں اِیندا کیا کریجے؟؟
نوٹ:
اظہر لشاری شہزاد عرفان سئیں دی فیس بُک پوسٹ دے ولدے اچ اتلی لکھت شئیر کیتی ہے، شہزاد عرفان دی لکھت ہیٹھوں ڈتی ویندی پئی اے
کیا ہن سرائیکی تحریک کوں سرائیکی صوبہ بنڑاون کیتے حافظ سعد حسین رضوی دی لوڑھ پے گئی ہے؟ کل تئیں ہک فاشسٹ جماعت اسلامی دے امیر دی حمایت گھندے کھڑے ہن اج ہک بئی فاشٹ تنظیم دا ناں سرائیکی تحریک نال آندا پئے ۔۔۔۔کیا سرائیکی صوبہ دے خلاف اے سازش نہیں ؟ جو بنیاد پرستی دے ہتھیار نال سرائیکی سوال کوں اصلوں مکا ڈیونڑیں۔ پنجابی اسٹبلشمنٹ دی اے کالی دیواراں ہن جیہڑھاانہاں دے نال وں وی لنگھیا کالا تھیا ویسی ۔۔۔۔ اساں صاف ستھری جمہوریت پسند قوم پرست سرائیکی تحریک تہاڈے ہتھڑیکے کیتی ہاسے جیندا اج اے حال ہے جو اے تہاڈے ہک تنظیمی ساتھی دی اے پوسٹ ڈیکھ تے انتہائی افسوس تھیندا پئے جو سرائیکی تحریک کو مذہبی انتہا پسندی دے ہتھیار نال مُکاونڑ دی کوشش کیتے ویندی پئی ہے ۔۔۔۔ نہایت افسوس تے ڈکھ دی گالھ ہے ۔ شہزادعرفان
یہ بھی پڑھیے
”شیر دل رانی، مائی چھاگلی (وسیب یاترا :8)||سعید خاور
”چِڑیاں اُٹھو کوئی دھاں کرو“ (وسیب یاترا :7)||سعید خاور
” "دل تاں آہدے یار دی وَستی ڄُلوں”(وسیب یاترا :6)||سعید خاور