سرائیکی شاعر نذیر احمد دلشاد||ظہور دھریجہ

معروف سرائیکی شاعر امان اللہ دے شاگرد نذیر احمد دلشاد گزریل ڈینھ دل دا دورہ پوون نال فوت تھی گے۔نذیر احمد دلشاد دا تعلق نریجہ نگر رحیم یار خان نال ہا۔انہاں دی عمر 60سال توں زائد ہئی۔نذیر احمد دلشاد دا شاعری مجموعہ شائع تاں نیں تھی سڳیا پر غیر مطبوعہ کلام بہوں اے۔

کافی ،غزل تے ڈوہڑہ بہوں سوہنا لکھدے ہن۔انہاں دے والد حاجی خیر محمد علاقے دے معروف زمیندار ہن۔نذیر احمد دلشاد وی زمیندارہ کریندے ہن،نذیر احمد دلشاد اپنڑے لواحقین 5پتر تے ہک دھی چھوڑی اے،حاجی نذیر احمد دے بھرا جام منظور نریجہ،جام صدیق نریجہ، جام مختیار نریجہ،جام اختیار نریجہ اپنڑی دھرتی،اپنڑی مٹی نال محبت کریندن،سرائیکی صوبے دے کٹھ میل اچ شریک تھیندن۔رحیم یار خان دا نریجہ نگر سرائیکی تحریک دا مرکز اے۔معروف فلم ڈائریکٹر احسن فریدی دا تعلق نریجہ نگر نال اے، سرائیکی فلم انڈسٹری وچ انہاں اپنڑا لوہا منوائے۔شوبز دی دنیا دا ہک بہوں وڈا ناں جام منیر نریجہ دا تعلق وی ایں وستی نال اے،انہاں دیاں وی سرائیکی واسطے بہوں خدمات ہن۔امان اللہ ارشد دا ہک بیا نینگر شاگرد فیصل سعید فیصی وی ایں وستی نال تعلق رکھیندے۔

دھریجہ نگر تے نریجہ نگر بظاہر ڈو انج انج ناں ہن پر آپت اچ نریجہ تے دھریجہ برادری دیاں رشتے داریاں ہن سوڑے سنگ ہوون دے نال نال سرائیکی تحریک دے حوالے نال سوچ تے فکر وی ہکا اے۔دھریجہ نگر وانگے نریجہ نگر وچ وی سرائیکی دے کٹھ میل تے جلسے تھیندے رہندن۔ شاعر،ادیب، دانشور تے فنکار شریک تھیندن۔نذیر احمد دلشاد دی وفات نال ہک خلاء پیدا تھی گے۔

دلشاد اپنڑی کتاب وی چھپواون چہندے ہن،انہاں دی اے وی حسرت ہئی جو انہاں دی حیاتی اچ سرائیکی صوبہ بنڑے ہر او حسرت اپنڑے نال گھن گے۔ہنڑ لواحقین دا فرض اے جو او انہاں دی آس تے امید کوں پورا کرن،کتاب چھپواون تے سرائیکی صوبے دی جدوجہد کوں تیز کرن۔انہاں ڈینھاں وچ نذیر احمد دلشاد تے نال نال قوم پرست سرائیکی رہنماء محمد علی خان دا کراچی وچ انتقال تھے۔عظیم شاعر تے دانشور سئیں سعید اختر سیال دیرہ اسماعیل خان وچ فوت تھی گے تے معروف سرائیکی بزرگ شاعر سئیں امیر بخش دانش 109سال دی عمر اچ لیاقت پور دے نیڑے اللہ کوں پیارے تھی گن۔اللہ سئیں مرحومین کوں جنت اچ جاہ ڈیوے جو شاعر قومیں دا صرف سرمایہ وی نیں ہوندن بیامبر وی ہوندن