اکتوبر 28, 2021

ڈیلی سویل۔۔ زمیں زاد کی خبر

Daily Swail-Native News Narrative

مس نگینہ جان ملتانی||رفعت عباس

گھنٹہ گھر ملتان،ڈریم لینڈ سینما تے وت پراݨی کوتوالی توں سجے پاسے ہک گلی وچ استاد خادم حسین خان صاحب لَے کار دا گھر ہا۔میں اتھاں 1988 وچ اپݨے دوست سید امیر علی شاہ مرحوم نال ڳیا ہَم۔

رفعت عباس
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گھنٹہ گھر ملتان،ڈریم لینڈ سینما تے وت پراݨی کوتوالی توں سجے پاسے ہک گلی وچ استاد خادم حسین خان صاحب لَے کار دا گھر ہا۔میں اتھاں 1988 وچ اپݨے دوست سید امیر علی شاہ مرحوم نال ڳیا ہَم۔ہک وݙے کمرے دے ادھ وچ وِچھی ہک کھٹ تیں خان صاحب ٻیٹھے ہَن تے انہاں دا واڄا اڳوں لاتھا ہا۔اساں انہاں دے ساہمیں ہک کھٹ تیں ٻیہہ تھئے۔امیر علی شاہ انہاں توں لَِے کاری سکھدا ہا۔خان صاحب ہارمونیم وڄیندے ہوئے لَے دے ٻول پڑھدے ہَن تے امیر علی شاہ ایہ سبھ کجھ ہک کاپی وچ لکھ گھندا ہا۔ایہ لَے دی ونڈ دا ہک نازک کم ہا جیں وچ اوہ ݙوہیں استاد شاگرد گم تھی ڳئے ہَن تے میں ازل تے ابد دے وچکار ایں ویلے دی گواہی وچ حیران ٻیٹھا ہم۔ایں کمرے دے ابھے/شمال پاسوں ہک ٻیا کمرہ ہا،اوندا ٻوہا کھلیا تے ہک زنانی آواز آئی : ‘چا بن ڳئی ہے۔’ایہ آواز اسی سالیں دے استاد خادم حسین خان دی ستر پچھتر ورہیں دی بھیݨ نگینہ جان دی ہئی۔میں ایں گھر وچ چار پنج پھیریں گیومی تے ہر واری ملتان دی ایں مہان گائیکہ نگینہ جان کوں ݙِٹھم تے آؤندے ہتھ دی چا پیتم۔امیر علی شاہ ڈسایا جو مس نگینہ جان دے کلکتے وچ گراموفون ریکارڈ بھریجے ہَن تے ہک زمانے ہر پاسے اوندی اواز دا چرچا ہا۔میں ہمیشہ ایہ اواز سنن دی سِک وچ رہ گیومی۔رانجھا جوگی دا شکر گزار ہا جو اوں مس نگینہ جان ملتانی دی اواز سݨوائی ہے۔

رفعت عباس دی کتاب "ایں نارنگی اندر” پڑھن کیتے کلک کرو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایں نارنگی اندر پڑھن کیتے کلک کرو

%d bloggers like this: