مارچ 28, 2024

ڈیلی سویل۔۔ زمیں زاد کی خبر

Daily Swail-Native News Narrative

کالی||عابدبزدار

ہݨ جیکر اساں ایں ظالم ریت کوں ختم کرݨ بارے خیال نہ کیتا تاں ساݙیاں تریمتیں ہمیش ہمیش کیتے کالیاں تھیندیاں، ویکدیاں اتے قتل تھیندیاں راہسین

عابدبزدار

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تریمت دا کہیں مرد نال محبت کرݨ جا اوندے نال جسمانی تعلق قائم کرݨ کوں کالی آکھیا ویندے اتے اوں مرد کوں کالا آکھیا ویندے. ایں مکمل عمل کوں کاروکاری آکھیا ویندے. ایندے علاوہ کالی کیتے مِیلی، گندگی اتے ایہو جھیں ٻے کافی لوظ وی ورتائے ویندے ہِن. سماج مخالف، ٻہوں دلیر اتے اپݨے اندر پیار محبت دے حقیقی جذبات رکھݨ آلی تریمت خود گھرو نکل ونڄݨ جا خود پیار محبت دیاں رنگ رلیاں مناوݨ دے باد پکڑی ونڄݨ تیں خود کالی تھیندی ھے جا اینکوں کالا کیتا ویندا ھے.
ایندے علاوہ ہک تریمت کولو جان چھوڑاوݨ، مرد اپݨی پسند دی ٻی تریمت کوں پرنیچݨ، کہیں وی شک دی بنیاد تئیں، برادری دا بدلا گھنݨ، ہک ٻے کوں اُچا جھیکا ݙیکھالݨ اتے مرد دی عنا اتے غیرت کوں بچاوݨ کیتے تریمت کوں کہیں وی قصور دے بغیر ذبردستی وی کالا کیتا ویندے.
دیرے راڄن پور دے سمورے سرائیکی وسوں اچ کاروکاری دا اے کاروبار اتنا خطرناک اتے عام ھے جو ایتھو دی اَدھی آبادی کالیں رنیں دی پیدہ کردہ ھے.
کالی تھیوݨ آلی تریمت کوں قتل کر ݙیتہ ویندے جا اپݨی برادری دے علاوہ کہیں ٻی برادری اچ پیسیں نال ویچ ݙیتہ ویندے اے ویچݨ وی تریمت کیتے ساری ذندگی دا بھوڳ ہوندے لیکن کالے تھیوݨ آلے مرد کوں کالی تریمت آلے جا تاں قتل کر ݙیندین جا چٹی گھن تیں معاف کر ݙیندین لیکن ویکدی چھڑی تریمت اے.
ایہیں کاروکاری پیچھو ٻہوں سارے خاندانی قتلام دے جھیڑے شروع تھیندین اتے کئی نسلیں کوں معاشی طور تیں تباہ کر تیں کئی کئ نسلیں تیں چلدے راہندین اتے ٻہوں سارے بندے کوہیندے قُسدے راہندین اتے ایھے نسلی جھیڑے ݙوہیں خاندانیں دی مکمل بربادی تیں ونڄ مُکدین. ساݙے وسوں اچ انھیں جھیڑیں بارے ہک مشہور میتھ ھے "” جھیڑا وَنی(تریمت) دا جا ٻَنی ( ذمین) دا ”
ذیادہ تر کالیاں تریمتیں عام لوکیں دیاں تھیندین کَݙائیں گودیں، سرداریں دیاں تریمتیں کالیاں کینی تھیندیاں. کیا پتہ انھیں دے جنسی جذبات جا پیار محبت دی چاہت ختم تھی ویندی ہوسی جا سیرو ظاہر تھیوݨ نہ ݙیتی ویندی ہوسی جا سیرو اے سارے بھوڳ چھڑا ہوسین عام لوکیں دی تریمتیں کیتے.
ہݨ جیکر اساں ایں ظالم ریت کوں ختم کرݨ بارے خیال نہ کیتا تاں ساݙیاں تریمتیں ہمیش ہمیش کیتے کالیاں تھیندیاں، ویکدیاں اتے قتل تھیندیاں راہسین. ہُݨ سماج بدلدے پین سماج دیاں سوچاں وٹیندیاں پین اتے سماج تریمت کوں جنسی خوہشیات تریمت تک رکھݨ دے قائل ہن اتے ایں جنسی خوہیش کوں سمورے سماج دی عزت غیرت نال نیں ݙیہدے.
کارو کاری
چھوٹا ہک معصوم ایاݨاں
دل ٻدھ پیو دے نال الاݨاں
ابا سئیں توں رنج ناں تھیویں
ڳال میݙی تے انج نہ تھیویں
میکوں ہک وسواس پیا کھاوے
مسئلہ میکوں سمجھ نہ آوے
بھیر جبو بھیݨ کوں رل مل ساریں
ڳیچی گھٹ تے کیوں چا ماریے
ٻیٹھی ہوئی او واݨ ٻدھیندی
کہیں دا ہی او کیا وڳڑیندی ؟
تیکوں حال میں ݙینداں ٻچڑا
سچی ڳالھ ݙسینداں ٻچڑا
کہں کوں ایہو حال نہ ݙسیں
لیج دی ڳال اے ڳالھ نہ ݙسیں
گزری رات کوں دھمی ویلے
غیر جوان دے نال کھڑی ہئی
پاتی پیار دھمال کھڑی ہئی
ابا ! خوف خدا توں ڈریں
کاوڑ نہ کہں ڳال تے کریں
پر تاں پیڑے پتر وی تیݙے
ایہو جھاں ہک جرم کیتا ہا
پرلی وستی ونج پکڑیا ہا
اوندے سانگے
در در پڳوں رولیاں ہانی
چٹی دے وچ
سوہنیاں دھیریں گھولیاں ہانی
پتر توں ساہ چا واریا ہاوی
اونکوں کیوں نہ ماریا. ہاوی ؟؟؟
(نزیر فیض مگی۔۔۔)
 بزار قبیلے دی تریمت جھیری ہک وݙاݨی قبیلے نال نِکل گئی ھے اتے بزداریں اینکوں کالا کرار ݙے ݙیتے ہُݨ اے تریمت اپݨی ذندکی اپݨیں انداز نال جیوݨ دی خوہیش مند ھے اتے اساں تریمت دے ذاتی فیصلے دی قدر کریندیں ہوئیں ایں مظلوم تریمت دی مکمل حمایت کریندوں جیکر بزدار قبیلے دے سرداریں جیندے وچ غلام رسول، شیرمحمد اتے محمود شامل ہن جیندا اے تریمت اپݨی ویڈیو اچ ذکر کریندی پائی ھے ایں مظلوم تریمت کوں قتل کرݨ جا ویچݨ دی کوشیش کیتی تاں اساں ایں مظلوم تریمت دے حق اچ ہر قانونی اتے اخلاقی اہر کریسوں کیوں جو تریمت کوں قتل کرݨ جا ویچݨ کولو کئی گناں چنڳاں ہوسی جو او اپݨی ذندکی اپݨی مرضی نال گزارے
آخر اچ میں ہیومین رائٹ دیں تنظمیں اتے ایں ملک دے قانونی اداریں کولو درخواست کریساں جو ایں تریمت دی ذندکی بچاوݨ کیتے اینکوں تحفظ ݙیوین

اے وی پڑھو:

سرائیکی تحریک دی کہانی۔۔۔اکبر ملکانی

ہک سال پہلے دی ڳالھ۔۔۔اکبر ملکانی

ضلع راجن پور دے سرائیکی قومی سنجانڑ دے تاریخی 5 وڈے ناں۔۔۔اکبر ملکانی

عابدبزدار دیاں مزید لکھتاں پڑھو 

 

%d bloggers like this: