مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

حسݨ مرتضی دا اشو لال سئیں بارے پچھیے ہک سوال دا ولدا||مشتاق گاڈی

اینویں پیپلز پارٹی نال سانجھ کرݨ دی لوک سانجھ دی اپݨی نویکلی سٹریٹجی ریہہ ڳئی ہے۔ او سٹریٹجی 1986 وچ وی ہئی، 2010 وچ وی ہئی (جݙاں اشو سئیں کجھ کلہیپے وچ لڳے ڳئے) تے او اڄ وی ہے۔

مشتاق گاڈی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اشو ساݙا دوست ہے۔ جیوݨ دے کئی ݙہاکے کٹھے کم کر کنیں گذارن۔ جے او پچُھسی جو تساکوں کیا سیاسی اختلاف ہے تاں اونکوں لازمی ݙسیساں۔ اڄاں تاں میݙی ایہا سک ہے جو اونکوں اپݨی ننویں ذمیواری وچ سوبھ تھیوے۔
ایں گذری وہاݨی وچ کئی اینجھے موقع آئن جتھاں اشو تے اساں کٹھے کم نئیں کر سڳے۔ مثال کیتے اساں اے "سرائیکی لوک پارٹی” دے اَہر نال متفق نہسے ایں کیتے کئی سال کٹھے نئیں چلے۔ ایں اَہر وچ ڄاݨ نئیں کیتلی انرجی لڳی ہے تے ہݨ اوندا ناں نشان نئیں۔ تفصیل آکھسو تاں کہیں ٻئے ویلھے شئیر کر ݙیساں (تفصیلات ڈھڳ ہن، نہ پھولوں تاں چنڳاں ہے)۔
اینویں پیپلز پارٹی نال سانجھ کرݨ دی لوک سانجھ دی اپݨی نویکلی سٹریٹجی ریہہ ڳئی ہے۔ او سٹریٹجی 1986 وچ وی ہئی، 2010 وچ وی ہئی (جݙاں اشو سئیں کجھ کلہیپے وچ لڳے ڳئے) تے او اڄ وی ہے۔
لوک سانجھ دا خیال ہے جو پیپلز پارٹی صوبہ وچ تاں ہک موہری سٹیک ہولڈر ہے پر جے تائیں سرائیکی نیشنلزم دا سوال ہے (جیندے کیتے لوک سانجھ بݨائی ڳئی ہئی) تاں اوندے وچ پیپلز پارٹیاں دیاں کجھ سیریس مجبوریاں تے حدود ہن (جیویں اے جنوبی پنجابی دے ناں دی مثال گھن گھنو۔ اینویں ٻنہیں مظلوم ہمسایہ قومیں نال ڈائیلاگ، تے اینجھے کئی پکھ۔ وغیرہ)۔
جمہوری ترقی پسند سیاست تے قومی تحریک وچ ہک پُل دا کم چھڑا لوک سانجھ کریندی ریہی ہے تے اوہا ای کر سڳدی ہے۔ لوک سانجھ تݙاں بݨی جݙاں پیپلز پارٹی موجود ہئی۔ اے لوک سانجھ دی تحریک دا ای نتیجہ ہئی جو پیپلز کلچرل ونگ وسیب بݨا جیڑھا ہݨ ایتلا مقبول تھیا پئے۔ پیپلز پارٹی کوں سرائیکی تحریک وچ لوک سانجھ جہیں جمہوری تے ترقی پسند سلہاڑیں نال سانجھ دی لوڑھ ہے۔ ایہو ݙوھیں پیپلز پارٹی تے سرائیکی وسیب کیتے چنڳا وی ہے۔
ماحول کجھ ٹھڈا تھیوے تاں کئی ڳالھیں کھل کنیں تھی سڳدن۔

اے وی پڑھو:

مشتاق گاڈی دیاں بیاں لکھتاں پڑھو

%d bloggers like this: