نیریٹو (بیانیے) نال محبت دی اساری|| ذلفی

کہیں نیریٹو نال محبت چھڑی ماضی دی لگیسی دی متہاج نئیں ہوندی اجوکی دنیا اچ سنجاݨ دے نال نال وسائل دی جنگ تے اوندے نال جُڑے ایشوز زیادہ اہم ہوندن۔۔کیوں جو ایشوز دی پرکھ رکھݨ تے انہاں دی پالیٹکس کرن اجوکی دنیا دا بہوں اہم تقاضا حے۔۔تُساں مسلماناں دے نیریٹو کوں بطور کیس سٹڈی ڈیکھ سگدے ہاو۔۔

انہاں جتنا وسائل تے پروپیگنڈہ عظمت رفتہ تے شاندار ماضی دے حوالے نال کیتے اوندا رزلٹ اج تہاڈے سامنے حے۔۔یعنی جہے تک تساں روز مرہ ایشو دی درست نشاندہی نیوحے کریندے اوہ تک تہاڈی نیریٹو یعنی بیانیے نال محبت دی اساری فضول عمل ہوندے۔۔!

سرائیکی تحریک اپݨے سٹھ ستر سال دے پندھ اچ سنجاݨ دے مسئلے کولو تھیندی ، کلچرل پہلو کوں ورتیندی ہݨ سیاسی تحریک دی شکل اختیار کریندی پائی حے۔۔!

سیاسی تحریک اپݨے آپ اچ تاریخ تے کیریکٹر جنریٹ کریندی حے تے اے کیریکٹر تے تاریخ تہاڈی تڈ کوں مزید نشابر کریندن تے ول ہاولیں ہاولیں تساں اگاں ودھدے رہ ویندے ہاؤ ۔۔۔

سرائیکی تحریک ایں گالوں ہیک جدید تے یونیک تحریک حے جیرھی تریجھی دنیا اچ موجود مار دھاڑ دے عناصر کوں نیگیٹ کر کے اگاں ودھی حے تے مزید ودھدی پائی حے۔۔

ایندے اچ ہیک اینجھا میکانزم خود بخود ڈویلپ تھیندا ویندے جیندے اچ جوابدہی تے شفافیت دے پہلو بہوں نمایاں ہن۔۔ہر بندہ ہیک ڈوجھے دا محاسبہ کریندا بیٹھے تے جھیڑا لا کے اپنا کتھارسز وی کریندے ایندے نتیجے اچ ہیک نویں گالھ تے سیاسی ترتیب تے سیاسی ڈھانچہ مرتب تھیندا آندے۔۔

میں سمجھینداں اجوکی دنیا دیاں تحریکاں ماحولیات، زمین، مادی وسائل، اختیارات دی تقسیم، ہمسائیاں نال تعلقات تے اپݨی وسوں نال جُڑت پاروں زیادہ کامیاب تھی سگدن ۔۔

ماضی یا ہیروز دا ہیک کردار ضرور ہوندے پر ہیروازم دی تڈ تیں کوئی تحریک زیادہ عرصہ چل نئیں سگدی کیوں جو ہیروازم ہیک اینجھی نرگسیت تے پاور میکانزم کوں ڈویلپ کریندے جیرھا زیادہ فلیکسیبل کائینا ہوندا تے اوندا کینوس ہیک سطح کولوں اگاں نئیں ونج سگدا۔۔!