تھر ڈائری(1)۔۔۔۔ ذلفی لُنڈ

پندھ کرݨ دی اپݨی چس حے۔ حیاتی دی پندھ وہاݨی اچ انسان ہر ویلھے ہیک نویں تجربے اچوں گزردا رہ ویندے، کجھ تجربے ساڈی خوشگوار یادیں دا اثاثہ تے کجھ ناخوشگوار احساس کوں جنم ڈیندن۔بندہ شودا انہیں ڈوہیں نال جیوݨ دی رسی تیں ٹُردا رہ ویندے۔

اے پندھ کہانی وی خوشگوار تے ناخوشگوار تجربیں دے احساس کوں تہاڈے نال سانجھ کریسی اگاں ٹردی رہ ویسی۔

ہیک چیز طے حے پرسیپشن تے حقیقت اچ بہوں وتھ ہوندی حے جیکوں پاٹݨ واسطے ساکوں آپ کوں اوں پورے منظر دا ہیک کردار بݨا پوندے۔ایں سفر کولو پہلے میڈیاں وی بہوں ساریاں پرسیپشن ہن جیرھیاں میں لوکاں دی منہ زبانی سݨ کے بݨایا ہویاں ہن۔مثلا تھر بہوں سنڃ تے بر جاہ حے جتھاں بہوں بکھ حے اتھو دے بال بیماریں تے بُکھ کولو مر ویندن، اتھاں تریمتیں خود کشی کر ویندن، اتھاں ڈیویلپمنٹ ناں دی کوئی چیز کائینی، اتھوں دے لوک گنوار تے ان پڑھ ہن ، انھاں کوں تاں اجوکی دنیا دی تہذیب دا پتا وی کائینی وغیرہ وغیرہ۔۔اے او منظر نامہ حے جیندا سورس اجوکا مین سٹریم میڈیا تے سندھ کولوں باہر راہوݨ آلی پڑھی لکھی مڈل کلاس حے۔

ڈوجھی پرسیپشن اے حے جو تھر بہوں سوھݨی جاہ حے، اتھاں ونکو ونک دیاں فصلاں تھیندن، اتھاں ڈنگر ڈھور چردن، ڳنویں دیاں کھیراں چردن، لوک موسیقی تے لوک کہانیاں ہر ٹبے تیں کھنڈریاں پُنڈریاں پائین۔ اتھوں دا کلچر بہوں یونیک حے اتھاں مذہبی ہم آہنگی تے لوکاں دا آپت اچ پیار بہوں حے۔

اے کہانی کالونیل مائنڈ سیٹ، جدید ڈیویلپمنٹ دے نال جُڑیا بیانیہ ، میڈیا دی طاقت، عام لوکاں دی اپݨی کہانی، مٹی ،مظاہر فطرت، جیا جون، لوک دانش تے زندگی دے بارے اتھوں دے وسنیکاں دا اپݨا نظریے کوں گھن کے ٹُرسی پائی۔ ڈیہدے ہیں ایں پندھ وہانی اچ میکوں کینجھے تجربے تھیندن ، کیا ڈیہدے ہیں تے کیا ڈسدے۔۔تہاڈے نال سانجھ کرینداں رہ ویساں۔۔۔!