سمندر ہک جیندا جاگدا ولی اے۔۔۔مظہر حسین

كراچی ڄہیں شاہر اچ شاہر دے شور توں بچݨ اتے آپݨی فرسٹریشن کݙھݨ دا ہیکو رستہ ہے جو بندہ سمندر دے پاݨیاں دے قدماں اچ ونڄ ٻاہوے،

سمندر دے پیراں اچ انسان کوئی عجیب ڄہیں کیفیت اچ وڑ ویندے، سمندر ہک جیندا جاگدا ولی اے، ہزاراں لکھاں سالاں پہلے ڄݙاں انسان دا شعور اڄاں ٻہوں ڳݨڄیا ہویا ہا،

انسان اینکوں دیوتا آکھیے تاں اڄ پک تھیندے جو سمندر واقعی دیوتا ہے، منوڑہ ساحل تیں ہک مندر ہے، ساݙا سوہݨا یار دانیال گھلو اتھاں گھن گیا،

میں اونکوں ٻہوں وکھری دل نال ݙیہدا رہیا، ٻہوں خوشی وی تھئی، اتے سبھ توں وݙی خوشی اے تھئی جو اتھاں جیہرا پنڈت ہا او تھر دا واسی ہا،

اوندے نال کئی عجیب ڄہیں اپنائیت ݙو چار منٹ اچ بݨ ڳئی، میں اوں کنوں ٻہوں ساریاں ڳالہیں پچھیاں، او جواب ݙیندا رہیا،

دل آہدے جو ہک انڄ ڈاکومنٹ ایں مندر اتیں لکھیا ونڄے، کݙھاں دوستاں نال لازمی شئیر کریساں،

بہرحال ایں مندر دی ہک خاص ڳالھ اے ہئی جو اے پاݨی دے دیوتا دا مندر ہا اتے یارہاں سو سال پراݨا ہا،

وڳدے ویلھے اتے کم کار دی اٻاہل توں ٻہوں پریں مندر دے صحݨ اچ گزریے ݙو اݙھائی گھنٹے، ایتلا تھوڑے ہن جیہرے گݨتری اچ مشکل آون،
سمندر ہووے یا دریا، پاݨی دی ہک آپݨی موج ہوندی اے، ہک آپݨی کھیݙ ہوندی اے، ہک آپݨاں ردھم ہوندے،

سمندر کوں سڄھ نال ݙیکھو تاں  او ہک  وکھرے رنگ اچ ݙسسی، اونکوں ہوا نال محسوس کرو تاں اوندا ہک ٻیا رنگ ہوسی، چندر نال ایندی کھیݙ وت ٻئی ہوسی، پونڳھیاں نال ایندے مزاج آپݨاں ہوسی، زمین نال ایندا وت ٻیا کوئی رشتہ ہوسی،

سمندری پکھی وت تاں رنگ لائی ودے ہوندن، ویسے تاں او شودے آپݨاں رزق ودے لبھیندے ہوندن، لیکن انہاں کوں اݙدا، پاݨی نال لاݙ کھیݙدا ݙیکھو تاں ایویں ݙسدے جو زندگی بس ایہا ہے ۔

ایں توں باقی ہے تھڄوں موت، یا موت نئیں تاں گھٹ کنوں گھٹ زندگی وی نئیں، اݙدیں اݙدیں وت اے پاݨی اچ ٻیہہ راہندن، اتے لوݙےٻیٹھے کھاندے ہوندن، جیویں یکا پرباش ہوون،

جیویں اے انھاں پاݨیاں دے مالک ہوون، انہاں دی آپݨی جاگیر ہووے، لݙدے، تھتھردے، اݙدے، آپݨیاں پروازاں دی ٻہوں سوہݨی اتے سونہیاں آوزاں نال ہوا دی فریکوینسی نال ڳنݙھ بݨیندے، چساں ودے چیندے ہوندن، انسان اے سبھ ݙیکھ کے سارے ݙكھ بھل ویندے،

سمندر دے قدماں اچو اٹھی کے انسان ہک نویں تݙ اتے نویں روح نال سرمایہ داری، بدبو دار سماج، انتہائی گھٹیا اخلاقی قدراں اتے زمانے دے ہر دروہ نال لڑݨ واسطے وت اپݨے آپ کوں تیار کر گھندے.

ویب ڈیسک

See author's posts