اساں پچھو تیں ویندے پئے ہیں۔۔۔ مظہر حُسین

دریا وو دریا پاݨی تیݙے ݙونڳھے

گاوݨ چاہندوں، اساں اوں ڳڑگاݙے تیں وادی دی سیر کرݨ چاہندوں، ڄیہرا آپݨی حکایت اچ آپݨی شاعری اچ رفعت سائیں ساکوں ݙیکھالیے، اساں کلر بلائنڈ ہاسے، ساکوں کڄھ رنگ گزرے ویلھے دے نہ ݙس اچ آ سڳیے ہن، اساں او رنگ ݙیکھݨ چاہندوں،
ساکوں گزریا ویلھا اندھا ݙسردا ہا جیندے ݙو رنگ ہن، ݙینہہ تے رات دا رنگ، چٹا تے کالا رنگ، ساکوں چٹکے اچ ساݙی وسوں دے شاعر رفعت سائیں ہیک پرزم ݙتا، ساکوں اوندے نال ݙینہہ دے رنگ ݙسریے،
اساں ہیر دے قتل دا مقدمہ بݨایا، اساں ڄھمر دے پھیر اچ رب سائیں نال ڳالہیں کیتاں، اساں پندھ کوں ڳاوݨ نال کچھݨ سکھیا، اساں حاکم کوں ہیݨا تھیندا ݙیکھ کے خوش تھئے، اساں ٹردے ٹردے مچھی نال الایا، پکھیاں نال ڳالھ کیتی، پکھیاں ساکوں سرائیکی اچ گاوݨ سݨائے، رفعت سائیں دی سوہݨی کافی

عشق تساں ہو سائیں، سݨی،

اساں مچھیاں کولوں سندھی اچ حال سݨیا، اساں مسیت دا آدر سکھیا، اساں سندھ اچ مندر تیں مسیت اچ ونڄ کے ہیکو سنواں الاوݨ جوڳے تھئے

ساکوں رات اندھاری ݙسدی ہئی، ساݙی اکھ کوں ٻھٻھݨ ٻھوں پیا ودا ہا، ساکوں ساݙی وسوں دے دیوتا اشو لال ہنس ٻݨایا تاں اساں چندر دے سوڄھلے اچ آپݨی وسوں تیں تھیوݨ آلا ماتم ݙیکھݨ جوڳے تھئے،
اساں شکاری کوں سنڄاڑݨ جوڳے تھئے، اساں غزنی دے حملے کوں ݙٹھا، اساں گوتم نال ملیے، اوندے نال ݙكھ ونڈیا، اوندے نال ڳالہیں کیتاں، گوتم ماندا تاں ݙاݙھا ہا لیکن ساکوں نچݨ دی صلاح ݙتوس، اساں نچیے، تاں دارو دے گھٹ بھرݨ توں زیادہ چس آئی،
اساں پچھو تیں ویندے پئے ہیں، کراچی دیاں عمارتاں اچو کارونڄھر دا پتھر ݙاݙھا ماندا اے، اتے ساݙے بھالے اچ اے، اساں اونکوں واپس اوں جاہ تیں پڄاوݨے جتھاں رب نال حال حوال ونڈݨ دی سبیل بݨدی راہندی اے،

اساں پچھو تیں ویندے پئے ہیں