[ اختر مینگل دی تونسہ یاترا دے حوالے نال ہک سنگتی دے پوسٹ اُتے کیتا کمنٹ ]
میں اختر مینگل دا اے انٹرویو سُݨیا ہوئے جو ڈیرہ غازی خان تے راجن پور دے سٹیٹس دا عوام فیصلہ کریسن۔۔۔ ایندے علاوہ اختر مینگل ٻیا کیا آکھ سڳدن؟ جݙاں پیپلز پارٹی جنوبی پنجاب بہاولپور (سرائیکی) صوبہ دا بل سینیٹ کنیں منظور کرایا تاں ڈیرہ غازی خان تے راجن پور دی ساری سیاسی قیادت بشمول بلوچ سرداریں حمایت کیتی۔
پنجاب اسمبلی دی قرارداد وچ ایہا صورتحال ہئی۔ جݙاں جنوبی پنجاب صوبہ محاز بݨیا تاں عثمان بزدار، بلخ شیر مزاری، نصراللہ دریشک سبھے بلوچ سردار اوندے وچ شامل ہئین۔ ایں کنیں پیلھوں ڈیرہ غازی خان دے بلوچ سرداریں بلوچستان دی بجائے پنجاب وچ شامل تھیوݨ دا باقاعدہ انتخاب کیتا۔
ٻیا کیڑھے سیاسی اتفاق دی لوڑھ ہوسی؟ اختر مینگل سئیں تاں اوں بݨے بݨائے سیاسی اتفاق کوں خراب کرݨ دا کم کیتے (کامیاب یا ناکام اے ویلھا سُدھ ݙیسی)۔۔۔۔ باقی اے ریفرنڈم دی ڳالھ وی بیکار ہے۔۔۔ ننویں صوبے بݨاوݨ دا ہک آئینی پارلیمانی طریقہ ہے جیندا سرائیکی ودھیک پندھ کر چُکن۔
پنجاب اسمبلی وچ کون ڈیرہ غازی خان تے راجن پور کوں بلوچستان وچ شامل تھیوݨ کیتے ݙو ترہائی ووٹ ݙیسی؟ سرائیکی صوبہ دا تاں وت وی کوئی چانس ہے جو ملتان، بہاولپور، ڈیرہ غازی خان، بکھر تے میانوالی دے نمائندے ہک تھی بلاک بݨا سڳدن۔
اینویں مسلم لیگ نون کوں وی اپݨے سیاسی مستقبل کیتے دریگھے سرائیکی وسیب کنیں ووٹ چاہیدے ہوسن تے او کھلم کھلا ایں صوبہ دی مخالفت نہ کرسڳسس۔ اختر مینگل سئیں کیڑھا ایجنڈہ چا کنیں آئین، نئیں ڄاݨ۔ پر اے اپݨے مقصد وچ نہ عملی ہے تے ناں حاصل تھیوݨ ہے۔
ایندے نال چھڑا سرائیکی صوبہ دا کیس ای کمزور تھیسی تے ݙو محکوم تے غلام قوماں ہک ٻئے نال بھڑسن ۔۔۔۔ ساݙی سمجھ وچ اختر مینگل دا اے ایکشن گھٹ ای آندے۔۔۔ سوائے ایندے جو اے وزٹ عثمان بزدار اُتے ودھدے پریشر کوں گھٹ کرݨ کیتے ہک بلوچ کارڈ دے طور اُتے اورتا ڳئے ۔۔۔ پر ایندا وی کئی خاص فائدہ نئیں تھیوݨا۔۔۔
جے تائیں سرائیکی ری ایکشن دی ڳالھ ہے تاں اوں ہتھوں اختر مینگل دے مقاصد کوں ودھاوݨ وچ ای مدد کیتی ہے۔۔۔۔ سرائیکی تحریک اپݨے پولیٹیکل میتھڈ تے ٹیکٹکس وچ اڄاں ٻہوں پچھوں ہے۔۔۔
یہ بھی پڑھیے
”کوئی خواب میکوں اُدھارا نہ ݙیویں“ (وسیب یاترا :12)||سعید خاور
”بدن دی بھوئیں تے مُونجھ دا متام“ (وسیب یاترا :11)||سعید خاور
””سندھو سکرات وِچ اے“ (وسیب یاترا :10)||سعید خاور