سرائیکی بلوچ۔۔۔حسن مرتضی

میݙا تعلق ڈیرے غازی خان دی یونین کونسل ماݨہ امداݨی توں اے ۔ اے یونین کونسل بلوچ سردار ماݨہ امداݨی دے ناں تے ہے اج وی ماݨہ امداݨی اچ ایندی امداݨی برادری ڈھیر تعداد اچ ہسدی وسدی پئی اے ۔
باقی بلوچاں آلی کار اے وی پہاڑ تو بلوچستان تو ہجرت کرتے سندھ دریا دی مݨ تے آ بیٹھے اتھو دے مٹھے پاݨی نال جی کوں سیراب کیتا۔
اتھو دی مٹی وچوں اپݨی روٹی ٹکر دا ترلہ کیتا ۔ باقی بلوچاں آلی کار اے وی سبھ توں نویکلی اتے سوہݨی سرائیکی تہذیب دے رنگ اچ رنگیے ۔ اج وݙیاں ستھݨا نئیں پیندے ، ناں بلوچکی داڑھی رکھدن تے نا ہی 22 گز دا پٹکا سر تے رکھدن ۔ اج ہک تل وطنی ہمیش تے آباد سرائیکی اتے انھاں وچ کوئی فرق کینی ۔ اے مکمل طور تے سرائیکی ہن ۔ سرائیکی بولیندن سرائیکی سمجھدن ۔ مابولی وی سرائیکی ہنے۔
ایویں ایں وسوں دے کئی بلوچ قبائل ان جیرھے وسیب اچ وسیبی تھی چکین ۔
ول خبر سݨیندی پئی اے جو ہک بلوچستان دا مینگل سردار انھاں ساریاں کوں یاد دہانی کراوݨ آندا پئے جو تساں بلوچ ہوو تے جتھاں وس گے او اوں وسوں کوں وی بلوچستان بݨا گھنو۔
سردار صیب پہلی گالھ میں ذاتی طور تے ایں وسوں دا شکرگزار ہاں جو میݙے وݙکیں کوں ایں وسوں چھاں ݙتی پناہ ݙتی پاݨی ݙتا۔ تے اپݨی ما بولی وی سکھائی تے دان کیتی ۔ تہاݙی زبان تہاݙا لباس تہاݙا کلچر میݙے کیتے اوپرا تھی چکے ۔ تساں میکوں کتھاؤ میݙی وسوں دے بندے نہوے لگدے تے میکوں کیہری بنیاد تے یاد کراوݨ آؤ جو اے وسیب نئیں بلوچستان اے۔ ؟
کیا میں ایں دھرتی دے احساناں دا اے صلہ ݙیواں جو ایں دھرتی دی شناخت ای مسخ کر چھوڑاں؟
مہاجرت دا مسئلہ ہک قومیت دا نئیں سبھ قومیں کوں ایندے اتے تحفظات ان۔ مہاجر جتھاں ونجے اوں وسوں دی نمک حلالی کرے اوندا تھیوے۔
کل کلاں جو پنجابی گوادر اچ ودھ گئے کیا او پنجاب دا حصہ بݨ ویسی ۔؟
بلوچ تے سرگودھا ، فیصل آباد اتے اوکاڑہ وی ہن جتھ چاکر خان دفن اے ۔ کیا اے وی بلوچستان اے ؟
کل تساں دہلی تے وی بلوچستان دا ٹیگ لا ݙیسو کیوں جو لانگو قبیلہ ہک مغل بادشاہ نال رل تے دہلی تے حملہ آور تھیا ہا۔ لکھݨ کوں گالھیں بہوں ان ۔ لیکن اے بلوچکی آپݨی پنجگور تربت تے ݙکھاؤ۔ اتھاں جلسہ کرݨ دے بجائے کوئٹہ وچ بلوچ لاپتہ افراد کیمپ وچ ونجو تے پتا لگے۔
سرائیکی شناخت اتے صوبے دی گالھ بہوں اگاں ٹر گئی اے ہݨ ایکوں خراب کرݨ تساں جئیں کہیں کٹھ پتلی یا منافق سیاستدان دا کم نئیں ۔ جیندے اشارے تے تونسہ پئے آندے او جݙاں انھاں دے خلاف بولیسو شئیت لاپتہ وی کرچھوڑݨ

dailyswail

See author's posts