دنیا حکایت تھیونڑا چاہندی اے۔ ۔۔رفعت عباس

دنیا حکایت تھیونڑا چاہندی اے

ایہ ترسلا دی گالھ بَھلے ہووے یا نہ ہووے’اخلاق یا کوئی فلسفہ ڈُھکے یا نہ ڈُھکے ‘ شعری کہیں منطق دی تَڈ بھانویں ٹھاہوے یا نہ ٹھاہوے ‘ ایں دنیا دی ہر شے حکایت تھیونڑا چاہندی ہے

حکایت , حکایت گو تو پہلے اج جاگی ہے ‘ ہک بگلا دریا دو ویندا ہویا حکایت وچ لتھے ‘ جل پری دیر تانڑیں حکایت دیاں گلیاں وچ بَھوندی اندر خانے وگ گئی ‘ عاشق کوں پتہ لگیا محبوب اوندا حکایت وچ موجود ہے اندر اوہ لنگھ گیا ‘ حکایت وچ کرسیاں میزاں پلنگ نویں نویں پُجے ہِن ‘ ہک تریمت نے بوہے اُتے پُچھیا حکایت دے باورچی خانے مانی اوہ پکاونڑاں چاہندی ‘ اوہ اندر آئی برامدے وچوں لنگھی حکایت دے رہائشی ہک بڈھڑے تے عاشق تھی گئی ‘ حکایت گو دے جاگنڑ توں پہلے پہلے شاعر , کیمیا گر , فوٹو گرافر , اخبار والا حکایت وچ داخل تھئے ‘ اُنہاں ڈسیا ہک دنیا حکایت وچ شامل تھیونڑ آندی پئی ہے

حکایت گو دی اکھ کُھلی حکایت وچ بہوں سارا شور ہئی ‘ حکایت وچ کمرہ در کمرہ شئیں دی رہائش ہئی ‘ حکاہت وچ باغ در باغ لوکیں دی سیر ہئی ‘ حکایت گو سوچیا ” حکایت تو کون باہر رہ گیا یے ‘ شائت دنیا بنڑاونڑ والا "……..

"دنیا بنڑاونڑ والا حکایت وچ موجود ہے "کہیں پاسوں آواز آئی

About The Author

ویب ڈیسک

See author's posts