
خوش نصیب حکمران، بدنصیب عوام!||عاصمہ شیرازی
ایک طرف سوویت یونین کی مثالیں تو دوسری طرف ریاست کی اکائیوں پنجاب، خیبر پختونخوا، آزاد کشمیر اور گلگت بلتستان کی جانب سے معاشی مطالبے پورے نہ ہونے کے صورت وفاق پر چڑھائی کی دھمکیاں دی جا رہی ہیں۔

ایک طرف سوویت یونین کی مثالیں تو دوسری طرف ریاست کی اکائیوں پنجاب، خیبر پختونخوا، آزاد کشمیر اور گلگت بلتستان کی جانب سے معاشی مطالبے پورے نہ ہونے کے صورت وفاق پر چڑھائی کی دھمکیاں دی جا رہی ہیں۔

اسلام آباد کے اہم ایوانوں اور سیاسی حلقوں میں گزرتے دسمبر میں یہ بحث دبے لفظوں جگہ لے چکی تھی کہ پندرہ سالہ منصوبہ تشکیل پا چکا جسے کسی صورت تکمیل سے روکا نہیں جا سکتا۔

جنرل باجوہ تحریک انصاف پر قربان ہوئے اور یہ اعتراف خود جنرل باجوہ کا ہی ہے مگر سوال یہ ہے کہ کیا ادارہ سیاست میں عمل دخل چھوڑ دے گا؟ جنرل باجوہ نے جاتے جاتے غیر سیاسی ہونے کے ’غیر مقبول‘ فیصلے کیے مگر کر لیے۔

طاقت اور اختیار کے اس آخری مرحلے میں مقاصد اور اہداف سامنے رکھے گئے ہیں۔ آئین، قانون اور اصول کی بجائے ذاتی مفادات کے حصول کا لائحہ عمل اور طریقہ کار کون اور کہاں طے کر رہا ہے یہی اصل سوال ہے۔ طاقت کے کئی ایک مراکز موجود ہوں تو نتائج عوام کی تقسیم اور تفریق کی صورت ہی ہو سکتے ہیں۔

ایک طرف برسوں کی محنت سے تیار کردہ اثاثہ اور دوسری جانب نیا تیار کردہ بیانیہ کہ اسٹیبلشمنٹ غیر سیاسی، اصلی اور وکھری ٹائپ کی ہے۔ بہرحال یہ کوشش تاحال جاری ہے، دیکھیے نظام سرخرو ہو پاتا ہے یا نہیں؟

سب تدبیریں الٹی ہونے کے بعد اب عمران خان ایک بار پھر اسلام آباد کی جانب رواں دواں ہیں، فوج سے مستقل مخاطب ہیں کہ وہ اُن کا ساتھ دے، یوں تو ادارہ جملہ حقوق آئین اور جمہوریت کے نام کر چکا ہے تاہم اصل آزمائش تب ہو گی جب عمران خان جنرل باجوہ کے خلاف ہر طرح کی زبان کی مشق کرتے ہوئے راولپنڈی پہنچیں گے۔

ملک جس دوراہے پر کھڑا ہے وہاں منقسم میڈیا، منقسم عدلیہ، منقسم انتظامیہ، مقننہ اور یہاں تک کے منقسم طاقت ور اشرافیہ اُس نہج پر پہنچ چکے ہیں کہ مزید تقسیم کی گنجائش نہیں مگر اس کے ساتھ ساتھ ارتقا کا جو عمل تقسیم کے بعد جنم لیتا ہے اُس کے آغاز کی کوئی صورت بھی دکھائی نہیں دے رہی۔

کیا عمران خان صاحب کسی ایسے نتیجے پر پہنچ چُکے ہیں جس میں حکومت کا خاتمہ کوئی معنی نہیں رکھتا؟ کیا لانگ مارچ کا رُخ اسلام آباد کی بجائے راولپنڈی کی جانب کر کے سرپرائز دے سکتے ہیں؟

سسٹم میں غیر آئینی سیاسی مداخلت کے کم و بیش 77 سال صرف ایک کلک سے ’ان ڈو‘ نہیں ہو سکتے جب تک کہ نظام کو آئین کی بنیادوں پر کھڑا نہ کیا جائے، عدالتیں صحیح معنوں میں آزاد ناں ہوں، طاقتور کے لیے قانون الگ اور کمزور کے لیے الگ نہ ہو۔ قانون و انصاف شخصیت اور حیثیت دیکھ کر عمل میں نہ آئے تو پھر سسٹم اَن ڈو ہو گا۔

واردات چونکہ ہمیشہ چھپ کر ہوتی ہے لہذا وارداتیا اب تک سامنے نہیں آیا۔ ہو سکتا ہے سکیورٹی کمیٹی وارداتیے کا کھوج لگا لے اور اس معاملے کو کسی منطقی انجام تک پہنچانے میں کامیاب ہو جائے۔