رفعت عباس دی شاعری: مقامیت تے پُھلاں دا انتخاب — زبیر احمد

لکھت: زبیر احمد
” آفاقیت دا حصہ بݨݨ کیتے مقامی ہووݨ ضروری ہے ۔ مقامیت دے بغیر اساں کہیں آفاقی تجربے وچ شریک نئیں تھی سگدے ۔ مقامیت پاڑھ ہے قید نئیں ، شناخت ہے تنہائی نئیں ، ماضی دی بازیافت ہے ماضی وچ واپسی نئیں ۔ مقامیت کہیں مقامی تجربے کوں اوندی انفرادیت سمیت انسانی تجربے دی کثرت وچ شریک تھیوݨ دے قابل بݨیدی اے ، کہیں غالب عالمگیریت وچ ضم تھی کے مِٹ ونجݨ کنے بچیندی اے”.
میں ایہو جھیاں کجھ ڳالھیں سوشل میڈیا دے توسط نال رفعت سئیں دے مونہہ کنے سݨی وداں ۔
روایتی طور تے مقامیت کنے مراد کہیں خاص جغرافیائی خطے ، اتھوں دے رسم رواج، رہݨ سہݨ ، ثقافت ، زبان تے جیوݨ دے ڈھو ڈھنگ دی عملی یا شعری تے ادبی ” عکاسی ” ہوندی اے ۔ اینہہ تصور وچ مقامی منظر ، علاقائی لوظ، ثقافتی علامتاں تے روز دی گذران نال تعلق رکھݨ والیں شئیں دی موجودگی کوں مقامیت دا بنیادی حوالہ سمجھا ویندے ۔ مقامیت دا ہک ٻیا ڈھیر درگھا، ݙونگھا تے تخلیقی تصور وی موجود ہے ۔ ایں تصور وچ مقامیت صرف کہیں جغرافیائی خطے دی شناخت دا اظہار نئیں رانہدی بلکہ ہک اینجھی فکری تے جمالیاتی بنیاد بݨ ویندی اے ، جیہری انسانی تجربے دی کثرت وچ جداگانہ شمولیت دا رستہ کھولیندی اے تے مختلف دنیاویں دے درمیان مکالمے واسطے پلیٹ فارم دا کم ݙیندی اے ۔ اینہہ مقامیت دا بنیادی عمل مقامی زبان، مقامی تاریخ، مقامی علم ، مقامی تجربے تے مقامی شناخت دی بازیافت ہے ۔
اینہہ بازیافت وچ تاریخ دے آرکائیوز دے نال نال اساطیر ، لوک داستانیں ، اجتماعی یادداشتیں ، قدیم علامتیں ، مقامی عقیدیں تے نسل در نسل منتقل تھیوݨ والے تجربیں کنے علم ادراک حاصل کیتا ویندے ۔ ایندا مقصد ماضی دو محض واپسی یا قدیم تہذیبی مظاہر دی بازیافت نئیں بلکہ ماضی وچ محفوظ علمی ، تہذیبی تے تخلیقی امکانات کوں لبھݨ ، حال کوں سمجھݨ تے مستقبل دی تعمیر کرݨ ہوندے ۔ لہذا ماضی کوئی بند کتاب کائنی بلکہ مستقبل دی تشکیل کیتے ہک جیندا جاڳدا وسیلہ ہے ۔ اینہہ مقامیت دی وݙی خاصیت اے ہے جو اے اپݨیں پاڑھیں نال جڑت قائم رکھدیں ہوئیں باقی دنیا نال مکالمے دے امکان وی پیدا کیتی رکھدی اے ۔
باقی دنیا نال مکالمے دی ڳالھ کریندیں ہوئیں pluriversality دا تصور اہم تھی ویندے ۔ ایں کنے مراد محض مختلف ثقافتیں دا ہکی جاہ تے کٹھا تھیوݨ نئیں بلکہ اے تسلیم کرݨ ہے جو دنیا کوں سمجھݨ ، محسوس کرݨ، بیان کرݨ تے ایندے وچ زندگی گذارݨ دے کئی طریقے ممکن تے موجود ہن ۔
مقامیت جڈاں تخلیقی عمل دا حصہ بݨدی اے تاں شاعر محض اپݨے علاقے دے منظر نئیں چِتریندا بلکہ اپݨیں آوݨ والیں نسلیں کیتے نویں امکانات تخلیق کریندے ۔ شاعر تے اوندی شاعری ڈوہیں، ایں معنی وچ artisan of future بݨ ویندن ۔ اینہہ تناظر وچ اے بے مثال شعر غیر معمولی معنویت اختیار کر ویندے ۔
کہیں پراݨے ناٹک اندر شاعری ساڈی رفعت
اپݨے ڃمدیاں ٻالاں کیتے کپڑے سِیندی پئی اے
اتھاں شاعری بیک وقت کئی زمانیں وچ موجود ہے ۔ لکھی اج ویندی پئی اے ، بیٹھی پراݨے ناٹک اندر ہے ، رشتہ ماضی دے آرکائیوز نال ہیسی مگر ایندی تخلیقی سرگرمی آوݨ والے ٻالاں کیتے کپڑے سیوݨ ہے ۔ گویا ماضی دے مواد کنوں مستقبل دے تخلیقی صورتیں تے سیکنڈری معنی دے طور آون والی. نسلیں واسطے پوشاک تیار کریندی پئی اے ۔ اینہہ شعر وچ ناٹک محض ہک تاریخی یا ثقافتی پس منظر کائنی ۔ اے ماضی دے انیں ساریں تجربیں، کرداریں، اساطیر تے اجتماعی یادداشت دا استعارہ بݨ ویندے جتھو شاعر اپݨی تخلیقی توانائی حاصل کریندے ۔ ایندے باوجود اوندی شاعری دا رخ مستقبل والے پاسے ہے ۔ ایہو او مقام ہے جتھاں شاعری صرف اپنے زمانے دی ترجمان نئیں رانہدی بلکہ آوݨ والے زمانیں دی تیاری کرݨ لگ ویندی اے ۔
رفعت سئیں دے تخلیق کیتے ہوئے images دے بارے ہک بنیادی ڳالھ کرݨ چانہداں ۔ مثال پراݨے ناٹک والے شعر دی تے ہک ݙو بے شعریں دی ڈیساں کیوں جو اینہہ لکھت وچ بس اتنی ڳالھ کیتی ونج سگدی اے ۔ رفعت سئیں دے تخلیق کیتے ہوئے امیجز کہیں Kantian gaze یا Colonial gaze دی تسکین واسطے نئیں ہوندے ۔ تے نہ ای او کہیں روایتی جمالیاتی ذوق دی تسکین دا وسیلہ بݨدن ۔ اے امیجز کہیں پہلے کنوں قائم جمالیاتی معیار دے سامݨے اپݨے آپ کوں خوبصورت ثابت کرݨ واسطے ہوندے ای نئیں ۔ اے اپݨے اندر کنوں ہک نویں جمالیاتی منطق پیدا کریندن ۔ اے ڳالھ پراݨے ناٹک وچ شاعری دی feminized personification یعنی گھریلو حاملہ تریمت دے امیج کوں سامݨے رکھ کے سمجھݨ دی کوشش کریندے ہیں ۔ اینہہ تریمت دی موجودگی دا Male gaze نال دور دا واسطہ کائنی ۔ اے تریمت کہیں ڈیکھݨ والے دی بصری تسکین واسطے تخلیق نئیں کیتی گئی ۔ ایندا وجود کہیں جمالیاتی شئے ، محبوبہ یا مردانہ تخیل دی آرائشی علامت واسطے ہے وی ناں ۔ ایندے ہتھ مستقبل دی تیاری وچ مصروف ہن تے ایندی موجودہ سرگرمی مستقبل دے تخلیقی امکانات یا وت آوݨ والیں نسلیں نال جڑی بوئی اے ۔
ایندے مقابلے وچ ایندے نال رلدا ملدا اردو شاعری وچو ہک شعر ݙیہدے ہیں ۔ اوندے وچ وی feminized personification دے نتیجے وچ سامݨے آوݨ والی ہک تریمت سلائی کڑھائی وچ مصروف ہے ۔
کس انہماک سے بیٹھی کشید کرتی ہے
عروس ِ گُل بہ قبائے جہاں گلاب کے پھول
مجید امجد
ایں شعر وچ عروس گل ہک روایتی جمالیاتی پیکر ہے ۔ عروس گل یا تریمت دی موجودگی ہک اینجھی نگاہ کیتے ہے جیہری ایندے حسن ، ایندی نشست ، ایندے انہماک تے ایندے جمالیاتی تاثر کوں ول ول ڈیہدی تے سَرہیندی ہے ۔ روایتی شاعری وچ تریمت کینجھی ہوندی اے ؟ عروس گل ہوندی اے ، عروس گل دی ہمزاد یا وت اوندی sibling ہوندی اے ۔ باقی جُمل جہان دیاں تریمتیں حاشیے تیں ۔
مجید امجد دے علاوہ عروس گل احمد ندیم قاسمی تے کئی ڈوجھے شاعریں وی ورتیے ۔ حافظ شیرازی دی ہک غزل وچ وی عروس گل ہے مگر محققین حافظ دی اونہہ پوری غزل کوں منتسںب اشعار دی فہرست وچ شامل کر ڈیندن تے مستند کلام نئیں منیندے ۔
عروسِ گُل دگر آمد به بزمِ گلشن باز
کجاست بلبلِ خوشگو برآورد آواز
بہرحال اے فرق مختلف نسوانی کرداریں دا فرق کائنی ۔ اے مختلف جمالیاتی تصورات دا فرق ہے ۔ ہک پاسے تریمت کوں ڈیکھݨ تے اوندے حسن کنے محظوظ تھیوݨ دا عمل بنیادی اہمیت رکھدے ڈوجھے پاسے تریمت آپ ہک تخلیقی تے انسانی عمل وچ مصروف ہے ۔ ایندا وجود کہیں نگاہ دی ملکیت نئیں بلکہ اپݨی داخلی معنویت نال جُھریا ہویا ہے ۔ مجید امجد دے شعر وچ ” گلاب کے پھول” پڑھ کے خیال آئے جو رفعت سئیں دی شاعری وچ جمالیاتی وکھرپ کوں انیں دے پُھلیں دے انتخاب نال وی سمجھا ونج سگدے ۔
رفعت سئیں دی شاعری وچ اینہہ جمالیاتی تبدیلی دا اظہار پُھلیں دے انتخاب وچ سامݨے آندے ۔ او گلاب کوں شاعری وچو خارج نئیں کریندے ۔ کیوں کرن ؟
گلاب اللہ دا ماہݨوں ہے
کوئی عجب سنیہا یار
او صرف کانٹ دے disinterested pleasure کوں خارج کر چھوڑیندن ۔ سوشلسٹ ریئلزم وی اینکوں رد کر ڈتا ہا ، موقف اے ہا جو جمالیاتی تجربے نال افادیت دا پہلو موجود ہوندے جینکوں زبردستی نظر انداز نئیں کیتا ونج سگدا ۔ البتہ کانٹ دے sublime دے تصور کوں قبول کر گِھدا ڳیا ۔ اینکوں industrial sublime دی شکل ڈے ڈتی گئی۔ یو ایس ایس آر دے عظیم صنعتی ڈھانچے ، عظیم تعمیراتی منصوبیں، گرینڈ ریلوے نظام تے عظیم خلائی مشن دی تشکیل وچ ، اے تصور ٻہوں کم آیا ہا ۔
اللہ دا ماہݨوں تے سنیہا (revealed message) میکوں تاں sublime لگدے ۔
گلاب اللہ دا ماہݨوں ہے
کوئی عجب سنیہا یار
( عجب اس کی ہیبت ِ حسن تھی عجب اس کا رنگ ِ جمال تھا ) ۔
اینہہ کافی وچ اڳوں ونج تے رفعت سئیں لکھدن :
ایں نیل اسمان دے کنڈے تے
ہک لتھی لال کنوار
ہک قاری دی حیثیت نال میکوں اتنی اجازت تاں ہے پئی جو میں ” لال کنوار ” کوں عروس گل دا سرائیکی version آکھی ونجاں ۔ گلاب دا پھل بلاشبہ پھلیں دی اشرافیہ تے اشرافیہ دا پھل بݨ چکے مگر ایندے کولھو delink کیوں تھیوں؟ اشرافیہ دی جمالیاتی تنگی کنے پوہلے تھی گئے ہیں ۔ ساݙی مقامیت دا ظرف کہیں ݙیکھݨے تاں ایں شعر وچ ݙیکھن :
ساڈی تاں لڑائی رفعت گُھڑ سواریں نال اے
گھوڑے کوں ہک پَھٹ وی لگے مونجھے تھی ویندے ہیں
آپ مقامی گذران وی تاں ساری دی ساری ” دودھ کی دُھلی” نئیں ہوندی ، نہ رفعت سئیں مقامیت دا ناں چا کے ماضی دی کوئی replica تیار کریندے ودن ۔ جتھو جتھو delink تھیوݨ ضروری ہوندے علی الاعلان تھئے ویندن ۔ صرف ہک مثال دی گنجائش ہے ، اے نظم ݙیکھو :
” تریمتیں بارے "
روز ڈیہاڑی ڳالِھیں
وݙکیاں دے اکھاݨ
ٻہوں لُکاویں ٻول
سبھ پاروں مافی
ٻہوں سارے قصے
ڈِھڳ ساری شاعری
عمراں دیاں جڳتاں
سبھ پاروں مافی
اساں تریمتیں بارے
وادھو جو کر سݨیا
وادھو جو الایا
سبھ پاروں مافی
گلاب دا پُھل سر اکھیں تے ، اے وی موجود ہے پیا مگر ایندے نال پڑچھیاں دے پُھل :
پڑچھیاں اتے پھلاں دا کم کہیں کہیں کوں آندا
ون سَوَنے خواب تاں رفعت سبھ نے ݙٹھے ہوندے
ککراں دے پھل ، پُھمݨ :
وت سڑکاں تے وچھے پئے ہِن پیلے پُھل کِکراں دے
سَیکلاں والے لنگھیے ویندن ٹَلیاں وت وڃا کر
ایں شعر دا پورا ڈوجھا مصرعہ ، پہلے مصرعے دا تلازمہ ہے ۔ اینجھے ڈُھکیئے ہوئے تلازمے کہیں ٻی شاعری وچ گَھٹ پڑھݨ کوں ملدن ۔ رفعت سئیں چاہون وی تاں انہیں کوں replace نئیں کر سڳدے ۔ نِیل اسمان دے کنڈے تئیں لگے ونجو ، چس چیندے ونجو ۔ سَیکلاں والے لنگھیے ویندن ٹَلیاں وت وڃا کر ۔۔۔ واہ
کافی :
کیں بدهین وو یار پُھمنڑ ککراں تے
ویندی پئی ہک دنیا ٹلی شور بھری
شور بہوں رنگدار پُھمنڑ ککراں تے
کیں بدهین وو یار پُھمنڑ ککراں تے
ویندی پئی ہک دنیا میلہ ڈیکھنڑ کوں
گانیاں لکھ ہزار پُھمنڑ ککراں تے
کیں بدهین وو یار پُھمنڑ ککراں تے
ایہ روہی دا رستہ ہٹیاں رنگ بھریاں
رنگاں بهرے بزار پُھمنڑ ککراں تے
کیں بدهین وو یار پُھمنڑ ککراں تے
اساں فقیریں دا وی کوئی کتھاہیں ہے
کوئی ڈیکھے تاں یار پُھمنڑ ککراں تے
کیں بدهین وو یار پُھمنڑ ککراں تے
کِکراں دے پُھمڑاں والی اے کافی کوئی خواجہ شاہ سلیمان سئیں دے دربار وچ ڳاوے ہا ، اساں جھمر ماروں ہا ۔
گیندے دے پھل :
گیندے دے ڈو پھل پوا کے دل اپنے کوں رفعت
اوندے گوٹھ بزاریں اندر ولدا ٹور ڈتوسے
گیندے دے پُھل : 4
جنگ دے ڈینہاں وچ
گیندے دے پُھل
قصے کریندن اپݨے وڈکیاں دے
جیہڑے لام وچ نہ بھرتی تھئے
حال ڈیندن اپݨیاں تریمتیں دے
جنہاں جنگ دے ڈینہاں وچ
رج کے پریم کیتا
ٻالیں دیاں کھیڈاں
جنہاں بھنبھیریاں بݨائیاں
ہوائی حملے دے ویلے وچ
ڳلیاں وچ درکے
گیندے دے پھلاں
جنگ دے زمانے وچ
اُنہاں لوکاں کوں یاد کیتا
جیہڑے پھلاں دی نمائش وچ آئے
ایں نظم کوں میں Aesopian تمثیل دے رنگ وچ کہیں نویکلی لکھت وچ کھولیساں جے وت بخت بھڑایو وے یار ۔
ٻیا تاں ٻیا روٹی دے پُھل وی شاعری وچ آ ویندن ۔
تُساں پُھل ݙیکھو میاں روٹی دے
کوئی خوشبو آپ اللہ دی ہے
پئے خلقت وچ ونڈیندے ہو
پھلیں دا اے انتخاب پھلیں دی فہرست وچ اضافہ نئیں بلکہ حسن دے تصور دی وسعت ہے ۔ مقامیت دی ڳالھ کرݨ والا شاعر جمالیات کوں انیں شئیں وچ وی ڳول گھندے جنہیں کوں روایتی شعری ذوق عام طور تے حسن دی مرکزی علامتیں وچ شامل نئیں کریندا ۔روایتی شعری ذوق اشرافیائی ذوق کنے الف ب پڑھی ودے ، Kantian gaze دی گرفت وچ ہے یا Colonial gaze کنے متاثر ہے ۔ جیکوں اے gaze مرکز وچ جاہ ڈیندی اے ، اے وی ڈتی آندے ۔ جیکوں اونہہ حاشیے تے سٹیا ہوئے اے وی پورے اطمینان نال سٹی آندے ۔ تریمت بارے روایتی ذوق کتھائیں کتھائیں male gaze دی اشتہا دا اسیر وی ڃاپدے ۔
روٹی دے پُھل دی گالھ کروں تاں مختلف ثقافتیں وچ روٹی دے پُھل واسطے وکھرے وکھرے ناں موجود ہن ۔ ” مغرب دی روٹی ساڈی روٹی وانگوں تاں نئیں ہوندی وت وی اتھاں پیزے تے بریڈ دے رتے بھورے دھبیں کوں leopard spots آہدن ۔ ازبکستان تے اوندی ہک ادھ ہمسایہ ریاست وچ انیں کوں دوغلار doglar سڈیندن ۔ ایران وچ نان دے اُتے کلونجی، تِل تے کئی بے بیج چھڑکیے ویندن ، انیں کوں ” خال ِ نان ” یا خال ہائے نان آہدن ۔ بھاء دے سیک نال بݨݨ والے دھبیں کوں وی خال ِ نان آہدن ۔ عربی اپݨی روٹی کوں بھاء دے سیک نال سونے رنگا یا رتا کریندن تے اینہہ رنگ کوں تقمیر آہدن ۔ تقمیر قمر یا چندر کنے بݨیے” ۔( زبیر رانا )
ساڈا روٹی دا پُھل وی ڈاڈھا سوہݨاں ہے ایران دے خال ہائے نان دی وی کیا بات اے ۔ روٹی دے پھل دا شعر وچ ذکر صرف کہیں وسریے ہوئے پُھل دی یادگیری دی جمالیات نئیں ۔ پُھل صرف باغ وچ شاخ تے نئیں لگدے ، پھل توے دے تاء نال وی بݨ سڳدن ۔ خوشبو ساڈے رویے دی ٹھنڈک ، ظرف دی وسعت نال وی تخلیق تھی سڳدی اے ۔روٹی دے پھلیں نال باورچی خانہ ، تنور تے توا ، گھریلو مشقت ، روز مرہ زندگی تے تریمت دے ہتھ جمالیاتی تجربے دا معتبر مقام بݨ ویندن ، ڳالھ بس اتنی وی نئیں ۔ جتھاں اینہہ پھل دی خوشبو کوں اللہ دی خوشبو آکھݨ اینکوں روحانی تجربہ بݨیدے ، اتھائیں ونڈ کے کھاوݨ دی جمالیات سبھ کنے اُتم ہے ۔ ایں طرح رفعت سئیں حسن کوں کہیں ہک مسلمہ معیار دے تابع نئیں کریندے بلکہ حسن دے نویں معیار تخلیق کریندن ۔
اتھاں ہک بنیادی نکتہ سمجھݨ ضروری ہے ۔ رفعت سئیں مقامی ثقافتی شئیں دی فہرست مرتب نئیں کریندے ، شاعری کریندن ۔ حالانکہ اجکل تاں رواج ہے جو شاعری دے ناں تے cultural cataloging تھیندی پئی اے ، ہو بہو این جی اوز دی رپورٹ رائٹنگ جھئیں ۔ رفعت سئیں مقامی شئیں ، مقامی ہنر ، مقامی رنگ ، مقامی نباتات تے ثقافتی مظاہر کوں محض انیں دی علاقائی شناخت دی بنیاد تے جمع نئیں ودے کریندے بلکہ انہیں کوں انسانی تجربے وچ ڈھال کے سامݨے گھن آندن ۔
انیں دی شاعری وچ کوئی شئے محض شئے نئیں رانہدی ، انسانی احساس، موسم، مونجھ ، یادداشت، محبت ، مزاحمت یا زندگی دے کہیں ڈونگھے تجربے دا استعارہ بݨ ویندی اے ۔
مثال دے طور تے اے شعر ݙیہدے ہیں:
بندہ وی تاں ہک فیروزی مرتبان اے ، آکھو
ݙینہ پراݨے سانبھݨ کیتے موسم رکھݨ کیتے
اے کوئی صدیں پراݨی برتن سازی دی روایت دا تعارف نئیں پیا تھیندا ، نہ ای ایندا مقصد کہیں فیروزی مرتبان دی ظاہری خوبصورتی بیان کرݨ ہے ۔ اے ہک مقامی شئے کوں انسانی وجود دے ہک نویں تصور وچ تبدیل کرݨ دا عمل ہے ۔ مرتبان مٹی دا بݨیا ہویا ، بندہ مٹی دا بݨیا ہویا ۔ مرتبان وچ خلاء ، بندے وچ وی ونکو ونک دے voids تے uncharted depths . مرتبان اپݨے اندر شئیں کوں محفوظ رکھدے ، او شئیں کوں محض جمع نئیں کریندا بلکہ اُنیں کوں گم تھیوݨ ، ڳل بُھر ونجݨ یا ضائع تھیوݨ کنے بچا کے رکھدے ۔
ڈینہ پراݨے ؟ اے کوئی کیلنڈر دے ݙینہہ تاں نئیں ۔ انیں دا حساب کرݨ لو کیلنڈر دے باہرو آوݨاں پوسی ۔ اے lived time دے دائرے ہِن جتھاں تانگھ دا ہک پَل تے ݙُکھ دا ہک لحظہ ہزار سال دے برابر ہوندے ۔ جتھاں خوشی دا پورا پہر اکھ جھمکݨ وچ گذر ویندے ۔ موسم وی تاں گرمی سردی بہار خزاں دی مختصر گنڑتری تک محدود نئیں ہوندے ۔ موسم تاں صد ہزار ہوندن ۔
ہک توں نیں آندا واٹ ساڈی
کئی موسم آندن واٹ ساڈی
سیف اللہ آصف
بندے دا Hippocampus ، بندے دی RAM انیں سارے موسمیں کوں اپنے اندر سانبھ رکھدی اے ۔ بندے تے مرتبان وچ ہک مہین جھیاں فرق ہے ، مرتبان editing نئیں کرسگدا ، بندہ دود مریندے editing کیتی رکھدے ۔ خیر ، بندہ وی ہک مرتبان ہے جیندے اندر تانگھ تجربے ، یاداں ، کیفیات تے زندگی دے وکھو وکھ موسم سانبھیے لاتھن ۔ فیروزی رنگ ۔۔ میڈی زندگی وچ ہک رُٹھی ہوئی رُت دا رنگ، مرتبان، پراݨے ݙینہہ تے موسم رل مل کے ہک اینجھی تصویر بݨیندن جو ہک مقامی برتن وسیع تر انسانی تجربے دا وسیلہ بݨ ویندے ۔
ہک ٻیا شعر ڈیہدے ہیں :
مونجھ کتھائیں ݙردی ہے تاں رنگیں کولوں ݙردی
تہوں تاں اپݨی کھٹ دے پاوے رنگلے رکھدے ہیسے
اے تاریخی کاریگری یا پراݨی مقامی دستکاری دا آدر تاں بلاشبہ ہے مگر ڳالھ صرف اتنی نئیں ۔ اینہہ شعر دا مقصد مقامی کھٹ سازی یا رنگین پاویں دی ثقافتی تاریخ بیان کرݨ نئیں ۔ مونجھ ، رنگ تے کھٹ کوں ہک تخلیقی رشتے وچ جوڑݨ دا مقصد کوئی ٻیا ہے ۔ رنگ اتھاں محض آرائشی کائنی بلکہ احساس، خوف تے تخیل دے آپسی تعلق دا وسیلہ ہے ۔ اے شعر مقامی کاریگری کوں انسانی نفسیات نال جوڑیندے ۔ کھٹ دی ساخت وچ موجود رنگ انسانی وجود دی ہک اندرونی ضرورت دا اظہار بݨ ویندن ۔ گویا انسان اپݨے ماحول کوں صرف ورتیندا یا ہنڈھیندا نئیں اونکوں اپنے احساسات دے مطابق تبدیل کیتی رکھدے ۔ رفعت سئیں دا امتیاز اے ہے جو او مقامی شئے کوں اوندی ثقافتی شناخت کنے محروم کیتے بغیر اونکوں ہک نویں انسانی تے جمالیاتی تجربے وچ تبدیل کر ڈیندن ۔
اساں اپݨے گھریں وچ کُئی کلھے رانہدے پئے ہیں
نال اساݙے تھاں پئے رانہدن نال اساݙیاں کھٹوں
اے کوئی me-time دے دوران جھلک ڈِکھاوݨ والی رستہ بھلی یاد نئیں ۔ جون جتھاں پیا رانہدے اوندی مِٹی ، ماضی تے اساطیر دا کوئی نہ کوئی حوالہ اوندے نال نال رانہدا پئے ۔
رفعت سئیں دی مقامیت کوئی آبادی کنے وانڈھا ثقافتی جزیرہ کائنی ۔ انیں دے ماضی دے تصور کنے یا اساطیر کنے ݙرݨ دی ضرورت کائنی ۔ ماضی تے اساطیر ساݙا گذریا ہویا کل وی ہِن ، ساݙا اڃ وی ہِن ، صباحیں وی ساݙے نال ہوسن ۔ ساکوں ساݙے وقت دے تصور تے نظر ثانی کرݨ دی ضرورت ہے ۔ جیویں انیں دی شاعری وچ ثقافتی نوادرات ماضی دے نمائندیں دی حیثیت نال ظاہر نئیں تھیندے یا انیں دا تخلیقی استعمال محض ماضی دا نمائندہ نئیں ہوندا ، اویں اساطیر وی ماضی دی نمائندہ نئیں ۔اساطیر تاں ” لوݨی ” شہر دے معماریں وچ شامل ہِن ۔ لوݨی جیہرا alternate cosmology دا استعارہ ہے، ہر قسم دی vulnerabilities کنے پاک دنیا دا خواب ہے ۔

قلعہ ڈیراور
شاہ رکنِ عالم
کوہِ سلیمان
تھل
دریائے سندھ
جواب دیں