تانگھ۔۔۔||فہیم قیصرانی

وئے آ شبیر آ باہوں مدت بعد ڈیسدا پئیں میں آھداں تیکوں کراچی کھا گئ ھیے سر موئی؟ بس ھونڑ ول آ ساری ذندگی پرائی کیتی۔

وئے آ فرید خان آ گودا خیر ھیوے خوش ودے وئے ؟

ھا شبیر آ اساں تاں جھوک تیں لاتھے ھیں کاکا ،

شبیر کاکا میں سونڑدا پیا ھم جو کوجھ سالیں دا پورھیا کر تیں شبیر دبئی تیاری کیتی کھڑے وئے یار ایتھائیں کوئ ہلکا چنگاں کم کر کوئ مال ڈنگر، چار ڈینھ دی زندگی ھیے تیڈیاں چار دھریں تیں چار سال دا ھکو پتر ھیے نہ انہیں کوں رول نہ آپ رول ،

ھا فرید آ دل تیں وڈا آھدے پر مہنگائ ھیے خرچے پورے نہیں تھیندے تیں ڈوجھی گالھ دھریں دے بال ھین آخر انہیں دا وئ تاں کوجھ سوچنڑے یار میں آھداں کوئ ڈو چار سال لا آواں متاں سوکھا تھئ ونجاں۔

اچھا ٹھیک ھیے شبیر جیویں دل آکھی خیر ھوویی میں جلدا پیاں ۔گودا فرید ایے آکھ تیں ٹر پیا

شبیر چپ کر تیں گھر آندے زال کوں آھدے اج نماشاں کوں ٹریا وینداں میڈے بالیں دا خیال رکھیں میں تیں چلو جیہرے رنگ اچ وداں وداں تساں تیں سوکھیے رہوو زال ولدا ڈیندی ھیے سجاد دا پیو باہوں مدت بعد آئیں روکھی روٹی تیں ، لسی، وسل ، نال تیڈا ادر کریندی ھاں وڈی مونجھی تھی بیٹھی ھاں شالا خیر نال ودا رھیں

شبیر آھدے میڈیاں دھریں کیتھاں ھین میڈا پتر سجاد ؟

زال ولدا ڈیندی ھیے اوڈے ڈیکھ دھریں تیڈیاں باہرو کیکر دی چھاں ہیٹھ پڑھیداں بیٹھین تیں تیڈا پتر ھونڑ تک رو رو میکوں زلیل کیتی رہ گئے ۔

کیوں سجاد دی ماں میڈا پتر کیوں روندا رہ گئے؟ زال ولدا ڈتے آھدا ھا ابا دبئی نہ ونجے ،

،

شبیر ٹھڈی ساہ بھر تیں اھدے سجاد دی ماں آخر ایے ڈینھ موک ویسن اللہ چنگائی کریسی

شبیر کوجھ گھنٹے بالیں نال بیٹھا رہ گئے ، دھریں کوں باھیں اچ پیندا پتر کوں رج رج چومدا تیں اپنڑیں ھاں تیں سمیندا ،سچ آھدین جو گالھے بال سیانڑاں گالھیں کریندین، پیو دے ھاں دے سمھ کیں ول اوٹھی باہندے پیو پوچھیے ابا کہیری گالھ ھیے میکوں ڈس کیا آھدیں؟

پتر ولدا ڈتے ابا توں میکوں سائیکلی نہ گھینا ڈیویں بس توں ونج ناں ،

،

شبیر دے آکھیں چوں ہنجھوں تر آندین آکھنڑ لگ گئے ابا میں ول آساں میڈا پوتر قربان تھیواں کیجھاں سیانڑاں ھیں توں ۔

وقت ویندے کوئ پتہ لگدے نماشاں نیڑے تھئ ھیے تیں زال کوں آھدے بھلا تھیوئ میڈا سامان سمبھال ڈیے تیں میں پندھ کراں

تیں ڈوجھی گالھ سیانڑے تھیوو مونجھے نہ تھیوو اللہ دے پاسوں خیر ساری خیر ھیے ،زال آھدی ھیے شبیر سچ سچ ڈس توں مونجھاں کوئنی؟ شبیر ہینڑے دل دا بندا ھا رو ڈتیس آکھنڑ لگ گئے سجاد دی ماں باہوں پریں بلا ٹریا وینداں سجاد واسطے باہوں مونجھا کھڑاں میڑے پتر کوں کڈاھیں جھنڑکیں ناں کڈاھیں درکے نہ ڈیویں ایکوں سیک نہ ڈیواں میڈی زندگی تیں ھک ڈینھ ول آساں۔

بہرحال شبیر وستی اچوں ٹرنڑ لگا تیں نماشاں دا ویلھا ڈینھہ لہنڑ تیں ھا ۔گھر توں باہر نکھتے تیں زال بال سارے پیچھو درد درسال تیں ٹردے آئے ،

پتر سجاد ھکل مار کیں اکھیے ، پیا ابا وئے تیں آکھیے میں جلدی ول آساں جلدی ولیں۔

،

شبیر پتر کوں وندلیندیں ھوئیں ولدا ڈتے میڈا پتر میں عید تیں ول آساں ، شبیر روندا ویندے تیں اپنڑیں آپ اچ آھدے ویندے شبیر آ تیڈا اللہ بیلی یار آ ۔

سفر باہوں طویل ھا سفر دی ھر گھڑی اچ گھر دے ہر ڈکھ سکھ کوں یاد کریندا تیں ھر ھک پل کوں آکھیں اچ وہیندا گئے

بہرحال دبئی پہنچڑ دے بعد سنگھتی کفیل دے متھے لائے تیں کفیل ہتھ اچ لکڑ ڈیے کیں شبیر کوں اوٹھیں نال ٹور چھوڑیے

شبیر آکھیے آ بیلی میں تیں کیا سوچ کیں آیا ھم میں تاں رول گیا بھل آپ کوں آپ ترسلی ڈیے کیں آھدے یار وڈی مخلوق شودی ایتھاں رولدی پئی ھیے ھکو توں تاں نہیں رولدا ودا

ڈینھ سارا ریت دے ٹبیں اچ اوٹھ چریندا ھا تیں گھر جھوگے ، بالیں کوں رج یاد کریندا ھا تیں کڈاھیں وقت وتھی ڈیوئے ھا تاں گھر بالیں دو فون کریندا تیں رج مونجھا تھیندا آھدا ھا اللہ جانڑے کڈاھیں آپنڑیں ٹھور ٹکھانڑیں تیں ول وی ویساں؟

جوں جوں ڈینھ ،مہینے، سال گزدے گئے شبیر دے رابطے ءچ کمی آندی گئ شبیر جڈاں آخری کال کیتی ھئ آکھیا ھاسی میں کہیں ظالم کفیل دے ہتھیں چڑھ گیاں دعا کرو اللہ میکوں ایں ظالم جابر انسان کیں رہائی نصیب کرے

شبیر 4 سالیں دا آکھ گیا ھا اج 8 سال تھئ گین ول موکل نہیں آئ اللہ جانڑے شبیر آ توں کیتھاں رول گئیں توں جیندا ھیں مر گیں

پر یار شبیر دیاں دھریں کیکر دی چھاں ہیٹھ پئے تکڑے تیں ءج وی شبیر دی راہ تکیندیاں بیٹھن تیں ایں تانگھ اچ بیٹھن کہیں ویلھے در درسال کیں اچانک ابے سئیں ھونڑیں آ ویسن ۔

شبیر اپنڑیں پتر سجاد کوں آکھ گیا ھا ابا میں عید تیں ول آساں ایں سانگے ھر عید دی کار ایں عید تیں پیو دی راہ ڈیہدا کھڑے تیں آھدا کھڑے ابا توں میکوں رج رج چمدا ھاویں میکوں پیار کریندا ھاویں میکوں اپنڑیں سینے تیں سمیندا ھاویں ابا توں بھل ونجنڑ آلا تاں کوئنہ ھاویں ابا جان تیڈے ونجنڑ دے بعد زندگی باہوں اوکھی تھی گی حالات بئی طرانویں تھئی گئن تیڈے بغیر باہوں مونجھا وداں جانی آں ۔۔۔ یار ابا ھک دفعہ ول آویں ھا