جیکر اِ تھاں آئے ہیں تاں ہتھ لْݙا کے ٹروں
ایہ گلی محبوباں والی در محبوباں والا
عین اساڈے رستے دے وچ گھر محبوباں والا
اکھ چمکا کے ݙیکھوں دنیا ہوٹھ رنگا کے ٹروں
جیکر اِ تھاں آئے ہیں تاں ہتھ لْݙا کے ٹروں
رستے دے وچ باغ عجائب رستے دے وچ دریا
رستے دے وچ رب آندا جَیندا قصہ روز نیارا
رب دے نانویں سبھ دے نانویں دھڄ بݨا کے ٹروں
جیکر اِ تھاں آئے ہیں تاں ہتھ لْݙا کے ٹروں
بھوئیں تاݨیں جو آئے ہیسے لکھ برکت دا ویلا
کینجھے سوہݨے دلبر سیتی آݨ تھیا ہے میلہ
جیوݨ دی ایں واری وچوں راند رسا کے ٹروں
جیکر اِ تھاں آئے ہیں تاں ہتھ لْݙا کے ٹروں
اگوں سپاہی ملاں باہمݨ اگوں حاکم قاضی
جنہاں تاݨیں پہلے ݙینہ دا دل نہیں وو راضی
اِنہاں اگوں یار اپݨے دا گیت بݨا کے ٹروں
جیکر اِ تھاں آئے ہیں تاں ہتھ لْݙا کے ٹروں
یہ بھی پڑھیے
”سیفل نامہ“ مولوی لطف علی تے محبوب مٹھل مجاہد جتوئی||سعید خاور
”ساڈے دل دریا، ساڈی اکھ صحرا“(وسیب یاترا :21)||سعید خاور
”دریا او دریا، پاݨی تیݙے ݙونگھے“(وسیب یاترا :20)||سعید خاور